Zechariah 7

Zande

← Chapter 6 Jump to: Chapter 8 →

1Ti gu biama garã zogarago nga ga Bakindo Darayawesa, sangba Yekova ki ye koyo du Zekaraya ni, ti biama rame nga ga ribua diwi, nga gu diwi nga Kisireu.

2Agu aboro nadu Betere yo akedi Saresere na Regeme-mereke na gayo akumba, ka zúngadi Yekova tipa wenepai,

3na ka sana aboromotumo nga ga ga Yekova bambu yo, nga ga arimbasa ko, na anebi tipa pai, “Mi kpari ni aume ki gina riahe ti bisue diwi, wa mi anamanga ha tipa dungu agarã?”

4Si du sangba Yekova nga ga arimbasa ko ki ye kono du mi ni ki ya;

5“Mo yá fu aboro ringara dunduko na fu aboromotumo, Ho oni nagina riahe ni ki nita ngbaduroni ti bisue diwi na ti saba diwi a, tipa agi 70 agarã re, si adu tipa re, nga gu gina riahe oni agina ha re?

6Ho oni nari riahe ni na ho oni nambira he ni, oni ari nga he tipa kina pa roni ki nimbiri he tipa kina pa roni te?

7Ho Yerusarema adu ni na araki rogo ho na wenepia, na gaha abaakporo pati he kirikiri, na ku sudiyo na ringara ku ngboongboorago yo adu na araki rogo ho a, a nga agi apai re nga gu Yekova ataki pande he ku ngba agu anebi naadu mbata, te?”

8Sangba Yekova ki ye koyo du Zekaraya ni, niya,

9“Ya Yekova nga ga arimbasa ko wẽ, Oni sári ndikidi sarangbanga, oni yúgu weneringise oni ni ba sa sa fu awirinaroni,

10ka oni rúngosi nga adekurugbo ya, na awirinyaure, na gu kungba yeye aboro, watadu gu rungorungo yo a ya; ka gu boro sa dagba roni yo bérẽ nga gbigbitapai ku kpotoni yo kuti wirinani ya.”

11Ono i aka pa dega tuyo sa gu pai re, ki sa giiyo, ki kisi tuyo i ka gia pai.

12I anyakasi ngbaduyo yo nyanyaki wa mbia, i ka gia gu rugute na agu apai nga gu Yekova nga ga arimbasa ko akedi he ngba gako Toro ku ngba agu anebi naadu mbata. Si du bakere zinga ki ye be Yekova nga ga arimbasa ko.

13Yekova nga ga arimbasa ko ki ya, “Wa mi ayambu he, ka i akpi nga nyemu ka gia pa re ya, si du i ki yambu he, ka mi akpi nga nyemu ka gia pa yo a ya,

14mi ki gbandaka yo na bayuge ku dagba arikaaboro yo nga agu yo i aina nga yo ya. Si du gu ringara i ambu he re adu ni bate, ka boro asusa nga ku bani na ku bani rogo ho ya, gu bawene ringara re adu ni gbarasigbarasi he.”

← Chapter 6 Jump to: Chapter 8 →