Zechariah 9

Zande

← Chapter 8 Jump to: Chapter 10 →

1Gu pa rungo nga ga sangba Yekova si du kuti ringara Adaraka, si adá ku ri Damaseke a. Bambiko agu abaakporo nga ga Arama si nga ga Yekova, a wa du angbatunga aYisaraere dunduko a:

2Amata a, du bangbandaha yo, Tura na Sidona, ka si vura du na bakere tatamana vuru.

3Tura adua nyanyaki aba tipa tihe, ki ba guta feda wa nvutu, na dahabu wa agu aguguda zirĩ ahe du pangba gene bakporo.

4Ono mo ngére, Yekova aróga gaha aúkporo be he, ki bafu gaha ũkumuko ku baime tikpo yo, we ki riti bakporo tigaha.

5Asekerona abi he, ki gunde mbiko ho; Gaza a, si ki niimi aima gbe; Ekerone a, bambiko i mungosi gaha maabangirise. Bakindo akpi Gaza yo; Asekerona adú ni bate;

6kodikodi ngbatunga aboro aráka Asedodo yo; mi ki digisi gu ruka nga ga aFereseto.

7Mi adia kure amotumo ngbayo yo ku sa yo, na gayo kere gbegberẽ asino dagba rindiyo yo; gayo ringara anyé tipa gaani Mbori a; si adú wa gbia dagba Yuda, Ekerone ki du wa aYebuso.

8Mi tigimi adú pati gimi aborokporo wa babandarago, ka boro atá nga pati gi kporo ku bani na ku bani ya; barungosi aboro agbárasa nga yo berewe te, bambiko mi bi he ni bangire awere.

9Ako aboro Siona, oni dú pusiapusia gbe! Ako aboro Yerusarema, oni tá wawa! Oni ngére, gaoni bakindo naye koyo du oni ni; irarengo nga ko du na diabese, du na umbasitise nisungu auru badongi, nga kina paranga wiri nadongi.

10Mi adia ngbagidavura be Efuraima ku sa yo, na farasivura Yerusarema yo; ki di mbotovura ku sa yo, ko arúga pa zereda fu arikaaboro; gako zogarago atona ti gu baime tikpo sa gu baime tikpo, ki tona ti gu Di sa digida kpotosende.

11Tipa ro a, bambiko gu kure nga ga gi zungahe na mo, mi akúsa gamo zizi yo zezeredi rogo gu due zanga ime.

12Ako zizi aboro du na maabangi rise, oni káraga tironi sa gaoni nyanyaki ba; areme taki mi pande he ya mi akaraga ahe fu roni wa bara ue.

13Bambiko mi nuga Yuda wa gi mboto; mi sa Efuraima ni gaha guanza. Ako Siona mi avúgumo awiro, ku ri awiro, Ako Era, mi asáka ro wa ga iranyaka basape.

14Yekova akúra ku ba ri yo, gako guanza ki kuru wa ikpira gumba; Gbia Mbori avúda mbanya, ki nidanga ku mbata yo rogo gugugu yuge naye sudiyo.

15Yekova nga ga arimbasa ko nikabanda yo, i ki nyasi avurayo ki simbi yo wa wiri mbia barioko ku sande; i ki nimbiri he ki nifura wa akpiimekakue, ki hi be he wa hi kurungbu be gu kure du ti atukpu bamotumo.

16Ti gu rago re Yekova gayo Mbori abátasa yo, bambiko i nga gako rimbasa aboro; bambiko wa agu ambia fongo du ti kpakpari bakindo wo i ka kĩ rogo gako ringara.

17Ii, na ngba pa gu rago re, si adú ni bawene he ki susi! Zende ahe amánga paranga akumba, kpotoyo aúa be he, vovo imekakue ki mangi paranga ade a wo.

← Chapter 8 Jump to: Chapter 10 →