Mark 1

Zande

Jump to: Chapter 2 →

1Gu bambata Wene Pangbanga nga ga Yesu Kristo, Wiri Mbori.

2Wa du he ni keke he ti gu kitabu nga ga Yesaya nga nebi ya, “Mo ngére, mi nakeda gi sunge mbata yo foro; ko ambakáda ga gene;

3fugo boro napaa ngbakungba yo ya: Oni mbákadi ga Gbia gene, oni rúrugu gako agene―”

4Yoane aye, gu ko naabapatizi aboro ngbakungba yo, ki nitungusi pa gu bapatiza nga ga rungo be ingaapai, Mbori gbandaka ha.

5Aboro ki kuru rogo ringara nga Yuda dunduko, na agu yo naadu Yerusarema yo, ka ndu koyo du ko ni; ko ki ta bapatizi yo rogo di nga Yaradene, i nikusi gayo ingaapai.

6Yoane aukadi mange kameri, na giri dimoko nga kpoto nya, ko ki niri ayere na anyege nvuo.

7Ko ki nitungusi pai ki va, “Gu ko nikaye fuo re ko nga bahe ti re, ka mi nugadi nga ka zaka giri gako rakata te.

8Mi abapatizi roni ni ime; ono ko abapatizi roni ni Ziazia Toro.”

9Si ada ni gu rago re ya Yesu aye Nazareta yo, Gariraya yo, Yoane ki bapatizi ko rogo di nga Yaradene.

10Ko ki ya guari ime yo, ki bi ngbangbaturũ abi ni ba sa, si naza, Ziazia Toro nizorõ wa mbipo ku ri ko.

11Fugo ki poi ngbangbaturũ yo ya, “Mo nga Wire, nyemuro namanga re, ngba mo ti re gbe.”

12Ziazia Toro ki ndu na Yesu ku ngbakungba yo ni ba sa.

13Ko ki raki ku ngbakungba yo rame ki du 40, Satana niasadi ko, ko adu na anya, amaraika ki nimangi pa ko.

14Were fuo maa yo Yoane ku bambukisa yo, Yesu ki ta ye ku Gariraya yo nitungusi gu wene pangbanga nga ga Mbori.

15Ko ki ya, “Ragoho da, ga Mbori ngbi nikaye; oni sá gaoni berã, ki idi pa wene pangbanga.”

16Ko ki ta merã pati gu baime nga Gariraya, ko ki bi Simona na wirinako nga Andarea, i nizumudi pio atĩo ku ime yo; bambiko i adu ni abaziatĩo.

17Yesu ki ya fu yo, “Oni yé fuo re, mi asá roni ni abaziaboro.”

18I ki mbu gayo pio atĩo ni ba sa, i ki nipeke ko.

19Ho ko amerã ni toni, ko ki bi Yakoba wiri Zebedayo na Yoane nga wirinako, i adu kurungba yo a nitapa gayo pio atĩo.

20Ko ki yambu yo ayamba ni ba sa, i ki guari pati bayo nga Zebedayo kurungba yo na avuruko, ki merẽ fuo ko.

21I ki ndu ku Kaparanauma yo, rago sabiti ko ki rimi arima ku bambutiria yo ni ba sa, ki yugu pai.

22Gako yugopai ki niiriwo airiwo ti yo; bambiko ko ayugu he fu yo wa gu kumba du na tandu, wa abakeapai te.

23Kumba adu bambutiria yo naadu na gbigbita toro ti ko; ko ki poi ku ari,

24ki ya, “Gine ani amánga na mo Mo nga Yesu nga boro Nazareta? Mo ye ka gbarasa rani? Mi ini ro, mo nga gu Ziazia Ko nga ga Mbori Ko.”

25Yesu ki za ru, ki ya, “Mo ongo, ki guari ti ko.”

26Gbigbita toro ki ta guari ti ko nifu imawirianya fu ko nita wawa.

27Si ki iriwo airiwo ti yo dũ; si ki ta du wa gere i ki nisana tiyo, ki ya, “Gine nga gere? Vovo pai dũ! Ko nagumba pai ni ome fu gbigbita atoro ami ki gi sangbako.”

28Gako pangbanga ki gbandaka agbandaka ni ba sa ku rogo ringara Gariraya dunduko kirikiri.

29Were, ho i akuru ni bambutiria yo i ki rimi ku rogo gu bambu nga ga Simona na ga Andarea; aYakoba na Yoane i agumba nindu na yo.

30Were nagbio Simona napi auru ba be kaza kpotori afaa be he; i ki gumba pa ri agumba fu Yesu ni ba sa.

31Ko ki ye, ki zi ri ti beri, ki tumba ri ku ari; kaza ki he ri, ri ki mangi pa yo.

32Nyemu ho uru ati ni, i ki niye na aboro kaza fuo ko dunduko, na agu yo adaimona azi yo.

33Agu aboro nadu bakporo yo i ki tiria ku ngbadimo dũ.

34Ko ki husi aboro naadu na ngbatunga akaza dũ, ki dandi dungu adaimona; ko ki za adaimona ti fugo, bambiko ami aini ko.

35Pamanangba wiso ko ki guari, ki kuru ki ndu ku ngbakungba yo, ki kpari yo.

36Simona na agu yo naadu na ko i ki ndu fuo Yesu.

37I ki bi ko ki ya fu ko, “Aboro nagbata ro dunduko.”

38Yesu ki ya fu yo, “Ani ndú ku rogo kura akporo, mi tungusi pai yo a; bambiko si du mi nikuru ti ni.”

39Ko ki ta rima ku rogo gayo abambutiria Gariraya yo dú, nitungusi pai yo, nidandi adaimona.

40Boro ngbataka ki ye koyo du ko ni, ki ta kpara fu ko, nikuku barangba ko, niya fu ko, “Ka mo kpi nyemu he, mo húsi re ahusa.”

41Rungoko ki nimangi Yesu amanga ko ki tãi beko ki zadi ko, ki ya fu ko, “Mi nakpi nyemu he; mo hú.”

42Ngbataka ki go ago ti ko ni ba sa, ko ki hu.

43Ko ki rugu ko nyanyaki, ki kedi ko akeda ku zegi yo ni ba sa;

44ki ya fu ko, “Ka mo gúmba nga pai fu boro wa sa ya; ono mo gá, mo yúgu tiro fu boromotumo ki tumo wa mo nihu ni agu ahe Mose agumba paha, mbiko yugopai fu yo.”

45Ono ko akuru ki ru pai ka gumba ha gbe ki nitaasi he, si ki ta du wa gere, ka si adu nga wa ka Yesu ndu ku kporo yo gbayaga ya. Ko adu kina nvuo yo; aboro ki ye koyo du ko ni rogo arago dunduko.

Jump to: Chapter 2 →