Hosea 10

Chinese TTVR (現代台語譯本羅馬字版)

← Chapter 9 Jump to: Chapter 11 →

1Í-sek-lia̍t sī gâu siⁿ-thòaⁿ, gâu kiat ké-chí ê phû-tô-chhiū. Ké-chí kiat ná chōe, chè-tôaⁿ chiū khí ná chōe; thó͘-tōe chhut-sán ná hong-hù, chio̍h-thiāu-siōng chiū chō ná súi.

2In ê sim khúi-chà, it-tēng tio̍h siū tēng-chōe; Siōng Chú beh thiah in ê chè-tôaⁿ, húi in ê chio̍h-thiāu-siōng.

3Hit-sî in ōe kóng: Goán bô ông, goán bô teh kiaⁿ Siōng Chú. Ū ông, i ōe-tàng thòe goán chòe sím-mi̍h?

4In khang-chhùi-pō͘-chi̍h, lām-sám chiù-chōa li̍p-iok; in hō͘ kong-gī pìⁿ-chòe put-gī, chhin-chhiūⁿ hn̂g-kau ê to̍k-chháu sì-kòe siⁿ-thòaⁿ.

5Pek A-bûn ê gû-á-siōng siū húi-hoāi; Sat-má-lī-a ê chū-bîn kiaⁿ-hiâⁿ, ūi-tio̍h gû-á-siōng ai-siong, in ê chè-si pi-ai, in-ūi kim-gû í-keng sit-khì êng-kng.

6In ê gû-á-siōng ōe hō͘ lâng kng-khì A-su̍t, chòe lé-mi̍h sàng hō͘ A-su̍t tāi-ông; Í-hoat-liân ōe siū lêng-jio̍k, Í-sek-lia̍t in-ūi pài ngó͘-siōng kiàn-siàu.

7Sat-má-lī-a ê ông ōe siau-sit, chhin-chhiūⁿ chúi-bīn ê chhâ-iù-á.

8A-bûn ê soaⁿ-thâu-tôaⁿ, Í-sek-lia̍t hoān-chōe ê só͘-chāi, ōe siū húi-bia̍t; hiah-ê chè-tôaⁿ ōe hō͘ chhì-phè kap chi̍t-lê khàm-móa; jîn-bîn ōe tùi tōa-soaⁿ kóng “Kā goán khàm--khí-lâi”, tùi sió-soaⁿ kóng “Kā goán teh--lo̍h-lâi”.

9Í-sek-lia̍t ah, lín tùi Ki-pí-a sū-kiāⁿ í-lâi kè-sio̍k teh hoān-chōe. Lín kè-sio̍k tek-chōe góa, siūⁿ-kóng tī Ki-pí-a kong-kek hoān-chōe ê lâng ê chiàn-cheng bōe lîm-kàu lín.

10Góa it-tēng ōe lâi hêng-hoa̍t chiah-ê hoān-chōe ê lâng; in hoān siang-têng ê chōe, lia̍t-kok ōe chū-chi̍p lâi kong-kek in.

11Í-hoat-liân sī hó-kà ê gû-bú, ài lún ngó͘-kok; góa chiong taⁿ kòa tī i súi koh ióng ê ām-kún. Góa beh hō͘ Í-hoat-liân thoa-chhia, hō͘ Iû-tāi lôe-chhân, hō͘ Ngá-kok pê-sang chhân-thô͘.

12Tio̍h ūi ka-kī khai-khún pha-hng ê tōe, chèng kong-gī, siu chû-ài. Hiān-chāi sī chhē-kiû Siōng Chú ê sî; I lâi ê sî, beh hō͘ kong-gī chhin-chhiūⁿ hō͘-chúi kàng-lo̍h hō͘ lín.

13Lín chèng siâ-ok, siu chōe-kò, chia̍h pe̍h-chha̍t kiat ê ké-chí. Lín óa-khò ka-kī ê khùi-la̍t, khò-sè lín ū chin chōe ióng-sū.

14Só͘-í, chiàn-loān ê hán-hoah ōe lîm-kàu lí ê jîn-bîn, lí só͘-ū ê pó-lúi ōe hō͘ lâng thiah-húi, chhin-chhiūⁿ A-su̍t -ông Sa-le̍k-bān tī chiàn-cheng ê sî thiah-húi Pek A-pí-le̍k; hit-sî lāu-bú kap in ê kiáⁿ-jî lóng ōe hō͘ lâng siak-sí.

15Pek-te̍k-lī -lâng ah, lín chōe-tāi-ok-ke̍k, ōe tú-tio̍h siâng-khoán ê chai-hō; thiⁿ chi̍t-ē kng, Í-sek-lia̍t -ông chiū ōe siū siau-bia̍t.

← Chapter 9 Jump to: Chapter 11 →