John 21

Zande

← Chapter 20 Jump to:

1Fuo agi apai re Yesu ki yugu tiko berewe fu abawiriki pati gu baime nga Tiberia. Ko ayugu tiko were.

2ASimona Petero ki dungura tiyo, na Toma nangia Bi, na Natanaere nga boro Kana Gariraya yo, na awiri Zebedayo, na kura gako abawiriki ue.

3Simona Petero ki ya fu yo, “Mi nandu ka zia atĩo.” I ki ya fu ko, “Ani namongo ndu na mo a.” I ki ndu, ki zorõ ku Kurungba yo; ni gu yuru re i azia nga he wa sa te.

4Ho ngbatutu naye ni, Yesu ki ru ti ngba gango ime; ono abawiriki aina nga ya Yesu nadu te.

5Yesu ki nimo ka ya fu yo, “Agude, he be roni oni ari?” I ki karaga ha fu ko ki ya, “Oó.”

6Ko ki ya fu yo, “Oni bá pio ku kumbabe kurungba, oni abí ra abi.” I ki nimo ka ba ha, awere ka si adu nga wa ka i gbe he be rimbasa atĩo ya.

7Gu bawiriki Yesu anakpi nyemu ko ko ki nimo ka ya fu Petero, “Gbia du!” Were ho Simona Petero agi he ni ya Gbia du, ko ki ba gako baukadi ti ko bambiko ko adu kundiri, ko ki gu ki ti ku baime yo.

8Kura abawiriki ki ta ye rogo toni kurungba bambiko i aturã nga na ngba gango ime te, si wa ka bagiza mbiribe adu 200 koyo, nigbe pio si nahi be atĩo.

9Ho i akuru ni kuti ngba gango ime tie, i ki bi kingiri we ho, na atĩo rogo ho, na kpokuta.

10Yesu ki ya fu yo, “Oni yé na ngbatunga agu atĩo zi oni ra awere.”

11Simona Petero ki nimo ka zorã, ki gbe pio kuti ngba gango ime, si nahi be kikindigi atĩo, ami ki du wa 153, wa ami ange gbe, ka pio asira nga ya.

12Yesu ki ya fu yo, “Oni yé ka ri he.” Boro adu nga sa dagba abawiriki yo nasana ko ya, “Da nga mo,” te? I naini ya Gbia du.

13Yesu ki ye, ki di kpokuta, ki fu he fu yo, ki mangi atĩo a wo.

14Were gi nga biata yugo Yesu tiko fu gako abawiriki re, fuo zinga ko be kpio.

15Ho i ariti he ni tie, Yesu ki ya fu Simona Petero, “Simona wiri Yoane, mo nakpi nyemu re bakere ti agi yo re?” Ko ki ya fu ko, “Ii, Gbia; mo ini ya mi nakpi nyemu ro.” Ko ki ya fu ko, “Mo nirígi gimi wiri akandoro.”

16Yesu ki ya fu ko berewe, “Simona, wiri Yoane, mo nakpi nyemu re?” Ko ki ya fu ko, “Ii, Gbia; mo ini aina ya mi nakpi nyemu ro.” Yesu ki ya fu ko, “Mo nibánda gimi akandoro.”

17Ko ki ya fu ko berewe, “Simona, wiri Yoane, mo nakpi nyemu re?” Rungo ki nimangi Petero amanga bambiko ko aya fu ko bara biata, “Mo nakpi nyemu re?” Ko ki ya fu ko, “Gbia mo ini apai dunduko; mo ini aina ya mi nakpi nyemu ro.” Yesu ki ya fu ko, “Mo nirígi gimi akandoro.

18Mi nagumba ha foro, ni rengo, ni rengo, ho mo adu ni ni paranga, mo anivodi tiro, ki nita ku ho mo akpi nyemu ka ta ku ho ni. Ono ho mo ka gbinza ni, mo atãa bero atãa, kura boro ki vo ro, ki aka ro ku ho mo akpi nga nyemu ni ya.”

19(Were ko agumba gere, ka yugo gu kpio ko ka kpi ka taasa rimo Mbori.) Ho ko agumba gu ni re, ko ki ya fu ko. “Mo nipéke re.”

20Petero ki ya sa tiko, ki bi gu bawiriki Yesu anakpi nyemu ko ko nipe ko, gu ko namegedi kuti ngbaduko pati gu riahe nga ga yuru, ki ya, “Gbia, da du nikakusa ro?”

21Petero ki nimo ka bi ko ki ya fu Yesu, “Gbia, gi kumba re ko amánga wãi?”

22Yesu ki ya fu ko, “Ka mi kpi nyemu ko nye anye da kina ho mi ka ye ni, sa gamo na ni? Mo nipéke re.”

23Gi pai ki nimo ka gbandaka re dagba awirina ya, gu bawiriki re ko akpi nga te; ono Yesu aya nga fu ko, ko ahe kpi te; ono, “Ka mi kpi nyemu ko nye anye da kina ho mi ka ye ni, sa gamo na ni?”

24Gi bawiriki re ko nga gu ko nadu ni dezire agi apai re, nake agi apai re; ani ini ya ko nga dezirehe ni rengo.

25Kura dungu agu apai kina ho Yesu anamanga, nga gu ka du ni keke he dunduko, ya mi tigu kina zegino ni tihe ka si rengbe nga na agu akitabu ka du ni keke he te.

← Chapter 20 Jump to:

Recommended Reading

Commentary John Commentaries → Devotional John Devotional Guide → Get This Bible Zande Study Bible →