Hebrews 8

Zande

← Chapter 7 Jump to: Chapter 9 →

1Awere rogo agu apai ani nagumba gere nga bakumba ha: ani du na gbiamotumo wa gere, nga gu ko sungu pati kumbabe mbatabakindo nga ga Bahe du rogo angbangbaturũ yo,

2nga moyambu ziazia rago, ki du ni moyambu ndikidi bamburoko dungurati, nga gu boro adua nga ha ya, ono Gbia nadua ha.

3Bambiko agbiamotumo dunduko i namaa yo tipa tumo na gamaahe na aũmotumo. Wa du wo du he gi gbiamotumo ka du na he be ko a re ka tumo na ni.

4Awere ka ko du auru kpotosende, ka ko adu nga ni boromotumo wa sa ya, bambiko agu yo kina ho natumo ni agamahe wa du pa rugute. I namanga pa kpia agu ahe nga ga ngbangbaturũ na kirimaha,

5kina wo Mbori arugu Mose, ho ko ambedi ni ka manga bamburoko dungurati; mbiko Mbori aya, “Mo bi he, ya mo mangi ahe dunduko kuti gu kpiahe i ayugu he foro ri bagangara yo.”

6Ono awere Yesu di sunge mangapase ni wene he susi gu, kina a wa du ko ni azarõ gu ndika du ni wene he susi gu, nga gu i amoi he ri agu akidohe du ni wene he susi gu.

7Bambiko ka gu bambata ndika re adu nga na kpakpa pai rogo yo ya, ka i agbata nga ba tipa ue he te.

8Bambiko ko abi kpakpa pai rogo yo, ki ya, “Ya Yekova, mo bi, rago nikaye, ho mi ka rú vovo ndika ni fu ngbatunga aYisaraere, na ngbatunga aYudo;

9si adu nga wa gu ndika mi arú he fu abayo ni gu rago mi azi yo ti beyo ki ngbe fu yo ku mbata yo, i kuru ringara Ezipeta yo te; bambiko i anye nga rogo gi ndika yo te, ya Yekova, mi angera nga koyo du yo ni te.

10Bambiko gi nga gu ndika re mi ka rú he re fu ngbatunga aYisaraere ya Yekova; fuo gu rago re, mi amaa gimi arugute ku rogo gayo aberã, mi ki ke he ngbaduyo yo a. Mi ki du fu yo ni Mbori, i ki du fere ni aboro.

11Ka i ayúgo nga pai fu akurayo na fu awirinayo ki ya, ‘Mo ini Yekova,’ wa sa ya, bambiko aboro aina re aina dunduko, tona ti gu umba ni ki da ti bakumba yo.

12Bambiko mi aina pai fu yo tipa gayo irairaapai, ka mi atingida nga pa gayo ingaapai berewe ya.”

13Rogo gu ya ko ti ni, vovo ndika, ko asa bambata ha ni kuru he. Ono gu he nikadu ni kuru he ki sa tihe ni gbinza ha, si mbedi ka gbandaka ku sa yo.

← Chapter 7 Jump to: Chapter 9 →