John 19

Zande

← Chapter 18 Jump to: Chapter 20 →

1Pirato ki nimo ka dia Yesu tie, ki ta ko.

2Abanzengere ki tu kiwe ki kãi he ni kpakpari, ki moi he ku ri ko, ki ukadi ko ni ngungungu remu.

3I ki ye koyo du ko ni, ki ya, “Ako Bakindo a Yudo!” I ki ta ko ni beyo.

4Pirato ki kuru ku zegi yo berewe, ki ya fu yo, “Oni ngére, mi naye na ko ku zegi no fu roni, oni ini ya mi abi nga irairapai ti ko wa sa te.”

5Yesu ki nimo ka kura ku zegi yo, na kpakpari kiwe riko yo na ngungungu remu ti ko. Pirato ki ya fu yo, “Oni ngére, gi boro re!”

6Ho abairamotumo abi ko ni na abaziaboro, i ki nimo ka paa ku ari, niya, “Mo wági ko, mo wági ko!” Pirato ki ya fu yo, “Oni dí ko nisa roni, ki wagi ko; bambiko mi abi nga irairapai ti ko wa sa te.”

7AYudo ki karaga ha fu ko ki ya, “Rugute be rani, sangba gu rugute nga ko ka kpi akpi, bambiko ko aya Wiri Mbori nga ko.”

8Ho Pirãto agi gi pai ni re, ko ki nigunde agunde susi gu naadu mbata.

9Ko ki rimi ku bambu bazogo yo berewe, ki ya fu Yesu, “Mo aenge wari?” Ka Yesu akaraga nga pai fu ko wa sa ya.

10Pirato ki nimo ka ya fu ko, “Mo agumba nga pai fere te? Mo aina nga ya pa kusa ro be re, na pa waga ro te?”

11Yesu ki karaga ha ki ya fu ko, “Pai ngbaro sa re te, kina gu ka i asia pa re foro ari yo; si du gu ni nafu re foro ni du na gbegberẽpai susi.”

12Ta da erẽ Pirato ki nikpi nyemu ka kusa ko. Ono aYudo ki nipoi ku ari niya, “Ka mo kusi gu kumba re, badia Kaisara nga mo te; gu ni ka sa tini ni bakindo ni sa mungu ti Kaisara.”

13Ho Pirato agi agi apai ni re, ko ki ye na Yesu ku zegi, ki sungu auru mbata sapangbanga rogo gu ba i aniya ti ni Kpasakpasa mbia Basunga, nga Gabata rogo pa Ebere.

14Were rago Mbakadaahe nadu sa susiri: si adu wa ka bebere uru du. Ko ki ya fu aYudo, “Oni ngére, gaoni Bakindo!”

15I ki nimo ka paa ku ari, “Mo dí ko ku sa yo, mo wági ko awaga.” Pirato ki ya fu yo, “Mi awága gaoni Bakindo?” Abairamotumo ki karaga ha ki ya, “Bakindo ku ri rani te kina Kaisara.”

16Ko ki nimo ka fu ko fu yo tie i wagi ko.

17I ki nimo ka dia Yesu. Ko ki kuru ku zegi yo, na gako wagiwagi ngua, ku rogo gu ba i aniya ti ni Ba memeri, i aniya ti ni Gorogota rogo pa Ebere.

18Ho i awagi ko ni, na agu yo ue na ko, gu ko ki du ku bani, Yesu ki du bangbanda.

19Pirato ki ke pako a, ki moi he ti wagiwagi ngua. Ko ake gu pai nga “Yesu nga boro Nazareta, bakindo aYudo.”

20Dungu aYudo ki nimo ka geda gi pai re; bambiko gu ba i awagi Yesu rogo si ambedi ambeda na bakporo. I ake he pa Ebere yo, na pa Romo yo, na pa Giriki yo.

21Ga aYudo abairamotumo i ki nimo ka ya fu Pirato, “Ka mo ké nga, ‘Bakindo aYudo ya’; ono, kina ko aya, ‘Bakindo aYudo nga mi.’ ”

22Pirato ki karaga ha ki ya, “Kina gu ke mi, mi ke he.”

23Ho abanzengere awagi Yesu ni, i ki nimo ka roga gako remu, ki kparaka rogo biama dagba yo, ni ba sa sa; na baukadi a. Were baukadi adu nga ni rungurungu he te, si adu adu ni tutu he dunduko.

24Si du i ki nimo ka ya ti ni dagba yo, “Ka ani síri nga ha asira ya, ono ani bá kina ake ti ni, gu ni di he;” Ziazia Kekeapai da ti rengo, wa si aya, “I akparaka gi remu dagba yo, ki ba ake ti gi baukadi.” Si du abanzengere amangi agi apai ti ni re.

25Were anako arundu kina pati ga Yesu wagiwagi ngua, na wirinari, na gu Maria nga dia Keropa, na Maria Magadara.

26Ho Yesu abi nako ni, na gu bawiriki naru ho, gu ko ko anakpi nyemu ko, ko ki nimo ka ya fu nako, “Na, mo ngére, wiro!”

27Ko ki ya fu bawiriki wẽ, “Mo ngére, namo!” Ni gu rago re bawiriki ki di ri adia ku kpuko yo.

28Fuo gere, Yesu ki niini ya apai nyasi awere dũ, ko ki ya, “Gomoro ime namanga re,” Ziazia Kekeapai da ti rengo.

29He adu ho nahi be kakai imekakue; si du i amoi fakayofakayo he ti ni ku ngba usopo yo si nahi be kakai imekakue, ki ye na ni sa ngbako.

30Ho Yesu adi kakai imekakue ni, ko ki ya, “Si nyasi;” ko ki zogo riko, ki fu toroko.

31Bambiko rago Mbakadaahe nadu, ka akangba anye nga ti wagiwagi ngua rago sabiti ya (bambiko rago gu sabiti re si adu ni bakumba rago), aYudo ki nimo ka sana Pirato i kuadi nduyo, i rogo yo ku sa yo.

32Abanzengere ki nimo ka ye, ki kuadi ndu bambata ko, na ga gu kura ko i awagi yo na ko.

33Ono ho i aye ni koyo du Yesu ni, ki bi ko ko naima kpi, ka i akuadi nga nduko ya.

34Ono gu banzengere ki rũ ko ni baso pavuko, kure ki gbadi agbada ni ba sa na ime.

35Gu ko nabi he ko nadu ni dezire he―ko adu ni dezire he ni rengo. Ko aini ya ko nagumba ha ni rengo―oni idi pa ko a.

36Bambiko agi apai amangi re Ziazia Kekeapai da ti rengo naya, “Memeko akita nga wa sa te.”

37Kura Ziazia Kekeapai ki ya berewe, “I angéra angera koyo du gu ko ni i narũ ko.”

38Fuo agi apai re Yosefa nga boro Arimataya, nanidu ni ga Yesu bawiriki, ko ki sana Pirato, ni gbuko bambiko gunde aYudo, ko di kangba Yesu ku sa yo; Pirato ki idi he. Ko ki nimo ka ye, ki di kangbako ku sa yo.

39Nikodemo ki ye a tigako, nga gu ko naye koyo du Yesu ni mbata yuru. Ko aye na wene fuõngua na aaroi du barõaha wa akiro 45.

40Si du i adi kangba Yesu ti ni, ki kãi he ni pusi remu na wene fuõangua, wa du sino aYudo ka kpisida boro.

41Were gu ba i awagi ko rogo ati adu ho; vovo murã adu ati yo i ata piga nga boro rogo yo mbata ya.

42I ki pigi Yesu kina yo tie bambiko ga aYudo rago Mbakadaahe nadu bambiko murã adu mbembedi.

← Chapter 18 Jump to: Chapter 20 →