Hosea 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Í-sek-lia̍t -lâng ah, tio̍h kā lín ê hiaⁿ-tī kiò-chòe “góa ê chú-bîn”, kā lín ê chí-bē kiò-chòe “só͘ thiàⁿ-sioh--ê”.

2Khì kò lín lāu-bú, kap i lí-lūn. I kiám m̄-sī góa ê bó͘, góa kiám m̄-sī i ê ang? Kiò i tû-khì îm-loān ê bīn-iông, ín-iú-lâng ê heng-khám,

3chiah bián góa kā i thǹg-kng-kng, chhin-chhiūⁿ tú-á chhut-sì hit-ji̍t ê khoán-sit, chiah bián góa hō͘ i chhin-chhiūⁿ khòng-iá ta-sò ê tōe, chhùi-ta kàu sí.

4Góa bô beh thiàⁿ i ê kiáⁿ-jî, in-ūi in sī tùi îm-loān siⁿ--ê.

5In ê lāu-bú kiâⁿ îm-loān, chòe kiàn-siàu-sū siⁿ in; i kóng: Góa beh khì tè góa ê ài-jîn; góa ê iûⁿ-mn̂g, môa-pò͘, piáⁿ, chúi, iû kap só͘ lim--ê, lóng sī in hō͘ góa--ê.

6In-ūi án-ni, góa beh ēng chhì-á that i ê lō͘, chō chhiûⁿ hō͘ i chhē bô lō͘.

7I beh khì jip hiah-ê chêng-jîn, m̄-kú jip bōe tio̍h, beh chhē mā chhē bōe tio̍h. I chiū kóng, “Góa beh tò-khì chhē goân-lâi ê tiōng-hu, in-ūi góa chêng ê kéng-hóng pí hiān-chāi khah hó.”

8I m̄ chai i ê ngó͘-kok, sin-chiú, sin-iû, lóng sī góa hō͘ i--ê; i ho̍k-sāi Pa-le̍k ê kim kap gûn, mā-sī góa hō͘ i--ê.

9Só͘-í, siu-koah ê sî á-sī chhut sin-chiú ê sî, góa beh chiong góa ê ngó͘-kok kap sin-chiú kā the̍h tò-tńg, mā beh chiong góa hō͘ i jia-khàm seng-khu ê iûⁿ-mn̂g kap môa-pò͘ kā chhiúⁿ tò-tńg.

10Góa beh hō͘ i tī i ê chêng-jîn ê ba̍k-chiu chêng chhiah-sin-lō͘-thé tì-kàu kiàn-siàu; bô lâng ōe-tàng kiù i thoat-lī góa ê chhiú.

11Góa beh hō͘ i bōe-tàng koh ū iàn-lo̍k, bô koh ū chhoe-it, An-hioh-ji̍t, kap kî-tha ê choeh-ji̍t.

12Góa mā beh húi-hoāi i ê phû-tô-chhiū, bû-hoa-kó-chhiū, in-ūi i kóng chiah-ê sī i ê chêng-jîn hō͘ i ê pò-siúⁿ; góa beh hō͘ i ê ké-chí-hn̂g pha-hng, chhut-chāi iá-siù thún-ta̍h thun-chia̍h.

13I í-chêng sio-hiuⁿ ho̍k-sāi Pa-le̍k, ēng hī-kau kap ta̍k-chióng chong-sek-phín, chng-súi-súi khì tè i hiah-ê chêng-jîn, soah bōe-kì-tit góa, só͘-í góa beh kā i chhú-hoa̍t. Che sī Siōng Chú kóng--ê.

14Án-ni, góa beh chio i lâi-khì khòng-iá, khin-siaⁿ-sòe-seh kap i kóng-ōe.

15Tī hia góa beh chiong i ê phû-tô-hn̂g hêng i, koh kā “Chai-lān ” ê soaⁿ-kok pìⁿ-chòe “Ǹg-bāng” ê mn̂g; tī hia i ōe ìn-tap góa, chhin-chhiūⁿ i siàu-liân ê sî, chhin-chhiūⁿ i chhut Ai-ki̍p ê ji̍t.

16Siōng Chú kóng, “Tī hit-ji̍t lí beh chheng-ho͘ góa ‘goán ang’, bô koh chheng-ho͘ góa ‘goán thâu-ke ’.

17Góa bô beh hō͘ i koh kiû-kiò Pa-le̍k, beh hō͘ i bōe-kì-tit chit-ê miâ.

18“Tī hit-ji̍t, góa beh ūi-tio̍h góa ê chú-bîn kap chhân-iá ê tōng-bu̍t, khong-tiong ê pe-chiáu, í-ki̍p tōe-chiūⁿ ê thâng-thōa li̍p-iok; góa mā beh kòng-tn̄g tōe-bīn-chiūⁿ ê keng, to, kap só͘-ū ê bú-khì, hō͘ in thang an-jiân tó lo̍h-khì hioh-khùn.

19“Góa beh chhōa lí éng-oán chòe góa ê bó͘, ēng kong-gī, kong-pêng, chû-ài, lîn-bín chòe phèng-kim kā lí chhōa.

20Góa mā beh ēng tiong-si̍t chòe phèng-kim chhōa lí, lí chiū ōe chin-chiàⁿ bat Siōng Chú.”

21Siōng Chú kóng: Tī hit-ji̍t, góa beh ìn-tap góa chú-bîn ê kî-kiû, beh hō͘ thiⁿ lo̍h-hō͘, koàn-ak thó͘-tōe,

22hō͘ tōe chhut-sán ngó͘-kok, sin-chiú kap iû, ēng chiah-ê ìn-tap Iâ-su-lia̍t.

23Góa beh ūi-tio̍h góa ka-kī kā i chai-chèng tī chit-tè thó͘-tōe; góa beh thiàⁿ-sioh Lô Lō͘-hap-má, beh tùi Lô A-bí kóng “Lí sī góa ê chú-bîn”; in ōe ìn kóng “Lí sī goán ê Siōng-tè”.

← Chapter 1 Jump to: Chapter 3 →