Zechariah 8

Zande

← Chapter 7 Jump to: Chapter 9 →

1Sangba Yekova nga ga arimbasa ko ki ye kono du mi ni, niya,

2“Ya Yekova nga ga arimbasa ko wẽ: Mi de ringo ti Siona ni bakere deringo, mi de ringo ti ni na bakere ngariangaria zinga.

3Ya Yekova wẽ: Mi akaraga tire ku Siona yo, ki niraki Yerusarema yo, i ayámba Yerusarema nga bakporo rengo, na gu bagangara nga ga Yekova nga ga arimbasa ko, i aya ti ni kparakpara ziazia bagangara.

4Ya Yekova nga ga arimbasa ko wẽ: Gbinza akumba na gbinza ade asúnga berewe ti agene bakporo Yerusarema, i dunduko na ngau beyo bambiko wa du yo ni gbinza yo gbe.

5Agene bakporo ki hi be akumbagude na adegude i ningi ngba gaha agene bakporo.

6Ya Yekova nga ga arimbasa ko wẽ: Ka si du ni iiriwo pai bangiri gu yangara aboro ti agi arame re, si adú nga ni iiriwo pai a wo bangire te? wo poi Yekova nga ga arimbasa ko.

7Ya Yekova nga ga arimbasa ko wẽ: Mo ngére, mi abatasa gimi aboro be aboro ringara ku uroyo na be aboro ringara ku dioyo.

8Mi ki yega na yo i niraki bangbanda Yerusarema. I ki du ni gimi aboro mi ki du ni gayo Mbori, ni ndikidi pai na ni rurupai.”

9Ya Yekova nga ga arimbasa ko wẽ: “Beroni aú nyanyaki, agu roni nagia agi apai re wa du rago re ngba anebi, tona ti gu rago i amoi mburu ga Yekova bambu nga ga arimbasa ko, ka dua yekaru.

10Bambiko mbata fu agu arago re mosoro sunge adu nga te tipa aboro watadu mosoro sunge tipa anya a te, wiri zereda adu nga ho fu gu boro nakura bakporo yo ki nirimi berewe te, bambiko fudifudipai; bambiko mi zingisi aboro ni ba sa sa gu ni kuti kura ni.

11Ono mi amánga nga pai awere fu yangara agi aboro re wa si adu ti gu rago naadu mbata te, wo poi Yekova nga ga arimbasa ko.

12Bambiko i arú zereda wa wenepia; bakakue azúka zuzu he, sende ki nizugasi gaha idiidi ahe, angbangbaturũ afú ure; mi ki idi he fu gi yangara aboro re i du ni adikumbo agi ahe dunduko re.

13Ako ngbatunga aYudo na ngbatunga aYisaraere, wa oni adu ni úumohe dagba arikaaboro mbata, kina wo mi ka batasa roni oni ki du ni airamaku. Ka oni gúnde nga ya, ono beroni dú nyanyaki.”

14Bambiko ya Yekova nga ga arimbasa ko wẽ: “Wa mi aberẽ pa manga roni na gbigbitapai, ho abaroni azingisi re ni sa zinga, ka mi asa nga gi berã ya, wo poi Yekova nga ga arimbasa ko,

15kina wo berẽ mi he berewe ti agi arago re ka manga wenepai fu Yerusarema na fu ngbatunga aYudo; ka oni gúnde nga ya.

16Gere nga agu apai oni ka amanga: Oni gúmba rengo fu akuaroni, oni sári gaoni sarangbanga rogo gaoni bakporo rogo rengo nikakusa kina pa zereda,

17ka oni bérẽ nga pa gbigbitapai ku kpotoroni yo kuti akuaroni ya, ka oni kpi nga nyemu gu zungahe du ni zire a ya, bambiko agi apai dunduko re mi nasoga ha, wo poi Yekova.”

18Sangba Yekova nga ga arimbasa ko ki ye kono du mi ni niya,

19“Ya Yekova nga ga arimbasa ko wẽ: Gu gina riahe nga ga biama diwi, na gu gina riahe nga ga bisue diwi, na gu gina riahe nga ga saba diwi, na gu gina riahe nga bawe diwi, si adú fu ngbatunga aYudo no rogo wasa na ngbarago, ni rago wene apumbo; si du ka oni akpi nyemu rengo ti ni na pa zereda.

20“Ya Yekova nga ga arimbasa ko wẽ: Si ayé ka du wa gere ya aboro ayé, zavura araki rogo dungu abaakporo vurũ;

21araki rogo gu bakporo sa ata ndu koyo du akurayo ni, niya, ‘Ani ndú ni ba sa ka zungadi Yekova tipa wenepai, na ka gbata Yekova nga ga arimbasa ko. Mi nandu a.’

22Dungu aboro na nyanyaki arikaaboro ayé ka gbata Yekova nga ga arimbasa ko Yerusarema yo na ka zungadi Yekova tipa wenepai.

23Ya Yekova nga ga rimbasa ko wẽ: Ni gu rago re akumba bawe nikazada ga gu boro Ebere bauk idi, ki ya, ‘Ani ndú na mo, bambiko ani gi f e ya Mbori du na mo.’”

← Chapter 7 Jump to: Chapter 9 →