Zechariah 12

Zande

← Chapter 11 Jump to: Chapter 13 →

1Gu pa rungo nga ga sangba Yekova tipa aYisaraere: Ya Yekova wẽ naazaraga angbangbaturũ ki moi mburu kpotosende ki fu toro boro ku kpotoni yo:

2“Mo ngére, mi nikasa Yerusarema si du ni inga kio fu aboro dunduko du pati he kirikiri; si adú a wo kuti Yuda rago runguru kuti Yerusarema.

3Ti gu rago re mi asá Yerusarema wa rõrõi mbia fu aboro dunduko; agu yo dunduko nikatumba ha i aimisa tiyo gbe. Arikaaboro dunduko nga ga kpotosende yo amóngo ye kuti he a.

4Ti gu rago re, wo poi Yekova, mi afu kiga fu afarasi ni ba sa sa, na nzanga fu abandurira. Ono mi azá bangire ka berã pa angbatunga aYudo, ho mi ka fu vurari ni fu afarasi dunduko nga ga aboro ra.

5Agbia aYudo aya ni tiyo, ‘Araki Yerusarema yo du na ngarã bambiko Yek ova nga ga arimbasa ko, nga gayo Mbori.’

6“Ti gu rago re mi asá agbia aYudo wa ngariangaria akoro dagba nyake yo, wa mirãwe nzinga dagba vodivodi zende ahe; i ki riti aboro dunduko ku kumbabe na ku garebe yo pati Yerusarema kirikiri, ho Yerusarema ka du ni ku baha yo kindi na araki rogo no.

7“Yekova afú diabese fu agu abamburoko nga ga aYudo mbata, ya ka i abia nga pa gu taarimo nga ga ngbatunga Dawidi gu taarimo nga ga araki Yerusarema yo ki susi ku ri gu nga ga aYudo ya.

8Ti gu rago re Yekova abánda araki Yerusarema yo, si du gu ni du ni rurungbura ni ki susi dagba yo yo ti gu rago re, ni adú wa Dawidi, ngbatunga Dawidi ki du wa Mbori, wa gu maraika nga ga Yekova ko, du ku mbata yo fu yo.

9Ti gu rago re mi agbáta pa gbarasa arikaaboro dunduko nga agu yo nikaye sa Yerusarema.

10“Mi aúka toro undahe ku ri ngbatunga Dawidi na ku ri araki Yerusarema yo na kpesarawati, si du, ho i ka ngera ni koyo du gu ko ni i arú ko, i atá ngbaduyo tipa ko, wa boro nata ngbaduni tipa bangisa wirini, ki nikpari ni kere he tipa ko, wa boro nakpara tipa bambata wirini.

11Ti gu rago re gu kpenunga nikadu Yerusarema yo si adú ni bakere he wa gu kpenunga nadu tipa Adadarimona rogo kpasakpasa rago Megido yo.

12Aboro ringara atá ngbaduyo, ngbatunga aboro ni ba sa sa ni tiyo; ngbatunga ga Dawidi aborokporo ni tiyo, na adiayo ni tiyo, ngbatunga ga Natana aborokporo ni tiyo, na adiayo ni tiyo;

13ngbatunga ga Revi aborokporo ni tiyo, na adiayo ni tiyo; ngbatunga ga Semaya aborokporo ni tiyo, na adiayo ni tiyo;

14na agu angbatunga dunduko nga ga agu yo naanye, agu yo ni tiyo, na adiayo a ni tiyo.

← Chapter 11 Jump to: Chapter 13 →