Hosea 1

Chinese TTVR (現代台語譯本羅馬字版)

Jump to: Chapter 2 →

1Ē-bīn sī O͘-se-a, Iok-thán, A-hap-su, Hi-se-ka sòa-chiap chòe Iû-tāi -ông, Iok-hôa-si ê kiáⁿ Iâ-lô-pho-an Jī-sè chòe Í-sek-lia̍t -ông ê sî, Siōng Chú tùi Pī-lī ê kiáⁿ Hô-se-a kóng ê ōe.

2Siōng Chú thâu chi̍t piàn tùi Hô-se-a kóng-ōe, kóng, “Lí khì chhōa chi̍t ê îm-hū chòe bó͘, siu i tùi îm-loān siⁿ ê gín-á; in-ūi chit-ê tōe-hng chhiong-móa îm-loān, lī-khui Siōng Chú.”

3Hô-se-a chiū khì chhōa Tih-la-im ê cha-bó͘-kiáⁿ Ko-bi̍t, i hoâi-īn, siⁿ chi̍t ê kiáⁿ.

4Siōng Chú tùi Hô-se-a kóng, “Kā i hō-miâ kiò-chòe Iâ-su-lia̍t, in-ūi koh bô-jōa-kú, góa beh in-ūi Iâ-hō͘ -ke tī Iâ-su-lia̍t thâi-lâng lâu-huih ê chōe kā in hêng-hoa̍t, beh toān-choa̍t Í-sek-lia̍t ê ông-tiâu.

5Kàu hit-ji̍t, góa beh tī Iâ-su-lia̍t Soaⁿ-kok at-chi̍h Í-sek-lia̍t ê keng.”

6Ko-bi̍t koh hoâi-īn siⁿ chi̍t ê cha-bó͘-kiáⁿ; Siōng Chú tùi Hô-se-a kóng, “Kā i hō-miâ kiò-chòe Lô Lō͘-hap-má, in-ūi góa bô beh thiàⁿ-sioh Í-sek-lia̍t -ke, it-tēng m̄ kā in sià-bián.

7Chóng-sī góa beh thiàⁿ-sioh Iû-tāi -ke, góa Siōng Chú — in ê Siōng-tè ōe kiù in, m̄-sī ēng keng, ēng to, ēng kau-chiàn, ēng chiàn-bé, á-sī ēng bé-peng kiù in.”

8Lô Lō͘-hap-má tn̄g-lin liáu-āu, hū-jîn-lâng koh hoâi-īn siⁿ chi̍t ê kiáⁿ.

9Siōng Chú kóng, “Tio̍h kā i hō-miâ kiò-chòe Lô A-bí; in-ūi lín m̄-sī góa ê chú-bîn, góa mā m̄-sī lín ê Siōng-tè.”

10Chóng-sī Í-sek-lia̍t ê lâng-gia̍h ōe chhin-chhiūⁿ hái-soa bōe-niû--tit, bōe-sǹg--tit. Í-chêng Siōng-tè tī sím-mi̍h só͘-chāi ū tùi in kóng “Lín m̄-sī góa ê chú-bîn”, chiong-lâi tī hia beh tùi in kóng “Lín sī éng-oa̍h Siōng-tè ê kiáⁿ”.

11Iû-tāi -lâng kap Í-sek-lia̍t -lâng ōe liân-ha̍p, soán chi̍t ê léng-siù, tùi chit-ê tōe heng-khí; in-ūi Iâ-su-lia̍t ê ji̍t ōe chiâⁿ-chòe êng-kng ê ji̍t.

Jump to: Chapter 2 →