Zechariah 2

Zande

← Chapter 1 Jump to: Chapter 3 →

1Mi atuka bangire ki bi, mo ngére, boro na giri ringbisa ahe be ni!

2Mi ki ya, “Wari mo andu ku ho ni?” Ko ki ya fere, “Ka ringbisa Yerusarema, ka bi bakia pati he na bagiza ha.”

3Mo ngére, gu maraika nafu na mi ki kuru ku mbata yo, kura maraika ki kuru ku mbata yo berewe ka gbia ko,

4ki ya fu ko, “Mo óro, ka gumba ha fu paranga kumba, ya, ‘Yerusatema adú wa agu akporo zanga angapa pati he, bambiko rimbasa aboro na rimbasa zogozogo anya rogo ho.

5Bambiko mi adú fu he wa ngapa we pati he kirikiri, wo poi Yekova, mi ki du wa taarimo rogo ho a.’ ”

6Oi! oi! Oni gúari nodiyo, wo poi Yekova; bambiko mi kparaka roni ku gii ngbi yo wa agu ayuge du biama nga ga angbangbaturũ, wo poi Yekova.

7Oi! Oni mérẽ ku Siona yo, agu roni ninaraka na aboro Babera.

8Bambiko wa ga Yekova taarimo akedi re koyo du agu arikaaboro ni naagbu roni, bambiko gu ni nazadi roni ni azadi kina rindi bangiriko, fuo ho Yekova nga ga arimbasa ko aya:

9“Oni ngére, mi azígizo bere ku ri yo, i adú ni úgbu ahe fu agu yo namanga sunge fu yo. Oni ki ini he ya Yekova nga ga arimbasa ko nakedi re.

10Ako aboro Siona; oni bi bia ki ningi, bambiko oni ngére, mi naye, mi nikaraka dagba roni, wo poi Yekova.

11Dungu arikaaboro nikakpamia tiyo kuti Yekova ni gu uru re, i ki du ni gimi aboro; mi ki niraki dagba roni,

12oni ki ini he ya Yekova nga ga arimbasa ko nakedi re kono du oni ni. Yekova adia ngbatunga Yuda ni gako aboro rogo kparakpara ziazia ringara, ki sia Yerusarema berewe.”

13Aboro dunduko, oni óngo bara bangiri Yekova; bambiko ko tumba tiko rogo gako kparakpara ziazia baraka yo.

← Chapter 1 Jump to: Chapter 3 →