John 9

Zande

← Chapter 8 Jump to: Chapter 10 →

1Wa Yesu asusa, ko ki bi kumba i avungu ko na vurari.

2Gako abawiriki ki sana ko, ki ya, “Bayugupai, watadu gi kumba re, na avunguko, da namangi gbegberẽpai, i avungu ko ti ni na vurari?”

3Yesu ki karaga ha ki ya, “Watadu gi kumba re, avunguko nidu; i amanga nga gbegberẽpai te, si adu wo i yugu kina ga Mbori pai rogo ko yo.

4Ani mangi agu apai amanga nga ga gu ko nakedi re, kina uru. Rago nabira, ho boro ka manga nga sunge ni ya.

5Wa du mi zegino, mi nga gu imarago nga ga zegino.”

6Ho ko agumba ha ni were, ko ki sukudi sende, ki puta fuka na sure, ko ki mbedi bangiri iravurari na fuka,

7ki ya fu ko, “Mo ndú, ki zundu he rogo gu munga yo nga Siroa” (si wa ka i ya, Keai). Ko ki nimo ka ndu, ki zundu he, ki ta ye ningere.

8Agu yo nara kporo na ko, na agu yo nabi ko mbata, ko du ni irakangadu, i ki nimo ka ya, “A nga ko du re nasungu ki nio he te?”

9Akura yo ki ya, “Ko du”; akura yo ki ya, “Oó, ko wa kina ko.” Ko ki ya, “Mi nga ko.”

10I ki nimo ka ya fu ko, “Bangiro awiri pa ha wãi?”

11Ko ki karaga ha ki ya, “Gu kumba i niya ti ko Yesu, ko naputa fuka, ki mbedi bangire na ni, ki ya fere, ‘Mo ndú ku Siroa yo, ki zundu he;’ si du mi andu ti ni ki zundu he, mi ki ngere.”

12I ki ya fu ko, “Ko wari?” Ko ki ya, “Isoke.”

13I ki ye na gu kumba koyo du aFarusi ni nadu na vurari mbata.

14Were rago sabiti nangia gu rago Yesu aputa fuka ki hasi bangiriko.

15AFarusi ki nimo ka sana ko berewe a tigayo ya ko awiri pa ngera wãi. Ko ki ya fu yo, “Ko amoi fuka amaa ti bangire, mi ki zundu he, ki ningere.”

16Agu aFarusi ki nimo ka ya, “Gi kumba re ko aye nga yo du Mbori ni te, bambiko ko aka nga kuti rago sabiti te.” Agu yo ki ya, “Ka boro ingapai wiri pa manga ngbatunga agu apai i aina pai ti ni wãi?” I ki kparaka akparaka dagba yo.

17I ki nimo ka ya fu iravurari berewe, “Mo naya wãi tipa ko, wa ko ahasi bangiro?” Ko ki ya, “Nebi nga ko.”

18Ono aYudo aida nga pa ko, ya ko adu na vurari, ki ngere te, da kina ho i ayambu avungu gu kumba ni nangere re,

19ki sana yo ya, “Wironi du re, nga gu ko ya oni i avungu ko na vurari? Wiri ko pa ngera wãi awere?”

20Avunguko ki karaga ha ki ya, “Ani ini ya wirani du re, i avungu ko na vurari a.

21Ono gu pai ko angera ti ni awere, na gu ni nahasi bangiriko, ani aina nga ha te. Oni sána ko; a kumba nga ko; ko agúmba pa ko ni tiko.”

22Avunguko agumba agi apai re, bambiko i agunde agunde be aYudo; bambiko aYudo aima ida, ya ka boro kusi ko ya Kristo du, i ki kusi ni akusa bambutiria yo.

23Si du avunguko aya ti ni, “A kumba nga ko; oni sána kina ko.”

24Si du i ayambu gu kumba ti ni berewe nadu na vurari, ki ya fu ko, “Mo táasi rimo kina Mbori; ani ini ya gi kumba re boro ingapai nga ko.”

25Ko ki nimo ka karaga ha ki ya, “Gu pai dũ ko ti ni ni boro ingapai, mi aina nga ha te. Gu pai ini mi sa, si nga, wa mi adu na vurari, mi nangera awere.”

26I ki nimo ka ya fu ko, “Gine ko amangi foro? Ko awiri pa hasa bangiro wãi?”

27Ko ki karaga ha fu yo ki ya. “Mi nagumba ha fu roni kina awere, ka oni agia nga ha ya. Tipagine oni akpi nyemu ka gia ha ti ni berewe? Oni nakpi nyemu ka du a ni gako abawiriki?”

28I asawia ko, ki ya, “Gako bawiriki nga mo; ani nga ga Mose abawiriki.

29Ani ini aina ya Mbori anagumba pai agumba fu Mose; kina gi kumba re, ani aina nga ho ye ko ni ya.”

30Gu kumba ki karaga ha fu yo re ki ya, “Ako, na iriwo gi pai re! Oni aina nga ho ye ko ni te, wa du ko nahasi bangire.

31Aniini ya Mbori a gi anga pa aboro ingapai te. Ono ka boro airisa Mbori airisa, ki nimangi wa ko akpi nyemu he, ni ka ko gi pani.

32Wa rago aenge kindi i agia nga ha mbata ya boro hasi bangiri gu ni i avungu ni na vurari te.

33Ka gi kumba aye nga yo du Mbori ni re ya, ka ko mangi nga pai wa sa te.”

34I ki karaga ha fu ko ki ya, “Wa i avungu ro na gbegberẽapai dũ, mo nayugo pai fu rani?” I ki do ko ku sa yo.

35Yesu ki gi he ya i do ko; ho ko agbata ko ni ki bi ko, ko ki ya. “Mo idi pa Wiri Mbori?”

36Ko ki karaga ha ki ya, “Da nga ko, Gbia, mi idi pa ko?”

37Yesu ki ya fu ko, “Mo bi ko, ko du nagumba pai foro a re.”

38Ko ki ya, “Gbia, mi idi pa ko.” Ko ki niirisi ko.

39Yesu ki ya, “Mi aye ku zegino sa sapa ngbanga, agu yo angera nga ya i ngere; agu yo nangera i du na vurari.”

40Agu aFarusi nadu na ko i agi agi apai re, i ki ya fu ko, “Ani na vurari a tigaani?”

41Yesu ki ya fu yo, “Ka si ngia oni na vurari, ka gbegberẽpai du nga ti roni te; ono ya oni awere, ‘Ani nangera angera’; gaoni gbegberẽpai nye anye.”

← Chapter 8 Jump to: Chapter 10 →