Zechariah 5

Zande

← Chapter 4 Jump to: Chapter 6 →

1Mi atuka bangire berewe ki bi, mo ngére kaĩkaĩ waraga ki nigu!

2Ko ki ya fere, “Gini he mo abi?” Mi ki karaga ha, “Mi bi kaĩkaĩ waraga si nigu; bagizaha wa bagiza mbiribe 20, na bakia patihe wa bagiza mbiribe bawe.”

3Ko ki ya fere, “Gere nga gu motiwa nga gu nandu ku ri aringara dunduko; bambiko agu aboro dunduko nadĩ he i aroga yo ku sa yo tona awere ku sangba ha yo, agu aboro nazunga he ni zire i aróga yo ku sa yo tona awere ku sangba ha yo a.

4Miakédahakumbatayo, wo poi Yekova nga ga arimbasa ko, si ki rimi ku dimo ku iradĩ yo, na ku dimo ku gu ni yo nazunga he ni zire ti rimore. Si ki nye dimo kpuni yo daho si ka nyasa ha ni dunduko, angua bambu na ambia a.”

5Si du gu maraika nafura na mi ki gbisi ku mbata no ki ya fere, “Mo túka nga bangiro, ka bi gine nga gu nakura re.”

6Mi ki ya, “Gini he nga ha?” Ko ki ya, “Si nga úringbisahe nakura rengbe na aritere 37.” Ko ki ya, “Gere nga kpia gu irairapai du rogo ringara dunduko.”

7Mo ngére, I ki ukua pipi ngba ha du ni kpano, mo ngére, de ki sungu vuru uringbisahe yo!

8Ko ki ya, “Gere nga Gbegberẽpai.” Ko ki ba ri ku vuru uringbisahe yo berewe, ki gbingbida pipi ngba ha du ni kpano ku ngbaha.

9Mi ki tuka bangire ki bi, mo ngére, ade ue ki niye ku mbata no! Bayuge adu ti pupoyo; i adu na apupo wa pupo gonyo, i ki tumba gu uringbisahe ku dagba kpotosende na ngbangbaturũ.

10Mi ki ya fu gu maraika nafura na mi, “Wari i andu na uringbisahe ku ho ni?”

11Ko ki ya fere, “Ku ringara Sinara yo, ka dua bambu tipa ha; ho i ka mbakada ha ni, i amáa uringbisahe sande ni mburuhe.”

← Chapter 4 Jump to: Chapter 6 →