Mark 2

Zande

← Chapter 1 Jump to: Chapter 3 →

1Ho Yesu arimi ni ku Kaparanauma yo berewe fuo rago ngbutuko, pandeko ki gbandaka ya, ko bambu yo.

2Dungu aboro ki tiria, bambu ki hi, ka si adu nga wa ka ba du dimo yo na pa ngbadimo a ya; ko ki tungusi wene pangbanga fu yo.

3I ki ye koyo du Yesu ni na kumba nakaza be ngbaramoni, akumba adu biama naatindi ko.

4Ka si adu nga wa ka i mbedi koyo du Yesu ni ya be rimbasa, i ki nimo ka zaka ri bambu yo bara ho ko adu ni. Ho i azaki he ni, i ki zogo boro ngbaramoni na gu barame ko api auru he.

5Yesu ki bi yo i naidi pa ko, ko ki ya fu boro ngbaramoni, “Wiri, i vu ro ti ga ingaapai.”

6Ono agu abakeapai naasungu ho i ki niberẽ he ku kpotoyo yo, ki ya,

7“Gi kumba re ko nagumba ha were ti gine? Ko nagberã ngbako yo fu Mbori! Da ka vu boro ti ingaapai wa du kina Mbori sa?”

8Yesu ki ini aina ku kpotoko yo ni ba sa ya i naberã ha wo ku kpotoyo yo, ko ki ya fu yo wẽ, “Tipagine oni aberã gi pai ti ni re ku kpotoroni yo?

9Watadu ya mi fu boro ngbaramoni, ‘I vu ro ti ga ingaapai,’ na ya mi, ‘Mo gúari, ki tumba ga barame ki mere,’ giniguipi?

10Ono ka oni ini ya, Wiri boro rengbe tanduko na vu aboro ti ingaapai zegino,” ko ki ya fu boro ngbaramoni,

11“Ya mi foro, mo gúari, ki di ga barame ki ga ku kpuro yo.”

12Ko ki guari ki di barame adia ni ba sa, ki kuru ku bara bangiriyo dũ. Si ki ta du wa gere si ki niiriwo airiwo ti yo dũ, i ki taasi rimo Mbori ki ya, “Ani abi nga pai wa gere mbata te!”

13Yesu ki mere berewe pati baime; rimbasa ki tiria fuo ko dú, ko ki niyugu pai fu yo.

14Wako asusi, koabi Revi nga wiri Arufayo, ko sungu rogo gu ba i anafu amarã ku ho ni, ko ki ya fu ko, “Mo nipéke re.” Ko ki guari ki nipeke ko.

15Si ki ta du wa gere, Yesu ki sungu ka ri riahe rogo ga Revi bambu, dungu abarogo marã ngbeti na aboro ingapai ki sungu ka ri riahe na Yesu na gako abawiriki, bambiko i adu ni dungu yo, i ki nipeke ko.

16Abakeapai na aFarusi ho i abi ko ni, ko niri riahe na aboro ingapai na abarogo marã ngbeti, i ki ya fu gako abawiriki, “Tipagine ko ari riahe ti ni nimbiri he na abarogo marã ngbeti na aboro ingapai?”

17Yesu ki gi he, ko ki ya fu yo, “Agu aboro du zezeredi zingo munganga amanga nga yo te; ono kina agu yo du na kaza. Mi aye nga ka yamba ruru aboro te, kina aboro ingapai.”

18Ga Yoane abawiriki na aFarusi nagina riahe; i ki ye ki ya fu ko, “Tipagine ga Yoane abawiriki nagina riahe ti ni na ga aFarusi abawiriki, ono gamo abawiriki agina nga riahe te?”

19Yesu ki ya fu yo, “Aboro kporo diade rengbe na gina riahe ho du kumba ku de ni na yo? Ni gu rago kumba ku de nidu na yo ka i agina nga riahe ya.

20Ono ragoho nada i di kumba ku de be yo; i ki nigina riahe ni gu rago re.

21A nga boro sa ka rungu vovo remu kuti kuru remu te; gu vovo remu ka ni ru he ti bangirihe si ki siri kuru he asira, bangirihe ki susi gu naadu mbata.

22Ka boro uka nga vovo imekakue ku rogo kuru amangu imekakue yo te; imekakue ka sipa agu amangu asipa ka i uka ha ku rogo, imekakue ki gberẽ na amangu; ono i niuka vovo imekakue kina ku rogo vovo amangu.”

23Wa ko andu rogo ati rago sabiti, gako abawiriki ki ta ndu nisiri vunde.

24AFarusi ki ya fu ko, “Mo bi yo, tipagine i amanga gu ti ni re rago sabni wa aru nga ha ya?”

25Ko ki ya fu yo, “Oni ageda nga gu pai Dawidi amangi ho zingo riahe amangi ko ni, ko ki du na gomoro, ko na agu yo naadu na ko, te?

26Wakoarimikurogo ga Mbori bambu yo ni gu rago Abiatara adu ni gbiamotumo, ki ri kpokuta yugopai, nga gu i aidi pa ri he fu agu yo naadu na ko, te?”

27Ko ki ya fu yo, “I amangi rago sabiti fu aboro, i amanga nga aboro fu rago sabiti te;

28si du du Wiri boro ti ni ni gbia sabiti a.”

← Chapter 1 Jump to: Chapter 3 →