Mark 9

Zande

← Chapter 8 Jump to: Chapter 10 →

1Yesu ki ya fu yo, “Mi nagumba ha fu roni ni rengo, agu yo kina dagba agu yo ru erẽ, nikaakpi nga ya, nikada ada ho i ka bi ga Mbori ngbi ni si niye na tandu.”

2Rame ki du sita, Yesu ki rogo aPetero na Yakoba na Yoane, ki ndu na yo ku ri gbanga bagangara yo ni sa yo. Kpotoko ki sa tihe ku bangiriyo.

3Gako remu ki du wa imarago, ki vuru avura ni rengo; ka si adu nga wa ka bazunduremu vurusi remu wa ha ya.

4AEriya ki du barangba yo na Mose; ki nifura na Yesu.

5Petero ki karaga ha ki ya fu Yesu, “Bayugupai, du ani erẽ a ngba ti rani; ani dudua basura biata; gamo sa, ga Mose a sa, ga Eriya a sa.”

6Ka ko aina nga gu pai ka ko karaga ya; bambiko i agunde agunde.

7Mai ki ye ku ba riyo; fugo ki poi mai yo, ki ya, “Wire du re, nyemuko namanga re; oni gí pako.”

8I ki ngereke kirikiri ni ba sa, ka i abi nga boro berewe wa sa ya, kina yo na Yesu ni sa yo.

9Wa i azorõ ri bagangara yo, ko ki rugu yo, ka i gumba nga agu apai bi yo fu boro wa sa ya, kina ho Wiri boro ka zinga ni berewe be kpio dagba akangba.

10I ki ka kuti gu pai re, i ki nisana tiyo, ki ya, gine nga zinga berewe be kpio dagba akangba?

11I ki sana ko ki ya, “Tipagine abakeapai aya ka Eriya ye aye mbata?”

12Ko ki ya fu yo, “Ka Eriya ye aye mbata rengo, ki mbakadi ahe dũ; na gu pai dũ ni keke he a tipa Wiri boro ya ko ahi pai i asawia ko?

13Ono ya mi fu roni Eriya aima ye, i ki ima manga agu apai ti ko a i anakpi nyemu he, wa du he ni keke he tipa ko.”

14Ho i aye ni koyo du abawiriki ni, i ki bi bakere rimbasa pati yo, na abakeapai i nisasana yo.

15Ho rimbasa abi ko ni dunduko, si ki iriwo airiwo ti yo gbe, ni ba sa i ki ta yara koyo du ko ni nipoi kuti ko.

16Yesu ki sana yo ki ya, “Gine oni asasana yo tipa ha?”

17Kumba ki karaga ha sa dagba rimbasa yo ki ya fu ko, “Bayugupai, mi niye na wire kono du mo ni, du na toro pupo ti ko;

18yo u azi ko ni u ki ba ko; fuge ki nigbadi ngbako, ko ki niri ngba rindiko, ki zezere azezera dũ. Mi ki gumba ha fu gamo abawiriki i do ru; ka i arengba nga na u ya.”

19Yesu ki ya fu abawiriki, “Ako gi rika aboro re adu nga na idapase ya. Ani araka na oni wãi? Mi aina pai fu roni da wari? Oni ye na ko kono du mi ni.”

20I ki ye na ko koyo du ko ni; ho ko abi ko ni, toro ki fu imawirianya afu fu ko gbe ni ba sa; ko ki ti sande, ki nisota na fuge ngbako.

21Yesu ki sana bako, ki ya, “Ko raki na gere wãi?” Bako ki ya, “Si azi ko ko du ni gude.

22Kina wo si naabafa ko ku we yo dedede ka gbarasa ko; ono si ngia ka mo mangi he, mo mángi pa rani ki unda rani.”

23Yesu ki ya fu ko, “Ya mo, si ngia ka mo mangi he! Gu ni ka idi pase tandu apai ti ni dũ.”

24Ba gude ki poi ku ari ni ba sa, ki ya, “Mi idi pase, mo únda re wa mi aida nga pase ya!”

25Ho Yesu abi dungu aboro ni, i nitiria, ko ki ta ruga gbigbita toro niya fu ru, “Mo nga toro pupo, ya mi foro, mo gúari ti ko, ka mo rími nga ku kpotoko yo berewe ya.”

26Ho u apoi ku ari ni, ki fu imawirianya fu ko gbe, u ki kuru; gude ki du wa boro nikpi akpi, si du dungu yo aya ti ni, “Ko kpi.”

27Yesu ki zi ko ti beko ki tumba ko; gude ki guari.

28Ho Yesu aye ni ku dimoyo, gako abawiriki ki sana ko ni rondo, ki ya, “Tipagine ka ani akusa nga ru ti ni ya?”

29Ko ki ya fu yo, “Ngbatunga gi ru re ka u gúari nga be he te, kina kpe.”

30I ki guari yo, ki kuru Gariraya yo; ka ko akpi nga nyemu boro ini he wa sa ya.

31Bambiko ko ayugu pai fu gako abawiriki, ki ya fu yo, “I afú Wiri boro ku be aboro, i aímo ko; ko ki kpi, rame adu biata ko ki zingi berewe.”

32Ka i aruga nga tiyo na ni ya, i ki nigunde agunde ti sana ko.

33I ki ye ku Kaparanauma yo; ho Yesu adu ni dimo yo, ko ki sana yo, ki ya “Gine oni nagumba pa ha gene?”

34I ki ongo aonga bambiko i apaa apaa dagba yo gene ya, da nga bakumbayo.

35Ko ki sungu ki yambu agu yo nanidu bawe na ue, ko ki ya fu yo, “Ka boro kpi nyemu ka du mbata yo ni nikadu mburu sa yo, ki du ni gayo moyambu dũ.”

36Ko ki di toni gude, ki moi ko dagba yo; ko ki aka ko ku beko, ki ya fu yo,

37“Gu ni ka di gude ku gume dagba toni agude yo sa wa gi ko re, ni rimore, ni ka di re ku gume; gu ni ka di re ku gume si wa ni adia nga re ku gume te; ni di gu ko ku gume nakedi re.”

38Yoane ki ya fu ko, “Bayugupai, ani abi boro ni nidandi adaimona ni rimoro; ani ki za ko, bambiko wa ko apeka nga rani ya.”

39Yesu ki ya, “Ka oni zá nga ko ya; bambiko a nga boro ho ka manga gu pai dũ na tandu ni rimore ni gumba gbegberẽpai tipa re ni ipo wa sa te.

40Bambiko gu ni ka du nga ni vurarani ya ni du adu fu rani.

41Bambiko gu ni ka fu inga na ime fu roni oni mbiri he bambiko oni nga ga Kristo yo, ya mi fu roni ni rengo, ni ingisi nga gani mosoro te.

42“Gu ni ka manga gu ni sa dagba gi rukutu yo re idi pa re, ni koto, si ka ngba tipa ni i vo kikii mbia sa ahe kuti gorõni ki ba ni ku baime yo.

43Si ngia bero ka mangi ro mo koto, mo ki yere he ayera; rima mo ku unga yo na gbarã, si ka ngba tipa ro ti ndu mo na bero ue ku Geyena yo, ku rogo gu we ka abisa nga ya. [

44Yo akpi nga agbirẽ ni ya, na gu we ka abisa nga ya.]

45Si ngia nduro ka mangi ro a, mo koto, mo ki yere he ayera; rima mo ku unga yo na terenga, si ka ngba tipa ro ti ba yo ro ku Geyena yo na nduro ue. [

46Yo akpi nga agbirẽ ni ya, na gu we ka abisa nga ya.]

47Si ngia bangiro ka mangi ro a mo koto, mo ki mo ho amo; rima mo ku rogo ga Mbori ngbi yo na bangiro sa, si ka ngba tipa ro ti ba yo ro ku Geyena yo na bangiro ue.

48Yo akpi nga agbirẽ ni ya, na gu we ka abisa nga ya.

49Bambiko i aasada aboro aasada ni we dunduko.

50Ngba tikpo angba; ono ka tikpo ahia nga ya, oni hihisi he ni gine? Tikpo dú kpotoroni yo, oni dú zezeredi dagba roni.”

← Chapter 8 Jump to: Chapter 10 →