Hebrews 11

Zande

← Chapter 10 Jump to: Chapter 12 →

1Were idapase nga ndikidi he, du aboro na maabangirise mbiko ho, nga wisiga pa agu ahe i abi nga ni bangirise ya.

2Mbiko idapase agu abaakumba naadu bakuru vo angba bangiri Mbori.

3Mbiko idapase ani ini he ya azegino adu ni mangimangi he be gu pai nga ga Mbori, si du tie, agu ahe i nabi, i amanga nga ha rogo agu ahe du ni yuguyugu he te.

4Mbiko idapase Ebere atumo fu Mbori ni wene motumo ngba susi gu nangia ga Kaina, rogo ho i ki du ni dezire fu ko ya ruru boro nangia ko, Mbori ki du ni dezire fu ko mbiko gako gamuniahe. Were rogo ho wa ko avura kpi ko nagumba pai kindi.

5Mbiko idapase Mbori adi Enoka ya ka ko bi nga kpio ya; ka i abi nga ko ya, mbiko Mbori adi ko, bambiko mbata fu dia ko dezire aima du tipa ko ya gako pai angba angba bangiri Mbori.

6Bambiko zanga idapase ga boro pai arengba nga na ngba bangiri Mbori te, bambiko gu ni naye koyo du Mbori ni gani pai nga ida ya Mbori kina ho, ko nafu mosoro fu agu yo nagbata ko.

7Mbiko idapase Noa, ho Mbori ayugu pa agu apai ni fu ko i ata bi nga ya, ko ki gunde ti Mbori, ki mbakadi kurungba ki batasi kpuko; rogo gi pai re ko akiti ngbanga zegino, gu rurupai du mbiko idapase ki du ni gako.

8Mbiko idapase Abarayama agi sangba Mbori ho i ayambu ko ni, ko ndu ku rogo gu ba ko ka dia ha ni gako; ko ki guari ka ndu, ka ko aina nga ho ko andu ku ho ni ya.

9Mbiko idapase ko amoi kporo rogo gu ringara nga ga kidohe, wa rogo gu ringara nangia nga gako ya, ki nisungu rogo abamburoko na Yisaka na Yakoba a, nangia adikumbo gu kidohe wa sa na ko,

10mbiko ko angere tipa gu bakporo du na nyanyaki mburuhe ti ni, du baduaha nga Mbori ni bamangihe a.

11Mbiko idapase Sara adi ome tigari rengbe na du na mobara ho garãri asusi ni gbe, bambiko ri aidi pa gu ko nakido he, ya ko asa nga gako pai te.

12Mbiko gere rogo boro sa, nga gu boro adu wa kpikpi boro, dungu aboro ki kuru ki nge wa akerekuru ngbangbaturũ yo, na wa ngume du pangba baime yo, ka i arengba nga na geda yo ya.

13Agi yo re nakpi rogo idapase, ka i adia nga akidohe ya, ono i abi he mbata yo ki nipoi kuti ni tuturu, ki nikusi he ya aboro kura ringara nangia yo, ni tata aboro ri gi zegino re.

14Bambiko agu aboro nagumba pai wa gere i nayugo ho ya i nagbata ringara nga ndikidi gayo.

15Si ngia pa gu ringara i akuru rogo ho naakii bangiriyo ni rengo, ka gene karaga tiyo koyo adu ni zaza ha fu yo.

16Ono awere i nakpi nyemu ringara ni wene he susi gere, nga gu nga ringara ngbangbaturũ: wa du he were tie zee amanga nga Mbori tipa yo, i ya ti ko gayo Mbori nga ko, te, bambiko ko ambakadi bakporo tipa yo.

17Mbiko idapase Abarayama atumo ni Yisaka, ho i aasadi ko ni, ii, gu ko nadi akidohe ni ngbarago ti ko, kina ko natumo ni bangisa wiriko;

18nga kina gu ko i aya fu ko wẽ, “Rogo Yisaka yo i ka yamba ngbatungaro ni.”

19Ko ki idi he ya Mbori rengbe na zingisa boro, zavura kpio vurũ a; kina yo ko adi ko ni berewe ni sanza.

20Mbiko idapase Yisaka afu maku fu aYakoba na Esau, tipa agu apai nikadu ku mbata yo.

21Mbiko idapase Yakoba, ho ko aye ka kpi ni, ko ki fu maku fu awiri Yosefa ni ba sa sa; ko ata irisa Mbori, nisongodi tiko kuti gako tepe.

22Mbiko idapase Yosefa, ho gako yangara rame ambeda ni, ko agumba pa gu gate nga ga awiri aYisaraere, ki nirugu yo tipa kangbako.

23Mbiko idapase Mose, ho i avungu ko ni, avunguko aigi ko tipa diwi biata, bambiko i abi ko ni wene gude; ka i agunde nga be ga bakindo rugute ya.

24Mbiko idapase Mose, ho ko asono ni ki du ni kumba, ko aida nga i niya ti ko wiri gu de nga wiri Faro te.

25Ko asia kina gu pai nga i mangi ko gbegberẽ dagba ga Mbori aboro, susi gu pai nga ngi tipa rago ngbutuko rogo gu ngbarago nga ga ingaapai;

26ki niringbisi gu gbarasarimo nga ga Kristo ni bakere ũkumuko susi agu aũkumuko nangia ga Ezipeta, bambiko ko angere tipa gu mosoro i ka fu he.

27Mbiko idapase ko ambu Ezipeta, ka ko agunde nga be ga bakindo zinga ya; bambiko ko aru nyanyaki, nibi gu ko ka bangirise abi nga ko ya.

28Mbiko idapase ko amangi pumbo susiri, na pa migida kure, ya ka baimi bambata avungu zadi nga yo ya.

29Mbiko idapase i andu rogo Zamba Baime wa kina ugu sende, nga gu aEzipeto aasadi ka manga ha i ki kpiki akpika ime yo.

30Mbiko idapase ngapa bakporo Yereo ati, fuo ke yo pati he kirikiri tipa rame saba.

31Mbiko idapase Raba nangia degbua ri akpi nga na agu yo nangia abasapai te, wa ri arogo abamoirago ku gume ni zereda.

32Were gini kura pai ka mi gumba ha berewe? bambiko rago arengba nga mi gumba pa Gidona, na Baraka, na Samusona, a Yepeta te; na pa aDawidi na Samuere na anebi.

33I nangia agu yo naso vura na angbi mbiko idapase, ki nimangi ruruapai, ki nirogo akidohe, ki nikisi ngba abahu,

34ki nibisi gu ome nga ga we, ki nibati be rindi abasape, wa i adu ni rurungbura yo i ki sa yo ni nyanyaki yo, i ki du tie nyanyaki rogo so vura, ki nidandi rikavura nga ga auro.

35Ade arogo gayo akangba mbiko zingabekpio; i ataki agu yo sa kina kpio, ka i aida nga ka bata be he ya; bambiko i akpi nyemu ka dia wene zingabekpio susi gure.

36Agu yo ahi pai wa aboro asawia yo ki nitaki yo, ii, be voda yo a, na be bafa yo ku bambukisa yo.

37I asopo yo na ambia, i ayepe rogo yo, i aasadi yo, i aimi yo na basape. I anata na kpoto akandoro, na kpoto ameme. I ki du ni payapaya yo, ni rungorungo yo, i ki nimangi yo gbegberẽ.

38I nangia agu aboro, aboro zegino arengba nga na yo ya. I ki nita ata rogo angbakungba na auru abaagangara na rogo asimbia, na rogo asima nga ga sende.

39Were agi yo re dunduko, wa i adu na adezire tipa yo mbiko gayo idapase, i aroga nga kidohe te,

40bambiko Mbori ambakadi kura pai ni wene he susi tipa rani, ya kparaka yo ti rani ka i asa nga yo ni ziazia yo ya.

← Chapter 10 Jump to: Chapter 12 →