Hebrews 3

Zande

← Chapter 2 Jump to: Chapter 4 →

1Si du, ziazia awirinami, adi gu yambahe nga ga ngbangbaturũ, oni mákia pa gu Mokedi nga Gbiamotumo nga ga gaani kusapai, nga Yesu;

2nadu ni irarengo fu gu ko nasia ko, a wa Mose adu rogo gako kporo dunduko.

3Bambiko i aya ti ko ko rengbe na taarimo susi Mose, wa gu boro nadua bambu du na taarimo susi bambu.

4Bambiko abambu dunduko aboro du nadua ha; ono gu ko nadua ahe dunduko nga Mbori.

5Were Mose adu ni irarengo rogo gako kporo dunduko ni moyambu, ni dezire agu apai i ka gumba paha giza.

6Ono Kristo ni wiri Mbori, nga ri gako kporo, nga irarengo. Gako kporo nga ani, ka ani ka kuti gaani era nyanyaki dati digida ha, na gaani maabangirise tipa gu pai dũ ku mbata yo.

7Si du, a wa Ziazia Toro nagumba ha, “Si ngia oni kpi nyemu gia fugoko areme,

8ka oni nyákasi nga kpotoroni yo, wa si adu ti gu rago i asa mungu kuti Mbori na wa si adu rago asada ngbakungba yo, ya,

9yo abaroni aasadi re ni ki kparia re, ka i avura bi gimi mangaapai garãha ki du 40.

10Si du mi arungo ti ni be gi rika aboro re, ki ya, ‘I nainga kpotoyo yo dedede; ono i aina nga sinore te.’

11Wa mi azunga he ni gi zinga ya, ‘I aríma nga ku rogo gi ongoda yo te.’ ”

12Oni bánda tironi, awirina, rago ka da gu gbegberẽ kpoto yo nga ga basapai ki du ti gu ni dagba roni, ni ki guari ti unga Mbori ku sa yo.

13Ono oni rugu tironi dagba roni na uru na uru, wa ya yo ti ni a “Areme;” ngbadu gu ni dagba roni ka nyaka be gu nangahe nga ga ingapai.

14Bambiko ani nga adi Kristo, ka ani ka kuti mburu gaani era nyanyaki dati digida ha;

15wa ya yo, “Areme si ngia oni agia fugoko, ka oni nyákasi nga kpotoroni yo ya, wa si adu ti gu rago i asa mungu kuti Mbori.”

16Bambiko ada du nasa mungu, ho i agi fugo Mbori ni? A nga kina agu aboro dunduko nakuru Ezipeta yo mbiko Mose te?

17Na ada ko azingi fu yo agarã ki du 40? A nga kina agu yo naingi pai, akangbayo ki nye ngbakungba yo, te?

18Na ada ko azunga he fu yo ho ko aya ni, i aríma nga ku rogo gako ongoda yo te, a nga kina agu yo nabasa pai, te?

19Ani ki bi he ya i arengba nga na rima te mbiko zanga yo idapase.

← Chapter 2 Jump to: Chapter 4 →