John 10

Zande

← Chapter 9 Jump to: Chapter 11 →

1“Mi nagumba ha fu roni, ni rengo, ni rengo, gu ni ka rima nga ti ngbadimo ku rogo ndugu akandoro yo ya, biti ho akia, ni nga iradĩ nga batuka.

2Ono gu ni ka rimi ti ngbadimo ni nga babanda akandoro.

3Boro pangbadimo niuru he fu ni; akandoro ki nigi fugoni. Ni ki niyambu gani akandoro ti rimora, ki ngbe fu ra mbata yo ku zegi yo.

4Ho ni nisa gani ra ni mbata yo dũ, ni ki nindu mbata yo fu ra, akandoro ki nipeke ni; bambiko ami ini fugoni.

5Ami napeka nga kungba boro te, ami nioro be ni; bambiko ami aina nga fugo kungba aboro te.”

6Gi sanza Yesu agumba fu yo re; ono i aruga nga tiyo na agu apai ko agumba fu yo te.

7Yesu ki nimo ka ya fu yo, “Mi nagumba ha fu roni, ni rengo, ni rengo, mi nga ngbadimo tipa akandoro.

8Agu yo dunduko naye mbata fere i nangia airadĩ nga abatuka; akandoro agia nga pa yo te.

9Mi nga ngbadimo; ka boro rimi mbiko re, ni bati abata, ki nita rima koyo nikuru yo, nibi banambu.

10Iradĩ naye nga gbua te, ni niye ka dĩ kina ra, na ka imo ra, na ka gbarasa ra. Mi aye ami du ni ungara, ungara ki du na ome rengbe arengba

11Mi nga wene babanda akandoro. Wene babanda akandoro nabaga kpioni tipa akandoro.

12Gu ni nga kungba boro, angia nga babanda akandoro ya, adu nga akandoro ni gani ra ya, ni bi waru u niye, ni ki he akandoro, ki gbidi, waru ki zi ra ki gbataka ra agbataka.

13Ni nigbidi bambiko ni nga kungba boro, pa akandoro adu nga bangirini a te.

14Mi nga wene babanda akandoro; mi ini gimi ra, ami ki ini re a,

15wa ini Buba re, mi ki ini Buba a. Mi nabaga kpiore tipa akandoro.

16Gu kura akandoro du be re, adu nga rogo gi ndugu re ya; mi ayé aye na ami a, ami agía fugore agia; rimbasara adú adu sa, babanda akandoro ki du sa.

17Buba nakpi nyemu re, bambiko mi nazoga ungare, ka dia ha berewe.

18A nga boro sa ka di he be re te, kina mi nazoga ha ni tire. Mi rengbe na zoga ha, mi rengbe na dia ha berewe a. Gi rugute re mi adi he be Buba.”

19AYudo ki kparaka akparaka dagba yo berewe bambiko agi apai re.

20Agu yo ki ya ni dungu yo, “Daimona ti ko, iranzanga nga ko, tipagine oni agia pako ti ni?”

21Akura yo ki ya, “Agi apai re si adu nga ti gu boro du na daimona ti ni te. Ka daimona hasi bangiri iravurari?”

22Rago pumbo Kpara Yekaru nadu Yerusarema yo; ragozere nadu.

23Yesu ki nita yekaru yo rogo ga Soromo gbanga ngbadimo.

24AYudo ki nimo ka ye ka vo gbu pati ko, ki ya fu ko. “Rame wãi mo nimbusi rani na pa ro? Si ngia Kristo nga mo gúmba ha fu rani nzunzu.”

25Yesu ki karaga ha fu yo ki ya, “Mi agumba ha fu roni, ka oni aida nga pa re ya. Agu apai mi amanga ni rimo Buba, si nga dezirere.

26Gimi akandoro nga oni te, si du oni aida nga pa re ti ni ya.

27Gimi akandoro nagia fugore, mi ini ra, ami ki nipeke re.

28Mi nafu nyenye unga fu ra; ami akpíka nga berewe te, a nga boro sa ka tuka ra be re te.

29Buba nafu ra fere, ko nga babe ti aboro dũ; a nga boro sa ka tuka ra be Buba te.

30Ani na Buba sa.”

31AYudo ki rogo ambia berewe ka zumuda ko na ni.

32Yesu ki karaga ha fu yo ki ya, “Dungu wene apai yugu mi fu roni be Buba; agu apai re gini gu oni azumuda re ti ni?”

33AYudo ki karaga ha fu ko ki ya, “Ani azumuda nga ro tipa wene pai te, kina gberãngba yo; na bambiko wa du mo ni kina boro, mo ki sa tiro ni Mbori.”

34Yesu ki karaga ha fu yo ki ya, “A nga si ni keke he rogo gaoni rugute yo ya, ‘Mi aya, ambori nga oni’ te?

35Ka ko aya ti agu yo ga Mbori pai aye fu yo, ambori bambiko ka Ziazia Kekeapai asa nga tihe te,

36oni ya ti gu ko Bako akpara ko ki kedi ko ku zegino, ‘Mo nagberã ngbaro yo;’ bambiko mi aya, ‘Wiri Mbori nga mi?’

37Si ngia mi amanga nga agu apai nga ga Buba te, ka oni idi nga pa re ya.

38Ono ka mi amanga ha amanga, oni avura ida nga pa re ya, oni idi kina pa mangaapai; ya oni ini he ki rugu tironi aruga na ni ya Buba rogo re yo, mi ki du rogo Buba yo.”

39I ki nikpi nyemu ka zia ko berewe; ono ko ki birikpo be yo.

40Ko ki ndu ku mbiti Yaradene yo berewe ku rogo gu ba Yoane anabapatizi rogo ni bambata ha; ko ki nye yo.

41Dungu aboro ki ye koyo du ko ni; i ki ya, “Yoane amanga nga gu pai i aina pai ti ni wa sa te; ono agu apai Yoane agumba tipa gi kumba re si adu ni rengo.”

42Dungu aboro ki idi pa ko yo.

← Chapter 9 Jump to: Chapter 11 →