Mark 7

Zande

← Chapter 6 Jump to: Chapter 8 →

1AFarusi ki dungura tiyo koyo du Yesu ni na agu abakeapai naaye Yerusarema yo,

2i abi gu gako abawiriki i niri gayo riahe na beyo kina ku ho, ka i azunda nga beyo ya.

3Bambiko aFarusi na aYudo dunduko, ka i azunda nga beyo wenengaĩya, i ri nga he te, bambiko i adi sino ga aYudo abaakumba.

4Ho i aniye ni bangbeahe yo ka i azunda nga tiyo ya ka i ari nga he a ya. Dungu kura apai kina ho, i adi ka amanga, nga zunda ainga, na akurungbu na akurungbu asirigi.

5AFarusi ki sana ko na abakeapai ki ya, “Tipagine gamo abawiriki amanga nga sino ga aYudo abaakumba ti ni ya, i niri gayo kpokuta na beyo kina ku ho?”

6Ko ki ya fu yo, “Yesaya agumba pai tipa roni nga airabiriki ni rengo, wa du he ni keke he, ya ‘Agi aboro re i nairisa re kina ngbayo yo, ono kpotoyo yo ti re tuturu;

7ono i nauda re auda vurũ, niyugu gayo apai nga kina ga aboro rugute.’

8Oni mbu gu rugute nga ga Mbori ki ka kuti sino aboro.”

9Ko ki ya fu yo, “Oni mbu gu rugute nga ga Mbori ni rengo ka ka kuti sinoroni!

10Bambiko Mose aya, ‘Mo írisi bamo na namo’; ‘Gu ni ka gumba gbegberẽ pai fu bani na nani, ni kpi akpi ni rengo.’

11Ono oni ya, ‘Ka boro ya fu bani na nani, Gu he re ka mi fu nga ha foro te, Korubani nga ha,’ (si wa ka i ya, si ni fufu he fu Mbori)―

12oni ki za ni ti manga pa bani na nani berewe.

13Oni nagbarasa ga Mbori pai ni gu pai oni afu; dungu apai oni amanga wa gere.”

14Ko ki yambu rimbasa fuo ko berewe, ki ya fu yo, “Oni gí sangbare a wa du oni dunduko, ki rugu tironi na ni,

15a nga he zegi sa ka ndu ku kpoto boro yo birikosi ni te; kina agu ahe enge ti boro si birikosi boro. [

16Gu ni du na tu gia ha ti ni ni gí he.]”

17Ho ko arimi ni ku dimo yo, ti rimbasa, gako abawiriki ki sana ko tipa gu sanza re.

18Ko ki ya fu yo, “Oni aruga nga tironi na ni te? Oni aina nga ha te? gu he du zegi ka si ndu ku kpoto boro yo, si birikosi nga ni te;

19bambiko si nandu nga ku ngbaduni yo te, si nindu kina ku vuni yo, ki kuru ku nvuo yo.” Ko agumba gere, si girisi ariahe dú.

20Ko ki ya, “Kina gu he enge ti boro si birikosi boro.

21Bambiko ngbadu aboro yo, gbegberẽ berã nienge ni, berã pa meteka, na dĩ,

22na imo boro, na pa bari, na dia ngbiti he, na ingaapai, na nangahe, na wasiro, na kere ngera, na wawaru, na rekangose, na gbagaura.

23Gi gbegberẽ ahe re dunduko si enge ti boro ki birikosi ni.”

24Yesu ki guari yo, ki ndu ku ngbanda Tura yo na Sidona. Ko ki rimi ku bambu yo, ko akpi nga nyemu boro ini he wa sa te; ka si adu nga wa ka ko gbu ya.

25De, gbigbita toro azi toni wiriri ri ki gi pako agia nibasa, kiyekitisandepatinduko.

26Were gu de re, Giriki nangia ri, ngbatungari nangia Surofoiniko. Ri ki kpari fu ko ko do daimona ti wiriri.

27Ko ki ya fu ri, “Agude mbiki mbata; bambiko ngba nga dia ga agude kpokuta ka ba ha fu aango te.”

28Ri ki karaga ha ki ya fu ko, “Ii Gbia; agu aango anidu tii mbisa yo ami nari ga agude mbusuru riahe.”

29Ko ki ya fu ri, “Mbiko gi pai re mo ndú; daimona go ti wiro.”

30Ri ki ga ku kpuri yo, ki bi wiriri ri pi auru ba, daimona aima go ti ri.

31Ko ki guari ngbanda Tura yo berewe ki ye ki kuru Sidona yo na ngbanda Dekapori yo, ki da ti gu baime nga Gariraya.

32I ki ye koyo du ko ni na kumba naadu na kisikisi tuko, ki nikongodi pai; i ki kpari fu ko, ko moi beko auru ko.

33Ko ki di ko ni sa ko ku sa yo pati rimbasa ki moi wirinzagako ku tuko yo, ki suku sure ki zadi mirãko;

34ko ki ngere ku ari yo, ki uka omeko, ki ya fu ko, “Efata,” si wa ka i ya, “Si há.”

35Tuko ki ha, giri mirãko ki zaki, ko ki nifura wenengaĩ.

36Ko ki rugu yo ka i gumba nga ha fu boro wa sa ya; ono wa ko aruga yo i ki nigbandaka ha agbandaka bakere gbe.

37Si ki niiriwo airiwo ti yo bakere gbe, i ki ya, “Ko mangi apai wenengaĩ dunduko; ko aya airangbianga gi pai a, na airapupo i nifura.”

← Chapter 6 Jump to: Chapter 8 →