Mark 4

Zande

← Chapter 3 Jump to: Chapter 5 →

1Yesu ki tona yugo pai pati baime berewe. Bakere rimbasa ki tiria koyo du ko ni gbe, si ki ta du wa gere, ko ki zorõ ku kurungba yo, ki sungu rogo ho bangiri ime, rimbasa dunduko ki du pati baime ti ngba gango ime.

2Ko ki yugu dungu apai ni sanza, ki ya fu yo rogo gako yugopai,

3“Oni gí he! Were, bamitunga andu ka mi tunga.

4Ho ni nami he ni, gu bete he ki tiwi ku pangba gene, azire ki ye ki riti he.

5Gu kura na ki tiwi ku auru mbia, yo sende naanaga nga ni ya; si ki kuru ni ipo bambiko sende naanaga nga fu he te.

6Ho uru nafaa ni, si ki gbi agbi bambiko tarãha arima nga te, si ki ugu auga.

7Na gu kura ha ki tiwi ku dagba akiwe yo, akiwe ki sono asona, ki kandasi he, ka si azu nga ya.

8Na gu kura ha ki tiwi ku rogo mbudu sende, si ki nizuku, ta sosona nikindigi; si ki zuku ki susi gu ni nimi mbata bara 30 na bara 60, na bara 100.”

9Ko ki ya, “Gu ni du na tu gia ha ti ni ni gí he.”

10Ho Yesu adu ni ni sa ko, agu yo naadu pati ko na agu yo nanidu bawe na ue, i ki sana ko tipa gu sanza re.

11Ko ki ya fu yo, “Gu gbugbu pai nga ga ga Mbori ngbi du ni yuguyugu he fu roni; ono ahe ni mangimangi he ni sanza dũ fu agu yo du zegi.

12Ka i bi he, i bi he abi, ka i aina nga ha ya; ka i gi he, i gi he agia, ka i aruga nga tiyo na ni ya; bambiko i ka sa tiyo, si ki du ni hehe he fu yo.”

13Ko ki ya fu yo, “Oni aina nga gi sanza te re? Oni awira pa ina asanza wãi dú?

14Bamitunga nimi pangbanga.

15Gu nidu pangba gene ho i nimi pangbanga ku ho ni si nga agu yo nigi he, Satana ki ye aye ni ba sa, ki di gu pai i nimi ku rogo yo yo.

16Gu i nimi ku auru mbia a si nga agu yo nigi pai ki di he, rago ki ngba angba ti yo,

17ka tarãha adu nga kpotoyo yo ya, ono i ki ru ngbutuko; ni gu rago rungo nida ti yo na rungosi tipa gu pai re, i ki koto akota ni ba sa.

18Na gu kura ha i nimi ku dagba akiwe, si nga agu yo nigi gu pai re,

19berã pa zegino, na gu nangaahe nga ga ũkumuko na nyemu kura ahe ki rimi, ki kandasi wene pai, ka si azu nga ya.

20Gu i nimi ku rogo mbudu sende si nga agu yo nigi gu pai re, ki di he, ki nimangi he, si ki nge ange bara 30, na bara 60, na bara 100.”

21Yesu ki sana yo ki ya, “I niye na baro ka maa ha ku tii moduka vo na tii barame yo, ka amaa nga ha auru nguaha ya?

22Bambiko a nga he sa ka du ni okooko ho te; si au adu ni kusikusi he; a nga he sa ka i mangi ni gbuko te, si kuru akura ku imarago.

23Gu boro du na tu gia ha ti ni ni gí he.”

24Ko ki ya fu yo, “Oni bánda tironi ti agu apai oni agia; ni gu moduka oni anduka ha na ni i andúka ha na ni fu roni; si nikadu ni fufu he fu roni bakere ti gu naadu mbata.

25Bambiko gu ni du he be ni, si adú ni fufu he ku ri he fu ni, gu ni adu nga he be ni ya, i adia gu du be ni.”

26Ko ki ya. “Wo au ga Mbori ngbi, wa ka boro mi tunga ku sende yo;

27ki ta ra nizingi yuru na uru, tunga ki ta kura nisono, ka ni aina nga pa sona ha ya.

28He nazu ti sende ni sa ha; bambata ha nga kpehe, sisihe nikadu, kikindigi tunga ki du vuru sisihe yo.

29Ho zuzuhe nizamu ni, ni ki nirogo asape aroga ni ba sa, bambiko regbo ke he da.”

30Ko ki ya, “Ani aringbisa ga Mbori ngbi kuti gine? Ani yugu he rogo gini sanza?

31Si wa tunga musutada, gu tunga nidu ni toni he ti atunga rogo kpotosende dú, ho i nimi he ni;

32ono ka i mi he si sono asona, ki susi nvuo dú, ki nikparaka kikindigi abehe; si ki ta du wa gere agu azire du ari ami ki nisusungu nzeremehe.”

33Dungu asanza ko agumba pai rogo ho fu fu yo wa gere, gu ka i agia agia.

34Ko agumba nga pai fu yo gbua te, ko agumba ha fu yo kina rogo sanza yo. Ono ko ayugu ahe dunduko fu gako abawiriki ni rondo.

35Nyemu ni gu rago re, ko ki ya fu yo, “Ani sí ku mbiti yo.”

36I ki guari rimbasa yo, ki nindu na ko a wa ko adu kurungba yo. Kura akurungba adu ho fuo ko.

37Bayuge ki niya, ime ki nisungbura ku kurungba yo, si ki du wa kurungba nikahi ahi awere.

38Ko ki du ni sa ko mburuhe yo, ki moi riko ti ngua bari nira ara. I ki zingisi ko, ki ya fu ko, “Bayugupai, ka ani kpi si agberã nga ti ro te?”

39Ko ki zingi, ki za yuge, ki ya fu baime, “Mo zéredi, ki ru zaa!” Yuge ki kiti, rago ki zeredi azereda.

40Ko ki ya fu yo, “Oni nagunde tipagine? Oni ata du nga na idapase te?”

41I ki nigunde agunde gbe, ki ya dagba yo, “Da du re, yuge agia sangbani na baime a?”

← Chapter 3 Jump to: Chapter 5 →