Hebrews 9

Zande

← Chapter 8 Jump to: Chapter 10 →

1Were gu bambata ndika a tigaha nadu na arugute nga ga Mbori mangaapai, na gaha ziazia ba, nga ziazia ba nga ga gi zegino re.

2Bambiko yo bamburoko dungurati adu ni ni mbakadimbakadi he, nga bambata ha, nga gu baduawe adu rogo, na mbisa, na kpokuta yugopai; nga gu i niya ti ni ziazia ba.

3Fuo gu dadidadi remu du ni ue he, gu bamburoko dungurati i niya ti ni, Gu ba du ni ziazia ha susi;

4du na bamotumo ni dahabu tipa zo fuõngua, na sanduki kidohe i ambakadi kpotoho kirikiri dunduko ni dahabu, akoro dahabu ki du vuru he yo nadu na manu rogo ho, na gu ga Arona ngbondo nafuna, na gu keke ambia nga ga ndika;

5akeruba nga ga taarimo yo ri he yo nidadi basunga motumo; ka ani gumba nga pa agi apai re dunduko ni ba sa sa ki nyasi he awere te.

6Were wa du agi apai re ni mbakadimbakadi he, aboromotumo narima ku rogo bambata bamburoko dungurati dedede, nimangigahaapai.

7Onokinagbiamotumo anirimi ku rogo ue he, kina bara sa rogo garã sa, ka ko azanga nga kure ya, nga gu ko anitumo na ni tipa tiko, na tipa ingaapai nga ga aboro.

8Ziazia Toro ki yugu gere, nga i ata yugo nga gene ku rogo ziazia ba yo te, wa du bambata bamburoko dungurati ku ho kindi.

9Gi pai ki du ni kpia pai re tipa gu rago du awere. Wa du he ya i natumo ni gamaahe na ni aũmotumo nga gu arengba nga na sa gu boro nairisi Mbori ni ziazia ni rogo sangba kpotoni yo ya,

10wa du he ya si nga kina ga borose arugute nga pa ariahe, na mbirimbirihe na ngbatunga zunda ahe, i amoi he ku ri yo daho rago mbakada apai ka da ni.

11Ono Kristo aye ki du ni gbiamotumo tipa gu wene apai nikaye, mbiko gu bamburoko dungurati ngba angba, ni ziazia ha ti gu kuru he, nga gu i amanga nga ha ni be ya, si wa ka i ya, ni ga gi zegino te re.

12Kristo arima nga mbiko kure ameme na awiri abagara te, ono mbiko kureko, ko arimi ku rogo ziazia ba bara sa kindi, ki ima bi nyenye tumori.

13Bambiko si ngia kure ameme na abaabagara, na kuke wiri bagara tipa migida agu yo adu na biriko na ni, si ki ziasi yo tipa gu gira nga ga boroboro,

14kure Kristo kii nga ti gere susi te, nga gu ko natumo ni tiko fu Mbori rogo nyenye Toro yo, ka sirõ adu nga ti ko ya, tipa girisa sangba kpotoroni yo be kpikpi mangimangi apai, ka manga pa unga Mbori.

15Mbiko gi pai re ko ki du ni azarõ nga ga vovo ndika, ya wa kpio aima du tipa tumo gu tiandika nadu tii bambata ndika, agu yo i ayambu yo ki rengbe na dia gu kidohe nga ga nyenye ũkumbo ku gume.

16Bambiko ho du ndika ni, yo kpio gu boro namangi he ka du ni a.

17Bambiko ima ndika amanga fuo kpio. Imaha amanga nga ho du gu boro ni narũ he ni ungani te.

18Si du tie i natona nga bambata ndika tigaha ti ni zanga kure ya.

19Bambiko ho Mose aima gumba arugute ni dunduko fu aboro dunduko wa du pa arugute, ko ki di kure wiri abagara na ameme, gbia kuti ime na ngungungu mange kandoro na usopo, ki migidi kitabu na ni tigaha, na aboro dunduko,

20niya, “Gere nga gu kure nga ga ndika nga gu Mbori arugu roni tipa manga ha.”

21Ku ri gere, ko amigidi bamburoko dungurati na gu kure re kina a wo na gaha aũsunge dunduko.

22I nagirisa ahe ni dungu he ni kure, wa du pa rugute, ka i auka nga kure ya, ka hepai adu nga te.

23Si du rengbe he ti ni ya agu ahe nawiri gu du ngbangbaturũ yo, i girisi he ni agi ahe re; ono agu ahe du ni ndikidi ga ngbangbaturũ he, si i ka girisa ha na wene amotumo susi gere.

24Bambiko Kristo arima nga ku rogo gu ziazia ba i amangi he ni be te, nga gu nawira ndikidi he; ono ko arimi kina boro ku ngbangbaturũ yo, ka du ku bangiri Mbori awere tipa rani.

25Pai a sa, nga ko atumo nga ni tiko ti dungu rago te; wa gbiamotumo narima ku rogo ziazia ba na agarã na gu kure angia nga gako ya.

26Ka si adu wo, ka ko ahi pai ahi ti dungu rago ki tona ha ti kina maa mburu zegino. Ono awere bara sa ti yangara arago ko i ayugo ko ka dia ingaapai ku sa yo mbiko tumo ni tiko.

27Wa du he ya i aringbisi pai fu aboro i kpi bara sa, fuo gere sapangbanga kidu;

28kina wo a du he tipa Kristo natumo ni tiko bara sa, ka dia gu ingaapai nga ga dungu aboro ku sa yo, ko ayúgo tiko berewe ni ue he, sa bata, fu agu yo nasunguda ko, ka ingapai adú nga ho ya.

← Chapter 8 Jump to: Chapter 10 →