John 13

Zande

← Chapter 12 Jump to: Chapter 14 →

1Were mbata rago pumbo susiri nikada, Yesu ki niini ya ragoko da ko guari rogo gi zegino re ka ga koyo du Bako ni, ko nakpi nyemu gu gako aboro akpi nadu zegino, ko anakpi nyemu yo akpi kindi dati yangara rago.

2Wa i ari gu riahe nga ga yuru, bakitingbanga naima duaga kpoto Yuda Keriota yo, nga wiri Simona, ko kusi ko,

3Yesu ki niini ya Bako afu ahe ku beko dunduko, ko aye yo du Mbori ni, ko nandu koyo du Mbori ni a.

4Ko ki guari pati gu riahe nga ga yuru, ki di gako remu ku sa yo; ki di kitambara, ki ba ha ti ko.

5Ko ki uka ime ku akoro gira yo tie, ki tona zunda kpendu abawiriki, niwege he ni gu kitambara ko aba ha ti ko.

6Ko ki nimo ka da ti Simona Petero. Simona ki ya fu ko, “Gbia, mo nazunda kpendure azunda?”

7Yesu ki karaga ha fu ko ki ya, “Gu pai mi amanga mo aina nga ha awetere; mo arúga tiro na ni giza.”

8Petero ki ya fu ko, “Mo azunda nga kpendure wa sa te.” Yesu ki karaga ha ki ya fu ko, “Ka mi azunda nga ro ya, mo adu nga ni dikumbo na mi te.”

9Simona Petero ki ya fu ko, “Gbia, kina kpendure sa te, bere a na rire.”

10Yesu ki ya fu ko, “Gu boro zundu tini zingo zunda ti ni te, kina zunda kpenduni sa, ni ki giri agira dunduko; giri oni agira, ono dunduko te.”

11Bambiko ko aini gu ko aina naye ka kusa ko; si du ko aya ti ni, “Oni gigiri dunduko te.”

12Ho ko azundu kpenduyo ni, ki di gako remu, ki sungu berewe, ko ki ya fu yo, “Oni ini gu pai mangi mi fu roni?

13Oni niya ti re, Bayugupai, Gbia; oni nagumba ha nzunzu; bambiko wo du mi.

14Wa du mi tie, ni Gbia ni Bayugupai, zundu kpenduroni, oni ka zunda kpendu akuaroni a.

15Bambiko mi yugu pai fu roni, oni nimangi wa mangi mi fu roni.

16Mi nagumba ha fu roni, ni rengo, ni rengo, moyambu nakia nga susi bairani te; na gu ni i akedi ni ni akia nga susi gu ni nakedi ni te.

17Ka oni ini agi apai re, rago ngba angba ti roni ka oni amanga ha.

18Mi agumba nga ha tipa roni dunduko te; mi ini agu yo aina mi asia yo; gu Ziazia Kekeapai da ti rengo naya; ‘Gu ni nari gi riahe ni tumba gidoni sare.’

19Mi nagumba ha fu roni wa du rago re mbata si nikada, ya, ho si ka da ni, oni ki idi pa re aida ya mi nga ko.

20Mi nagumba ha fu roni, ni rengo, ni rengo, gu ni ka di gu ni ku gume kedi mi ni ni di re ku gume; gu ni ka di re ku gume ni di gu ko ku gume nakedi re.”

21Ho Yesu agumba ha ni were, ko ki nirungo arungo toroko yo, ko ki ya ni dezire, “Mi nagumba ha fu roni, ni rengo, ni rengo, gu ni dagba roni yo sa nikakusa re.”

22Abawiriki ki ningereke dagba yo, ka i aruga nga tiyo na gu ni ko agumba ha kuti ni ya.

23Gu ga Yesu bawiriki adu sa namegedi kuti ngbaduko pati mbisa, gu ko Yesu anakpi nyemu ko.

24Simona Petero ki nimo ka baya ko, ki ya fu ko, “Mo gúmba nga pa gu ni fu rani ko agumba ha kuti ni.”

25Ko ki megedi amegeda, kina ku ho, ti ngbadu Yesu ki ya fu ko, “Gbia, da du?”

26Yesu ki nimo ka karaga ha ki ya, “Ni, mi anogoda he na wiri bakinde, ki fu he fu ni.” Ho ko anogodi, he ni na wiri bakinde, ko ki di he ki fu he fu Yuda, nga wiri Simona Keriota.

27Fuo wiri bakinde, Satana ki duaga kpoto Yuda yo tie. Yesu ki nimo ka ya fu ko, “Gu pai mo amánga mo mángi he ni ipo.”

28Were a nga boro sa nadu pati mbisa naini gu pai ko agumba gi ti ni fu ko te re.

29Bambiko agu yo aya ti gu, wa du mangu be Yuda, Yesu aya fu ko, “Mo ngbéke agu ahe zingo ho amanga rani sa pumbo”; na, ko fu he fu rungorungo aboro.

30Ko ki kuru akura ni ba sa ko nadi wiri bakinde; yuru nadu.

31Ho ko andu ni ku zegi yo, Yesu ki nimo ka ya, “Wiri boro ni taasitaasi rimoko awere, Mbori ni taasitaasi rimoko rogo ko yo.

32Mbori atáasa rimoko ataasa rogo ko yo ni tiko, ko atáasa rimoko ataasa ni ba sa.

33Rukutu agude, ani aima na oni ngbutuko. Oni agbata re agbata; wa mi aya fu aYudo, ‘Ho mi andu ku ho ni, ka oni ye nga ku ho te’; si mi agumba fu roni awere.

34Vovo rugute fu mi fu roni nga, oni kpi nyemu akuaroni akpi; a wa mi akpi nyemu roni, oni kpi nyemu akuaroni a wo.

35Ka oni akpi nyemu akuaroni, si ka aboro ini ti ni dunduko ya gimi abawiriki nga oni.”

36Simona Petero ki ya fu ko, “Gbia, mo nandu ku wari?” Yesu ki karaga ha ki ya, “Ho mi andu ku ho ni, ka mo peke nga re ku ho awetere; ono mo apéka re ku ho giza.”

37Petero ki ya fu ko, “Gbia, tipagine ka mi apeka nga ro ti ni ku ho awere ya? Mi abaga kpio re abaga tipa ro.”

38Yesu ki karaga ha ki ya, “Mo abága kpioro abaga tipa re? Mi nagumba ha foro, ni rengo, ni rengo, bakondo akúa nga akua, mbata mo nikaora rimore bara biata te.”

← Chapter 12 Jump to: Chapter 14 →