Mark 15

Zande

← Chapter 14 Jump to: Chapter 16 →

1Wiso abairamotumo na ga aYudo abaakumba, na abakeapai i ki gumba rondo dagba yo, ki vo Yesu, ki ndu na ko, ki fu ko fu Pirato.

2Pirato ki sana ko ki ya, “Bakindo aYudo nga mo?” Ko ki karaga ha ki ya fu ko, “A si mo agumba ha re.”

3Abairamotumo ki kiti ngbanga ko kuti dungu apai.

4Pirato ki sana ko berewe, ki ya, “Mo akaraga nga pai te? Mo bi nga gu dungu apai i agumba kuti ro.”

5Ka Yesu akaraga nga pai berewe ya; wa si adu were si ki niiriwo airiwo ti Pirato.

6Were, wa i anambakada pumbo susiri kina wo Pirato anikusi kisikisi boro sa, gu ni i anisana ko tipa ni.

7Kumba ki du yo rimoko angia Baraba, ni vovo ko na agu yo ko asa mungu na yo, i aimi boro ni mungu.

8Rimbasa ki dakpa fuo Pirato, ki tona sasana ko ko mangi wa ko anamanga mbata fu yo.

9Pirato ki karaga ha fu yo, ki ya, “Oni nakpi nyemu mi kusi Bakindo aYudo fu roni?”

10Bambiko ko aini ya abairamotumo afu ko ni sogote.

11Abairamotumo ki zingisi rimbasa aboro ya, Pirato kusi Baraba fu yo.

12Pirato ki karaga ha berewe, ki ya fu yo, “Gine mi ka manga fu gu ko oni ya ti ko, Bakindo aYudo?”

13I ki poi ku ari berewe ki ya, “Mo wági ko.”

14Pirato ki ya fu yo, “Tipagine; gini gbegberẽ pai mangi ko?” I ki poi ku ari bakere gbe ki ya, “Mo wági ko.”

15Bambiko Pirato akpi nyemu ka zeresa rimbasa aboro, ko ki kusi Baraba fu yo, ki fu Yesu, ho ko ata ko ni bakere, i wagi ko.

16Abanzengere ki ndu na Yesu ku rogo gu kikii vuru bambu nga ga bazogo; i ki yambu rikayo du.

17I ki ukadi ko ni ngungungu remu, ki kãi kpakpari kiwe, ki moi he ku riko yo;

18i ki tona paa kuti ko, “Ako, Bakindo aYudo.”

19I ki ta riko ni nganzi, ki sukudi ko, i ki ta kuka, niudi ko.

20Ho i asawia ko ni, i ki uru ngungungu remu ti ko, ki ukadi ko ni gako remu. I ki kuru na ko ka ndu ka waga ko.

21I ki sosodi kumba naasusa, nga Simona nangia boro Kurene, naaye ringara yo, ba aAresanduro na Rufu, i ndu na ko, ko tindi gako wagiwagi ngua.

22I ki ye na ko ku rogo gu ba nga Gorogota, (si wa ka i ya, Ba memeri.)

23I ki fu imekakue fu ko ni kodikodi he na gu tomengua nga mure; ka ko adia nga ha ya.

24I ki wagi ko, ki ta kparaka gako remu dagba yo, niba ake ti ni, gu ni rogo ho.

25Si ki du wa ka saa ribua nga ga wiso du, i ki wagi ko.

26I ki ke gu pai i akiti ngbanga ko ti ni ba riko, nga “Bakindo aYudo”.

27I ki wagi abatuka ue pati ko; gu ko ki du ku kumbabeko yo, gu ko ki du garebeko yo. [

28Gu Ziazia Kekeapai ki da ti rengo, wa si aya, “I gedi ko na aboro ingapai.”]

29Agu yo naasusa i ki ta sawia ko nipikipo riyo, ki niya, “Ha! Mo nagbarasa yekaru ki dua ha ramehe ki du biata,

30mo bátasi tiro ki zorõ ti wagiwagi ngua.”

31Abairamotumo ki nimomu ko dagba yo wo, na abakeapai, ki ya, “Ko abatasi kura aboro; ka ko batasi nga tiko te.

32Kristo zórõ awere ti wagiwagi ngua, nga Bakindo aYisaraere, ani bí he ki idi pa ko.” Agu yo i awagi yo na ko i ki nisenge ko.

33Ho bebere uru ada ni, bitimo ki ti ati auru kpotosende dunduko kina kuti saa biata.

34Ti saa biata Yesu ki poi ku ari ni bakere fugo ya, “Eroi, Eroi, rama sabakusani?” si wa ka i ya, “Gi Mbori, gi Mbori, guari mo ti re sa gine?”

35Agu yo naarundu ho, ho i agi he ni, i ki ya, “Oni gí he, ko nayamba Eriya.”

36Gu ko ki oro, ki da hisi fakayofakayo he na kakai imekakue, ki moi he ku ngba nganzi yo, ki ta fu he fu ko ko mbiri he, niya, “Ani rú nga, ani bí nga ke si ngia Eriya ayé ka zoga ko.”

37Yesu ki poi ku ari, ki fu mbisimoko.

38Gu remu naadu yekaru yo si ki siri rogo ue, si ki tona ari yo ka sira ku sende.

39Gu barukuri aboro 100 naaru ho pati ko, ho ko abi ko ni ko nafu mbisimoko were, ko ki ya, “Gi kumba re, Wiri Mbori ningia ko rengo.”

40Ade adu ho nibi ko abi ku sa yo. Agu yo adu dagba yo nangia aMaria Magadara, na gu Maria nga na Yakoba gu toni ko, na Yose, a Sarome;

41agu yo re, i nanapeka ko wa ko adu Gariraya yo, ki nimangi pa ko: na gu kura dungu ade naaye na ko ku Yerusarema yo.

42Kumba ki ye nyemu, bambiko rago Mbakada ahe nadu, nga gu rago nida mbata rago sabiti nikada,

43nga Yosefa nga boro Arimataya, irisiirisi bororondo, ko naangera ti ga Mbori ngbi a tigako. Yosefa ki rimi arima zukazuka koyo du Pirato ni, ki sana ko tipa kangba Yesu.

44Si ki niiriwo airiwo ti Pirato bambiko wa ko aima kpi, ko ki yambu gu barukuri aboro 100 koyo du ko ni, ki sana ko si ngia ko niima kpi?

45Ho ko agi he ni ngba barukuri aboro 100 ko ki fu kangba Yesu fu Yosefa.

46Ko ki ngbe pusi remu, ki zogo ko ki kãi ko ni gu pusi remu re, ki pigi ko ku murã yo, gege mbia nadu, ko ki wirigi mbia kuti ngbadimo murã.

47AMaria Magadara na gu Maria nga na Yose i ki bi gu ba i apigi ko rogo ho.

← Chapter 14 Jump to: Chapter 16 →