Mark 14 — Zande

1Were, rame adu ue pumbo susiri ki da na gu kpokuta adu nga na agbooro ti ni ya; abairamotumo ki ya na abakeapai i amanga wãi ka zia Yesu ni biriki, ka imo ko;

2bambiko i aya. “Ka i zí nga ko rago pumbo te, aboro ka zinga.”

3Wa ko adu Betania yo, dimo ku Simona yo nga boro ngbataka, wa ko asungu ka ri riahe, de ki ye na ndukura na nzeme, kii genoho akia gbe, ri ki kiti gorõ ndukura, ki uka nzeme ku ri Yesu.

4Agu aboro naadu ho agu yo ki nierẽ aerã dagba yo ki ya, “Tipagine i amisika gi nzeme ti ni re?

5Bambiko gi nzeme re ka i bagi he abaga rukutu marã feda du adu susi 300, i ki fuku ra fu rungorungo aboro.” I ki nigumba rimori.

6Yesu ki ya, “Oni hé ri; oni nafuda ri tipagine? ri mangi wene pai ti re.

7Bambiko rungorungo aboro du na oni dedede, ni gu rago oni ka nikpi nyemu ka ngba na yo oni aningba angba na yo; ono mi adú nga na oni dedede te.

8Ri mangi he, ringbisi kina omeri na ni. Ri nimbedi kpotore mbata sa kpisida re.

9Ya mi fu roni ni rengo, rogo agu arago i ka tungusa wene pangbanga ni zegino dú, gi pai mangi gi de a re i agúmba ha agumba ka atingida pari ti ni.”

10Yuda Keriota, gu ko naadu dagba agu yo nanidu bawe na ue, ko ki ndu koyo du abairamotumo ni ka kusa Yesu fu yo.

11Ho i agi he ni, si ki ngba angba ti yo ni rengo,, ki kido ko tipa marã ya i afu he fu ko. Ko ki ya u amanga wãi ka fu Yesu fu yo bara ipo.

12Bambata rago gu kpokuta adu nga na agbooro ti ni ya, ni gu rago i atumo ni pumbo susiri, gako abawiriki ki ya fu ko, “Mo nakpi nyemu ani mbakadi ba wari, mo ri pumbo susiri ni?”

13Ko ki kedi gu gako abawiriki ue, ki ya fu yo, “Oni ndú ku bakporo yo, kumba agbia roni na runge be ko; oni ki pe ko.

14Ho ko ka rima ku ho ni oni ki ya fu irabambu, ‘Bayugupai niya, Gi bambu gino wari, mi ka ri pumbo susiri rogo na gimi abawiriki?’

15Ko ayúgo bakere vuru bambu fu roni ari ni tiko, ahe kina yo dũ. Oni ki mbakadi ba yo fu rani.”

16Abawiriki ki ndu ki da bakporo yo, ki bi he wa ko agumba ha fu yo; i ki mbakadi ba pumbo susiri.

17Ko ki ye nyemu na agu yo nanidu bawe na ue.

18Wa i asungu ki niri riahe, Yesu ki ya, “Mi nagumba ha fu roni ni rengo, gu ni sa dagba roni nikakusa re, ni ani ari riahe na ni.”

19I ki mo ka arungo, ki nisana ko ni ba sa sa, gu ni ki niya, “Mi du?”

20Ko ki ya fu yo, “Ni dagba agu roni nanidu bawe na ue, gu ni ani anogoda he na ni kurungbu yo.

21Bambiko Wiri boro nandu a wa i ake pa ko; ono si agbérã agberã ti gu kumba nakusa Wiri boro re. Ka i avunga nga ko ya ka si angba tipa ko.”

22Wa i ari riahe ko ki di kpokuta, ho ko afu tambuahe ni, ko ki kuadi he, ki fuku he fu yo, ki ya. “Oni rógo ho; borore nga gere.”

23Ko ki di inga, ho ko afu tambuahe ni ko ki fu he fu yo; i ki mbiri he ti ngbaha dũ.

24Ko ki ya fu yo, “Kurere nga gere nga ga ndika nga gu nauka tipa dungu aboro.

25Ya mi fu roni ni rengo, mi ambira nga rindi bakakue berewe dati gu mi ka mbira ha ni vovo ho rogo ga Mbori ngbi yo te.”

26Fuo bi yo bia, i ki ndu ku bagangara Aeraya yo.

27Yesu ki ya fu yo, “I amánga roni oni koto akota dunduko; bambiko wa du he ni keke he ya, ‘Mi átá babanda akandoro ata, akandoro ki gbandaka.’

28Ono fuo zinga mi be kpio, mi andú ku mbata yo fu roni ku Gariraya yo.”

29Petero ki ya fu ko, “I navura manga agu yo i koto akota dunduko, ka mi akóta nga ya.”

30Yesu ki ya fu ko, “Ya mi foro ni rengo, areme, ni gi yuru re, mo aóra rimore aora bara biata, mbata bakondo nikakua bara ue.”

31Petero ki gumba ha agumba kakaka ki ya, “Ka ani vura kpi akpi na mo mi oro nga rimoro te.” Agu yo ki mongo poi kina wo dũ.

32I ki da rogo gu ba nangia Getesemane. Yesu ki ya fu gako abawiriki, “Oni súngu erẽ mi kpari fu Mbori.”

33Ko ki rogo aPetero na Yakoba na Yoane fuo ko, pai ki tona iriwo ti ko gbe, ko ki nirungo arungo ni rengo.

34Ko ki ya fu yo, “Mbisimore nazinga gbe kina koyo du kpio ni. Oni nyé erẽ ka angera.”

35Ko ki ndu ku mbata yo ngbutuko, ki ti sande, ki nikpari fu Mbori, si ya du wa ka ragoho susi, si susi ko.

36Ko ki ya, “Aba, Buba, omero rengbe na apai dũ; mo dí gi inga be re re; ono ka si du nga wa mi akpi nyemu he ya, wa kina mo akpi nyemu he.”

37Ko ki ye, ki bi yo i nira ara, ko ki ya fu Petero, “Simona mo ra? ka mo ngere nga a saa du sa te?

38Oni ngére ki nikpari, oni ka rima ku rogo asada. Toro nakpi nyemu he ni rengo, borose anyaka nga ya.”

39Ko ki ndu berewe, ta kpara nigumba kina agu apai ko agumba ha mbata.

40Ko ki ye berewe, ki bi yo i nira ara, bambiko bangiriyo arõi arõa; ka i aina nga gu pai ka i karaga fu ko ya.

41Ko ki ye bara biata, ki ya fu yo, “Oni rá ara wa du rago a re ka ongoda! Si rengbe; ragoho da; i fu Wiri boro ku vurube aboro ingapai.

42Oni gúari, ani ndú; oni ngére gu ni nikakusa re ni mbedi.”

43Si kina ku ngbako, Yuda ki ye aye ni ba sa nga gu ko naadu dagba agu yo nanidu bawe na ue, na rimbasa fuo ko na asape a angbondo, yo du abairamotumo ni na abakeapai a ga aYudo abaakumba.

44Were gu ko nakusi ko, ko aima ringbisa ha fu yo, ki ya, “Gu boro mi ka dungo ni ko du; oni ki zi ko ki ndu na ko wenengaĩ.”

45Ho ko ada ni, ko ki ye aye koyo du Yesu ni ni ba sa, ki ya, “Bayugupai,” ki dungo ko gbe.

46I ki moi beyo ti Yesu ki zi ko.

47Gu kumba naaru dagba agu yo nadu ho, ko ki mo gako sape ki ta ga gbiamotumo moyambu ki yere tuko.

48Yesu ki karaga ha ki ya fu yo, “Sa oni re ni batuka, ye oni ti ni na asape na angbondo ka zia re?

49Wa ani adu na oni yekaru yo na uru niyugu pai, oni azia nga re te; mangi gere Ziazia Kekeapai da ti rengo.”

50I ki mongo guari aguari pati ko du, ki oro.

51Paranga ki nipe ko, naba pusi remu ti kungba kpotoko; i ki zi ko;

52ko ki he pusi remu ahe ki oro ni kundiriko.

53I ki ndu na Yesu koyo du gbiamotumo ni; abairamotumo ki dungura tiyo ku ho na ko na ga aYudo abaakumba a abakeapai dunduko.

54Petero naape ko tuturu, kina ku tii mburu gu bambu yo nga ga gbiamotumo; ko ki sungu na amoyambu niawu we.

55Were abairamotumo na abororondo dunduko i agbata pai agbata kuti Yesu ka imo ko; ka i abi nga pai sa ko ya.

56Bambiko dungu aboro naagumba zire kuti ko, ka gayo zire arengba nga ya.

57Agu yo ki guari ku ari ki nigumba zire kuti ko, niya,

58“Ani agi he, ko aya, ‘Mi agbárasa gi yekaru re i adua ni be, rame ki du biata mi ki dua kura ha ka i adua nga ha ni be ya.’ ”

59Ka gayo zire arengba nga wo a ya.

60Gbiamotumo ki guari aguari ku ari dagba yo, ki sana Yesu, ki ya, “Mo akaraga nga pai te? Gini pai agi aboro agumba kuti ro were?”

61Ko ki ongo aonga, ka ko akaraga nga pai ya. Gbiamotumo ki sana ko berewe, ki ya fu ko, “Kristo nga mo nga Wiri gu ko i natambua ko?”

62Yesu ki ya, “Mi nga ko; oni abi Wiri boro ko sungu pati kumbabe tandu niye rogo mai ngbangbaturũ yo.”

63Gbiamotumo ki siri gako aroko, ki ya, “Gini pai ani akpi nyemu aboro gumba ha kuti ko berewe?

64Oni gi gberãngba yo; ya oni wãi?” I ki mongo ya aya dunduko, kpi ko ngba.

65Agu yo ki tona sukuda ko, ki dadi kpakpuko, ki nituturã ko, ki niya fu ko, “Mo gúmba pai ke!” Amoyambu ki nita ko ni beyo.

66Wa Petero adu sande tii mburu bambu, ga gbiamotumo de pangbadimo ki ye sa;

67ki bi Petero ko niawu we, ri ki ngana ko, ki ya, “Oni nidu a na gu boro Nazareta nga Yesu.”

68Ko ki ti kangu he ati, ki ya, “Mi aina nga ha te, mi aruga nga tire na gu pai mo agumba ha te.” Ko ki kuru ku ngbadimo; bakondo ki kua.

69De pangbadimo ki bi Petero, ki tona ya berewe fu agu yo narundu ho, “Ko nidu dagba yo.”

70Ko ki ti kangu he ati berewe. Fuo ho ngbutuko agu yo naarundu ho, i ki ya berewe fu Petero, “Mo nidu dagba yo ni rengo; bambiko mo nga boro Gariraya.”

71Ko ki tona sara wa tiko nyanyaki ki nizunga he, niya, “Mi aina nga gu kumba oni agumba pa ko te re.”

72Bakondo ki kua akua berewe ni ba sa. Petero ki tingidi gu pai Yesu agumba fu ko, wa ko aya, “Mo aóra rimore aora bara biata mbata bakondo nikakua bara ue.” Wa ko aberã ha ko ki nikpari akpara ni aume.