John 20

Zande

← Chapter 19 Jump to: Chapter 21 →

1Were ni gu bambata rame nga ga poso Maria Magadara ki niye ngbatutu, ho rago nidu ni na bitimo, ku pati murã yo, ki bi mbia i nadi he ku sa yo ti murã.

2Ri ki nimo ka ora, ki ye koyo du aSimona Petero ni, na gu kura bawiriki Yesu anakpi nyemu ko, ki ya fu yo, “I di Gbia ku sa yo murã yo, ani aina nga ho pigi yo ko ni te.”

3Petero ki nimo ka ndu, na gu kura bawiriki re, ki ndu ku pati murã yo.

4I ki mongo nioro sa; kura bawiriki ki oro aora ki susi Petero, ki da pati murã yo mbata.

5Ko ki nugadi ki ningere koyo, ko ki bi pusi remu si piki; ono ko arima nga koyo te.

6Simona Petero ki nimo ka ye a tigako, nipe ko, ki rimi ku murã yo. Ko ki bi pusi remu si piki,

7na gu tambara nadu ti riko, si api nga na remu te, si adu ni kãikãi he rogo gu ba ni sa ha.

8Gu kura bawiriki ki nimo ka rima koyo a tigako, naye ku pati murã mbata, ko ki bi he, ki idi pa ha.

9Bambiko ka i ata ina nga gu Ziazia Kekeapai nga, ko azínga azinga berewe be kpio ya.

10Si du abawiriki andu ti ni berewe ku kpuyo yo.

11Ono Maria aru kina zegi pati murã nikpari ni aume. Wa ri akpara, ri ki nugadi ki ngere ku murã yo.

12Ri ki bi amaraika ue na pusi remu ti yo i sungu, gu ni ki du sa ku ba ri yo, gu ni ki du sa ku ba nduhe yo, ho kangba Yesu api ni.

13I ki ya fu ri, “Na, tipagine mo akpara ni aume ti ni?” Ri ki ya fu yo, “Bambiko i di gi Gbia ku sa yo, mi aina nga ho pigi yo ko ni te.”

14Ho ri agumba ha ni were, ri ki sa tiri giiri, ki bi Yesu ko ru, ri aina nga ya Yesu nadu te.

15Yesu ki ya fu ri, “Na tipagine mo akpara ni aume ti ni? Da mo agbata ni?” Ri ki ya ti gu babanda ati nga ko, ki ya fu ko, “Gbia, si ngia mo di ko erẽ, mo yúgu ho fere pigi mo ko ni, mi adía ko ku sa yo.”

16Yesu ki ya fu ri, “Maria.” Ri ki sa tiri, ki ya fu ko rogo pa Ebere yo, “Raboni!” (si wa ka i ya, Bayugupai.)

17Yesu ki ya fu ri, “Ka mo zádi nga re ya; bambiko mi ata ga nga koyo du Buba ni te. Mo ndú koyo du awirinami ni, ki ya fu yo, mi naga koyo du Buba ni nga Baroni, nga gi Mbori nga gaoni Mbori.”

18Maria Magadara ki niye ki ya fu abawiriki. “Mi bi Gbia.” Ri ki pe pa agu apai ko agumba fu ri.

19Ho nyemu ada ni gu rago, nga bambata rago poso, ho ngbadimo adu ni ni kisikisi he ho abawiriki adu ni, bambiko gunde aYudo, Yesu ki ye ki ru ngbanda yo, ki ya fu yo, “Oni dú zezeredi.”

20Ho ko agumba gi ni re, ko ki yugu beko fu yo na pavuko. Rago ki nimo ka ngba angba ti abawiriki, ho i abi Gbia ni.

21Yesu ki nimo ka ya fu yo berewe, “Oni dú zezeredi; wa kedi Buba re, kina wo mi akeda roni.”

22Ho ko agumba gi ni re, ko ki ongo kuti yo, ki ya fu yo, “Oni dí Ziazia Toro ku gume.

23Agu yo Ka oni vu yo ti gbegberẽapai, i vu yo avu; agu yo ka oni dika gbegberẽapai kuti yo, i dika ha adika.”

24Toma nangia Bi nadu dagba agu yo nanidu bawe na ue, ko adu nga yo ho Yesu aye ni te.

25Kura abawiriki ki nimo ka ya fu ko, “Ani bi Gbia.” Ono Toma ki ya fu yo, “Kina gu mi ka bi serõ aneri beko yo, ki moi wirinzagare ku serõ aneri yo, ki moi bere pavuko, si mi ka ida pa ko ti ni.”

26Fuo rame muambi gako abawiriki ki du dimo yo berewe, aToma nadu na yo. Yesu ki ye, ngbadimo du ni kisikisi he, ki ru ngbanda yo, ki ya, “Oni dú zezeredi.”

27Ko ki ya fu Toma tie, “Mo tãi wirinzagaro kono, ki bi bere; ki tãi bero kono, ki moi he ku pavure. Ka mo he nga ida pa re ya, mo idi pa re.”

28Toma ki karaga ha fu ko ki ya, “Gi Gbia nga gi Mbori.”

29Yesu ki ya fu ko, “Bambiko mo bi re, mo idi pa re; i fu maku fu agu yo abi nga re ya, ki idi pa re.”

30Yesu ki nimo ka manga dungu kura apai i aina pai ti ni ku bangiri abawiriki, nga gu adu nga ni keke he rogo gi kitabu re ya.

31Ono gi du ni keke he re, oni idi pa Yesu ya Kristo nga ko, nga Wiri Mbori: oni idi pa ko ka du ni ungaroni ni rimoko.

← Chapter 19 Jump to: Chapter 21 →