Genesis 13

Amharic Dawro DFBE (ጌሻ ማጻፋ) No Year

← Chapter 12 Jump to: Chapter 14 →

1ሄዋ ድራዉ አብራመ ባረ ማቻትናነ፥ ባረዉ ደእያዋ ኡባና ግብጼፐ ነጌባ ባዙዋ ቤዳ፤ ሎጸካ አናና ቤዳ።

2አብራመ ሄ ዎደ ሚዛ፥ ብራንነ ዎርቃን ዳሪ ዱረቴዳ።

3እ ነጌባፐ ደንዲደ ቤቴለ ጋካናዉ ቤዳ፤ ሄ ሳአይነ ቤቴለፐነ አይፐ ግዱዋን እ ኮይሮ ባረ ዱንካንያ ጌዳ ሳኣነ

4ያርሽያ ሳኣ እ ኮይሮ ኬጼዳ ሳኣ። ያን አብራመ መና ጎዳ ሱን ጼሴዳ።

5አብራመና ዩይያ ሎጸዉካ ሚዛይ፥ ዶርሳ ዉዲነ ዱንካኒ ደኤ።

6ሽን ኡንቱንቱ እትፐ ደአናዉ ኡንቱንቶ ቢታይ ግድቤና፤ ኡንቱንቶ ዳሮ መሂ ደእያ ድራዉ፥ ኡንቱንቱ እትፐ ደአናዉ ዳንዳይበይክኖ።

7ሄዋ ጋሱዋን አብራሞ ዉድያ ሄምያዋንቱ ግዶንነ ሎጸ ዉድያ ሄምያዋንቱ ግዶን ዋላሳይ ከሴዳ። ሄ ዎደ ካናናቱነ ፓርዘቱ ሄ ጋድያን ደእኖ።

8ያንና አብራመ ሎጻ፥ “ኑን እሻቱዋ ግድያ ድራዉ፥ ታ ግዶንነ ነ ግዶን፥ ታ ዉድያ ሄምያዋንቱ ግዶንነ ነ ዉድያ ሄምያዋንቱ ግዶን ዋላሳ ከሶፓ።

9ቢታ ኡባይ ነ ስንን ደኤኔ? አነ ኑን ሻከቶይተ፤ ኔን ሀድርሳ ባጋ ቦፐ፥ ታን ኡሸቻ ባጋ ባና፤ ኔን ኡሸቻ ባጋ ቦፐ፥ ታን ሀድርሳ ባጋ ባና” ያጌዳ።

10ሎጸ ዩይ አ ጼሊደ፥ ዮርዳኖሳ ሻፋ ዎምባይ ኡባይ ቢደ ዞኣራ ጋካናዉ፥ መና ጎዳ ገነትያ ዎይ ግብጼ ቢታ ማላ ዳሮ ሃይ ደእያዋ ግድያዋ በኤዳ። (ሄዌነ መና ጎዳይ ሶዶማነ ጋሞራ ጌተትያ ካታማቶ ይሳናፐ ካሰ)።

11ሄዋ ድራዉ ሎጸ ባረዉ ዮርዳኖሳ ዎምባ ኡባ ዶሪደ፥ አዋይ ዶልያ ባጋ ቤዳ፤ ያትና ኡንቱንቱ እቱ እትዋፐ ሻከቴድኖ።

12አብራመ ካናነ ጋድያን ደኤዳ፤ ሽን ሎጸ ዎምባን ደእያ ዎልቃማ ካታማቱዋ ግዱዋን ኡቲደ፥ ሶዶማ ካታማ ማታን ባረ ዱንካንያ ጌዳ።

13ሄ ዎደ ሶዶማ አሳቱ ኢታነ መና ጎዳ ቦላ ፓላ ናጋራ ኦያዋንታ።

14ሎጸ አብራመፐ ሻከቴዳዋፐ ጉየ፥ መና ጎዳይ አብራማ ሀዋዳን ያጌዳ፤ “ቁ ጋደ ኔን ደኢያሳፐ አዋይ ዶልያ ባጋነ አዋይ ዉልያ ባጋ፥ ቃይ ሁጲሳ ባጋነ ገድሳ ባጋ ጼላ።

15ሀ ኔን ጼልያ ቢታ ኡባ ታን ነዉነ ነ ዛርያዉ መናዉ እማና፤

16ታን ነ ዛርያ ሳኣ ሻፍያዳን ዳርሳና፤ ኦንነ ሳኣ ሻፍያ ፓይዳና ዳንዳዮፐ፥ ነ ዛሪካ ፓይደታና።

17ደንዳ፤ ቢታ ጎምፓን ፑደነ ዱገነ ህንነ ሃነ ሀመታደ በአ፤ አያዉ ጎፐ፥ ታን ሀ ቢታ ነዉ እማና” ያጌዳ።

18አብራመ ባረ ዱንካንያ ሾዲደ፥ ከብሮነ ካታማን ደእያ ማምረ ዎላቱዋ ዎጋቱዋ ማታን ደአናዉ ቤዳ። ሄዋን መና ጎዳዉ ያርሽያ ሳኣ ኬጼዳ።

← Chapter 12 Jump to: Chapter 14 →