Hosea 5

Chinese TTVR (現代台語譯本羅馬字版)

← Chapter 4 Jump to: Chapter 6 →

1Chè-si ah, tio̍h thiaⁿ! Í-sek-lia̍t chú-bîn, tio̍h chù-ì thiaⁿ! Ông-chhin ah, tio̍h chim-chiok thiaⁿ! Lín teh-beh siū sím-phòaⁿ, in-ūi lín tī Bí-su-pa chiâⁿ-chòe hāi-lâng ê oa̍h-tauh, tī Tha-po̍k-soaⁿ chiâⁿ-chòe tng lâng ê lô-bāng.

2Chiah-ê pōe-poān ê lâng tāi-khai-sat-kài, góa beh koán-kàu in lóng-chóng ê lâng.

3Í-hoat-liân ah, góa chin liáu-kái lí; Í-sek-lia̍t bōe-tàng tùi góa am-khàm. Taⁿ, Í-hoat-liân, lí kiâⁿ îm-loān, Í-sek-lia̍t kā ka-kī phah lâ-sâm.

4In ê só͘-kiâⁿ-só͘-chòe hō͘ in bōe-tàng kui-ǹg Siōng-tè; in-ūi in ê sim chhiong-móa îm-loān, oân-choân m̄ bat Siōng Chú.

5Í-sek-lia̍t ê kiau-ngō͘ chèng-bêng in ka-kī ū-chōe; Í-hoat-liân ōe in-ūi ka-kī ê chōe poa̍h-tó sit-pāi; Iû-tāi ōe kap in siâng-khoán sit-pāi.

6In beh chhōa gû-kûn iûⁿ-kûn khì chhē Siōng Chú, m̄-kú chhē bōe tio̍h, in-ūi Siōng Chú í-keng lī-khui in.

7In tùi Siōng Chú bô tiong-si̍t, kap pa̍t-lâng thau siⁿ-kiáⁿ; chhoe-it ê khèng-tián í-chêng, in kap in ê sán-gia̍p lóng ōe siū húi-hoāi.

8Tio̍h tī Ki-pí-a pûn sàu-kak, tī La-má pûn lat-pah, tī Pek A-bûn hoat-chhut kéng-pò. Piān-ngá-bín ah, tio̍h chù-ì lí ê āu-bīn!

9Hêng-hoa̍t ê ji̍t nā kàu, Í-hoat-liân ōe hong-hòe; góa beh tùi Í-sek-lia̍t ta̍k chi-cho̍k soan-kò, soan-kò chiong-lâi it-tēng ōe hoat-seng ê sū.

10Iû-tāi ê siú-léng kèng-jiân pà-chiàm jîn-bîn ê thó͘-tōe; góa beh chiong góa ê siū-khì chhin-chhiūⁿ tōa-chúi piàⁿ-lo̍h tī Iû-tāi.

11Í-hoat-liân kam-goān khì tè bô lō͘-ēng ê ngó͘-siōng; in it-tēng ōe siū sím-phòaⁿ, siū ap-pek thún-ta̍h.

12Góa beh chhin-chhiūⁿ chiù-thâng tùi-thāi Í-hoat-liân, mā beh hō͘ Iû-tāi nōa--khì.

13Í-hoat-liân khòaⁿ-tio̍h ka-kī ū pīⁿ, Iû-tāi khòaⁿ-tio̍h pún-sin ū siong; Í-hoat-liân chiū phài lâng khì kiû A-su̍t tāi-ông; m̄-kú i bōe-tàng i in ê pīⁿ, tī in ê siong.

14Góa beh chhin-chhiūⁿ sai tùi-thāi Í-hoat-liân, chhin-chhiūⁿ béng-sai tùi-thāi Iû-tāi; góa beh kā in thiah-chhùi, thoa-cháu; bô lâng ōe-tàng kiù in.

15Taⁿ góa beh tò-khì góa ê só͘-chāi, thèng-hāu in sêng-jīn ka-kī ê chōe, kî-kiû kìⁿ góa ê bīn; in tī kip-lān ê sî, ōe pek-chhiat chhē-kiû góa.

← Chapter 4 Jump to: Chapter 6 →