Zechariah 1

Zande

Jump to: Chapter 2 →

1Ti muambi diwi, ti gu ue garã zogarago nga ga Darayawesa, sangba Yekova ki ye koyo du Zekaraya ni nangia wiri Berekaya, Berekaya angia wiri Ido, Ido ki ngia nebi, ki ya,

2“Yekova azingi gbe fu abaroni.

3Si du mo ka ya fu yo ti ni, Ya Yekova nga ga arimbasa ko wẽ: Oni káraga tironi kono du mi ni, wo poi Yekova nga ga arimbasa ko, mi ki karaga tire koyo du oni ni, wo poi Yekova nga ga arimbasa ko.

4Ka oni dú nga wa abaroni ya, nga agu yo agu anebi naadu mbata agumba pai fu yo niya, ‘Ya Yekova nga ga arimbasa ko wẽ, Oni káraga tironi ti gaoni gbigbita asino na gaoni gbigbita mangaapai.’ Ono i agia nga ha watadu dega tuyo fere a te, wo poi Yekova.

5Abaroni, wari du yo ni? Na anebi, i nye ni ungayo kindi?

6Ono gimi apai na gimi rugaapai, nga gu mi arugu gimi amoyambu na ni nangia anebi, si adusia nga abaroni ki zi yo te? Si du i asa gayo berã ki ya, Wa Yekova nga ga arimbasa ko aberẽ pa manga na ani tipa gaani asino na gaani mangaapai, wo ko amangi rani.”

7Ti 24 rame nga ga 11 diwi nga gu diwi nga Sebata, ti ue garã zogarago nga ga Darayawesa, sangba Yekova ki ye koyo du Zekaraya ni wiri Berekaya, Berekaya angia wiri Ido, Ido ki ngia nebi. Zekaraya ki ya,

8“Mi nibi he yuru, mo ngére, kumba nioro ri farasi du ni zamba ru! Ko niru dagba angua adasi ngboongboorago yo; afarasi ki ru ku gii ko yo gu ru ni zamba ru, gu ru ni arara ru, gu ru ni pusi ru.

9Mi ki ya, ‘Ako gi gbia, gini ahe nga agere?’ Gu maraika nafu na mi ki ya fere, ‘Mi ayúgo pa agu ahe nga ha foro.’

10Si du gu kumba naru dagba angua adasi ki karaga ha ki ya, ‘Agi yo re nga agu yo Yekova akedi yo i ndu ku bani na ku bani ka kparia pa kpotosende.’

11I ki karaga ha fu ga Yekova maraika naru dagba angua adasi, ‘Ani ndu auru kpotosende, mo ngére, kpotosende dunduko du zezeredi.’

12Ga Yekova maraika ki ya, ‘Ako Yekova nga ga arimbasa ko, rago agíza waĩka mo aina nga pai fu Yerusarema na fu agu abaakporo nga ga aYudo, nga gu ngbaduro aimi fu he tipa gi garã 70 re ya?’

13Yekova ki karaga pai fu gu maraika nafu na mi ni wene apai na wasawasa apai.

14Si du gu maraika nafu na mi ki ya fere, ‘Mo kpári ku ari, Ya Yekova nga ga arimbasa ko wẽ: mi de ringo tipa Yerusarema na tipa Siona ki susi.

15Mi du na bakere zinga fu arikaaboro nga agu yo du zezeredi; bambiko ho mi adu ni na zinga ngbutuko i ki nindu na gbigbitapai kindi.

16Si du, ya Yekova wẽ, mi karaga tire ku Yerusarema yo na wene nunga aboro. I adúa gi bambu rogo ho, wo poi Yekova nga ga arimbasa ko, i ki taĩ giri ringbisaahe ri Yerusarema.

17Mo kpári berewe, Ya Yekova nga ga arimbasa ko wẽ: Gimi abaakporo akia berewe na wenepia, Yekova angárãsa Siona berewe ki sia Yerusarema berewe a.’ ”

18Mi atuka bangire ki bi, mo ngére, agbanga nya biama ki du!

19Mi ki ya fu gu maraika nafu na mi, “Agini ahe nga agere?” Ko ki karaga ha fere, “Agere nga agu agbanga nagbandaka Yuda na Yisaraere, na Yerusarema.”

20Yekova ki yugu apangu fere biama.

21Mi ki ya, “Agi yo re naye ka manga gini he?” Ko ki karaga ha, “Agi yo re nga agu airaome nagbandaka Yuda, si du ka boro atúmba nga rini ya; agi yo re ye ka gundesi yo, ka roga gu ome ku sa yo nga ga arikaaboro nga agu yo nakusa gayo ome kuti ringara Yuda ka gbandaka ha.”

Jump to: Chapter 2 →