John 2

Zande

← Chapter 1 Jump to: Chapter 3 →

1Rame ki du ue diade ki du Kana yo Gariraya yo; na Yesu adu kina yo.

2I ki yambu Yesu, na gako abawiriki a, ku pati pa diade.

3Ho imekakue anyasi ni, na Yesu ki ya fu ko, “Imekakue be yo te.”

4Yesu ki ya fu ri, “Na, sa gamo na ni? Ragore ata da nga te.”

5Nako ki ya fu amoyambu, “Gu pai ko agúmba fu roni oni mángi kina ha.”

6Were runge mbia nadu ho sita ni sino aYudo sa girisa tiyo, rogo yo ni ba sa sa si adu wa ka aritere du 80 watadu 120.

7Yesu ki ya fu yo, “Oni hihisi arunge ni ime.” I ki hihisi he si ki da ti ngbaha.

8Ko ki ya fu yo, “Oni tú he awere, ki ndu na ni koyo du gbia pumbo ni.” I ki ndu na ni.

9Ho gbia pumbo aia ime ni, nga gu i asa ha ni imekakue, ka ko aina nga ho si aye ni ya (kina agu amoyambu natu ime i naini he), gbia pumbo ki yambu gu kumba nadi de,

10ki ya fu ko, “Boro nikusi wene imekakue mbata; aboro mbiri he wenengãi gbe, ni nikakusa gu tie angba nga ya. Mo ka kuti wene imekakue ku awere.”

11Tonatona gu ga Yesu pai i aina pai ti ni nga gu ko amangi Kana yo Gariraya yo, si ki yugu gako taarimo, gako abawiriki ki idi pa ko.

12Fuo gere ko ki ndu ku Kaparanauma yo, ko na nako, na awirinako, na gako abawiriki: i araka nga koyo gbe te.

13Ga aYudo pumbo susiri ambeda, Yesu ki ndu ku Yerusarema yo.

14Ko ki bi agu yo nanababaga abaabagara na akandoro na ambipo, na abaundaamarã i sungu yekaru yo.

15Ko ki poi gire ni kpudu ka ta yo na ni, ki bafu yo dunduko ku zegi yo tii yekaru yo, akandoro na abaabagara a. Ko ki ukaga ga abaundaamarã amarã, ki vavagadi gayo ambisa.

16Ko ki ya fu agu yo nanababaga ambipo, “Oni rogo agi ahe re erẽ; ka oni sá nga ga Buba bambu ni bambu bagaahe ya.”

17Gako abawiriki ki tingidi he ya si adu ni keke he ya, “Nyemu ga bambu arika re arika.”

18AYudo ki nimo ka karaga ha fu ko ki ya, “Gini gu pai i aina pai ti ni mo ayugo fu rani, wa mo amanga agi apai re?”

19Yesu ki karaga ha fu yo ki ya, “Oni gbárasi gi yekaru re, rame ki du ue mi ki dua ha berewe.”

20AYudo ki nimo ka ya, “Garã adu 46 i nidua gi yekaru re, mo nikadua ha rame he ki du ue?”

21Ono ko agumba pa gu yekaru nga boroko.

22Ho ko azingi ni be kpio dagba akangba, gako abawiriki ki tingidi he ya si ko agumba re; i ki idi pa Ziazia Kekeapai, na gu pai Yesu agumba.

23Were ho ko adu ni Yerusarema yo pati pumbo susiri, rago pumbo, dungu aboro ki idi pa rimoko, wa i abi gu gako apai i aina pai ti ni ko amanga.

24Ono Yesu afu nga tiko fu yo te, bambiko ko aini aboro dunduko,

25ka zingo boro amanga nga ko a ni du ni dezire boro ya; bambiko ko aini gu pai aina nadu kpotoboro yo ni tiko.

← Chapter 1 Jump to: Chapter 3 →