Mark 6

Zande

← Chapter 5 Jump to: Chapter 7 →

1Yesu ki guari yo ki da rogo gako ringara; gako abawiriki ki nipeke ko.

2Ho rago sabiti ada ni ko ki tona yugo pai bambutiria yo; gu dungu aboro naagia ha si ki niiriwo airiwo ti yo, i ki ya, “Gi kumba re ko aini agi apai wari re? na, Gine nga tatamana apai du ni fufu he fu gi kumba re, na tandu agu apai ko amanga ha ni beko?

3A nga basekengua nga gi kumba te re, nga wiri Maria, nga wirina Yakoba na Yose, na Yuda na Simona te? du adawiriko erẽ na ani te?” I ki gberẽ kuti ko.

4Yesu ki ya fu yo, “Nebi nazanga nga irisa te, kina rogo gani ringara na dagba agumeni, na kpuni yo.”

5Ka si adu nga wa ka ko mangi pai yo ni tandu wa sa ya, ono ko amoi beko kina auru aboro kaza ni umba yo, ki batasi yo.

6Si ki iriwo airiwo ti ko wa i aida nga pa ko ya. Ko ki ta ndu Kirikiri dagba akporo niyugu pai.

7Ko ki yambu agu yo nanidu bawe na ue koyo du ko ni ki tona kekeda yo ni ba ue; ko ki asia pa kusa gbigbita atoro fu yo.

8Ko ki rugu yo ki ya, ka i dí nga he sa gayo nunguro wa sa ya, kina ngaũ sa, riahe a te, mangu a te, amara rogo gayo amangu a te;

9ono i vodi kina rakata: ka i úkadi nga baukadi ni ba ue ya.

10Ko ki ya fu yo, “Gu bambu oni ka nirimi ku tii ne yo rogo gu kporo, oni ki nye anye yo da kina ho oni ka niguari ni.

11Gu kporo ka dia nga roni ku gume ya, i agia nga gaoni pai ya, oni ta guari ho oni ki zanzia nvutu ti nduroni mbiko si yugu pai fu yo.”

12I ki ndu ki nitungusi gu pai nga aboro sa gayo berã.

13I ki nidandi dungu adaimona, ki nimbembedi gu dungu aboro naakakaza ni nzeme ki nihusi yo.

14Gu bakindo nangia Erode, ko ki gi he; bambiko aboro agi rimo Yesu dũ. Ko ki ya, “Yoane Babapatiza azingi be kpio, si du du gi tandu apai ti ni re ti ko.”

15Agu yo ki ya, “Eriya du.” Akura yo ki ya, “Nebi nga ko, ko wa kina anebi.”

16Ho Erode agi he ni, ko aya, “Gu Yoane mi akati riko, ko zingi.”

17Bambiko Erode tigako akedi sunge i zi Yoane, ki vo ko bambukisa yo tipa Erodia, nangia dia Firipo nangia wirinako, ko adi ri.

18Bambiko Yoane aya fu Erode, “Ru nga dia dia wirinamo foro te.”

19Erodia ki niserẽ ko aserã, ki nikpi nyemu imo ko; ka si adu nga wa ka ri imi ko ya;

20bambiko Erode agunde agunde be Yoane bambiko ko aini ya ko nga ruru kumba ni ziazia ko, ko ki nibanda ko abanda. Ho ko anigi pako ni ko anabaka bangiriko abaka gbe ki nigi pako ni ngbarago.

21Ho rago ada ni Erode mangi pumbo ti rago tingida pa vunga ko tipa gako abanyaki na aboro ri vura, na agu abaakumba nga aboro Gariraya;

22ho wiri Erodia arimi ni ni tiri ki nido gbere si ki ngba angba ti Erode gbe na agu yo nari riahe na ko. Bakindo ki ya fu degude, “Mo sána re tipa gu he mo akpi nyemu he be re, mi afú he foro.”

23Ko ki zunga he fu ri, ki ya, “Gu he mo ka sana re tipa ha ka si vura du wa kina bebere gi ngbi mi afú he foro.”

24Ri ki kuru, ki ya fu nari, “Gine mi ka sana ko tipa ha?” Ri ki ya, “Ri Yoane Babaptiza.”

25Ri ki rimi koyo du bakindo ni zaza gbe ki sana ko, ki ya, “Mi nakpi nyemu mo fu ri Yoane Babapatiza ku kurungbu yo fere awere.”

26Si ki gberẽ agberã ti bakindo ni rengo; ono ka ko aka nga na ni be ri ya, Mbiko gako zungahe, na tipa agu yo naari riahe.

27Bakindo ki Kedi banzengere akeda ni ba sa dagba agu yo yo nanabanda ko, ki ya, ko ndu ka yega na ri Yoane. Ko ki ndu ki kati riko bambukisa yo,

28ki ye na riko kurungbu yo, ki fu he fu degude, ri ki fu he fu nari.

29Ho gako abawiriki agi he ni, i ki ye ki di kangbako ki moi he ku murã yo.

30Amokedi ki dungura tiyo koyo du Yesu ni; i ki gumba pa agu apai fu ko dunduko i amangi na agu apai i ayugu.

31Ko ki ya fu yo, “Oni yé ni sa roni ku nvuo yo, ka ongoda toni.” Bambiko gu dungu aboro anita ga, agu yo niye ave, ka si adu nga wa ka i ri riahe ya.

32I ki ndu kurungba yo, ku nvuo yo ni sa yo.

33Aboro ki bi yo i nindu, dungu aboro ki ini yo, i ki tiria koyo ni ipo kuti ngba gango ime yo, rogo abakporo dunduko, ki susi mbata yo fu yo.

34Ko ki kuru ki bi bakere rimbasa, nungayo ki nimangi ko amanga bambiko i adu wa agu akandoro adu nga na babandara ti ra ya; ko ki tona yugo dungu apai fu yo.

35Ho uru adu ni wa si nikati, gako abawiriki ki ye koyo du ko ni, ki ya, “Ngbakungba du re, uru nikati;

36mo kedi yo i ndu ku ringara yo na ku rogo akporo kirikiri ka ngbeka ahe ka ri he.”

37Ko ki karaga ha ki ya fu yo, “Oni fú he fu yo i ri he.” I ki ya fu ko. “Ani andu andu ka ngbeka kpokuta na marã feda 200 ka fu he fu yo i ri he?”

38Ko ki ya fu yo, “Udiudi kpokuta be roni wãi? Oni ndú ka bi he.” Ho i aini he ni, i ki ya, “Si bisue, atĩo ki du ue.”

39Ko ki ya fu yo i susungu ni arika yo auru wesewese nvuo dund uko.

40I ki susungu nitangara tiyo ni ba 100, ni ba 50.

41Ko ki di gu kpokuta nadu bisue na agu atĩo nadu ue, ki ngere ku ngbangbaturũ yo, ki fu tambuahe, ki kuadi kpokuta. Ko ki fu he fu abawiriki i mamoi he barangba yo; agu atĩo naadu ue ko ki kparaka ra fu yo dũ.

42I ki ri he dunduko, i ki mbiki.

43I ki dungura mbusuruhe baga ki hiki bawe na ue, na ga atĩo a.

44Agu akumba naari kpokuta i adu 5,000.

45Yesu ki rugu gako abawiriki i zorõ ku kurungba yo ka si mbata fu ko ku mbiti yo ku Betesaida yo, ko niasia rimbasa ni sa ko.

46Fuo asia ko yo, ko ki ndu ku ri bagangara yo ka kpara yo.

47Nyemu, kurungba ki du bebere baime, koki du ni sa ko pia yo.

48Ko ki bi yo i nimbu be ruga ha gbe, bambiko yuge naakaraga yo. Pamanangba wiso ko ki niye koyo du yo ni ki nindu ri baime; ko ki niye ka susa yo.

49Ono, ho i abi ko ni, ko nindu ri baime, i ki ya ti gu, toro nga ko, i ki nipoi ku ari;

50bambiko i abi ko dunduko, i ki nigunde agunde. Ono ko agumba ha fu yo ni ba sa, ki ya fu yo, “Oni wása; mi du; ka oni gúnde nga ya.”

51Ko ki yari fuo yo ku kurungba yo; yuge ki kiti; i ki nikigi akiga kpotoyo yo gbe;

52bambiko i aruga nga tiyo na pa kpokuta te, bambiko kpotoyo yo anyaki gbe.

53Ho i asi ni i ki da rogo gu ringara nga Genesareta, ki vo kurungba ti ngba gango ime.

54Ho i akuru ni kurungba yo, aboro ki ini ko ni ba sa,

55ki nioro ku rogo gu ringara re dunduko kirikiri, ki tona tutumba agu yo nadu na akaza auru gayo aba koyo i agia pako ku ho ni.

56Agu akporo ko andu ku rogo, na abaakporo yo, na ringara yo i ki mamoi aboro kaza bangbeahe ho, ki nikpari fu ko i zadi kina pangba gako remu sa; agu yo naazadi he i ki hu ahu dunduko.

← Chapter 5 Jump to: Chapter 7 →