Hosea 8

Chinese TTVR (現代台語譯本羅馬字版)

← Chapter 7 Jump to: Chapter 9 →

1Siōng Chú kóng: Tio̍h pûn sàu-kak hoat kéng-pò! Tùi-te̍k chhin-chhiūⁿ eng-chiáu chhiong--lo̍h-lâi, beh kong-kek Siōng Chú ê chhù, in-ūi góa ê chú-bîn phò-hoāi góa ê iok, ûi-pōe góa ê lu̍t-hoat.

2In tùi góa ai-kiò kóng, “Siōng-tè ah, goán Í-sek-lia̍t -lâng sêng-jīn lí sī goán ê Siōng-tè!”

3M̄-kú Í-sek-lia̍t kū-choa̍t liông-siān, só͘-í tùi-te̍k ōe tui-jip in.

4In siat-li̍p kun-ông, m̄-sī chiàu góa ê ì-sù; in siat-li̍p siú-léng, góa bô sêng-jīn. In ēng kim, ēng gûn chō ngó͘-siōng, kiat-kó ka-kī siū húi-bia̍t.

5Sat-má-lī-a -lâng, tio̍h khì-sak lín ê gû-á-siōng! Góa tùi lín hoat tōa siū-khì; lín tio̍h koh jōa kú chiah ōe hòng-khì ngó͘-siōng chông-pài?

6Ngó͘-siōng sī Í-sek-lia̍t ê sai-hū chù-chō--ê; in m̄-sī Siōng-tè. Sat-má-lī-a ê gû-á-siōng it-tēng ōe siū kòng-chhùi.

7In iā--ê sī hong, siu--ê sī kńg-lê-á-hong, bōe tōa-châng, bōe kiat-si̍t; nā ōe kiat-si̍t, mā ōe hō͘ gōa-cho̍k-lâng chia̍h-chia̍h--khì.

8Í-sek-lia̍t í-keng siū thun-bia̍t; hiān-chāi tī lia̍t-kok tiong chhin-chhiūⁿ bô lō͘-ēng ê khì-khū.

9Í-sek-lia̍t chhin-chhiūⁿ iá-lû sì-kòe cháu, cháu-khì A-su̍t; Í-hoat-liân chhut-bōe ka-kī hō͘ ài-jîn.

10In mā tī lia̍t-kok tiong chhut-bōe ài-chêng, góa beh kā in chi̍p óa--lâi, kā in hêng-hoa̍t; in liâm-piⁿ ōe tī A-su̍t tāi-ông ê ap-pek ē siū-khó͘.

11Í-hoat-liân ūi-tio̍h beh sio̍k-chōe, ta̍k só͘-chāi khí chè-tôaⁿ; chè-tôaⁿ jú chōe, hoān-chōe jú ke-thiⁿ.

12Góa ūi-tio̍h in siá chin chōe lu̍t-hoat, m̄-kú in khòaⁿ-chòe kap in lóng bô koan-hē.

13In hiàn-chè hō͘ góa, m̄-kú hiàn ê bah ka-kī chia̍h-liáu-liáu; góa Siōng Chú bô beh chiap-la̍p. Taⁿ, góa beh kā in ê chōe kì--teh, kā in hêng-hoa̍t; góa beh hō͘ in tò-tńg-khì Ai-ki̍p.

14Í-sek-lia̍t khí kiong-tiān, bōe-kì-tit in ê Chhòng-chō-chú; Iû-tāi mā khí chin chōe kian-kò͘ ê siâⁿ, góa beh kàng-hé sio in ê siâⁿ, sio-húi in ê pó-lúi.

← Chapter 7 Jump to: Chapter 9 →