Hebrews 1

Zande

Jump to: Chapter 2 →

1Mbori nagumba pai bakuru yo fu aba ku ngba anebi ni dungu ngbatunga apai na ngba dungu gene apai,

2ko agumba pai fu rani ti digida agi arame re rogo Wiriko yo, gu ko ko aasia pa ahe dunduko fu ko, nga gu ko ko amangi zegino rogo ko yo;

3ono wa ko adu ni gu imarago nga ga gako taarimo, ki du ni ndikidi kpiako, ki nisongodi ahe dunduko ku ari ni gu pai nga gako tandu, fuo manga ko gu pai nga girisa ingaapai, ko ki sungu ku kumbabe Bahe du ari yo.

4Ko ki ngba susi amaraika, mbiko dia ko wene rimo susi gayo.

5Bambiko gini maraika i agumba ha fu ni ni gu rago ki ya, “Mo nga Wire, vungu mi ro ni kina gi uru re”? Na berewe, “Mi adú fu ko ni Ba, ko ki du fere ni Wiri”?

6Na berewe ho ko akedi bambata wiriko ni ku zegino ko aya, “Agu amaraika nga ga Mbori yo, i írisi ko dunduko.”

7Ko ki ya tipa amaraika, “Ko nasa gako amaraika i du ni ayuge, na gako amoyambu i du wa mirã we.”

8Ono ko aya tipa Wiriko, “Ako Mbori, ga mbatabakindo si anyé anye kindi, gu ngbondo rurupai si nga gu ngbondo nga ga ga ngbi.

9Mo akpi nyemu rurupai, ki nisogo irairapai; si du Mbori nga gamo Mbori ambedi ro ti ni ni gu nzeme nga ga wasa susi akuaro.”

10Berewe, “Mo du Gbia, namoi mburu kpotosende ho rago aenge ni, angbangbaturũ nga gu mangapai nga ga bero,

11si agó ago dunduko, ono nye mo anye kindi, si akpátaka dunduko wa remu nakpataka,

12mo amína ha amina wa gbanga remu, wa kina remu, si ki du akia. Ono mo a wa mo adu mbata, digida garãro ti ni te.”

13Ono gini maraika ko aya fu ni ni gu rago, “Mo súngu pati kumbabere, daho mi ka sa avuraro ni ni gbada nduro”?

14I nga agu atoro du ni amoyambu, du ni kedikedi yo ka manga pa agu yo nikadia ũkumbo bata te?

Jump to: Chapter 2 →

Recommended Reading

Commentary Hebrews Commentaries → Devotional Hebrews Devotional Guide → Get This Bible Zande Study Bible →