Genesis 38

Amharic Dawro DFBE (ጌሻ ማጻፋ) No Year

← Chapter 37 Jump to: Chapter 39 →

1ሄ ዎደ ይሁዳይ ባረ እሻቱዋፐ ሻከቲደ፥ አዱላማ ግያ ካታማን ደእያ ሂራ ግያ ብታንያና ደአናዉ ቤዳ።

2ያን ይሁዳይ ሹአ ግያ ካናነ ናትና ጋከቴዳ፤ እ እዞ አኬዳ።

3እዛ አዉ ሻሃራደ አቱማ ናኣ የላዱ፤ አ ኤራ ሱንዱ።

4ቃይካ ሻሃሮ ዎደ አቱማ ናኣ የላዱ፤ አ ኦናና ሱንዱ።

5ቃይ ጉጃደካ አቱማ ናኣ የላዱ፤ አ ሼላ ሱንዱ። እዛ የሌዳዌ አክዚባ ግያ ቢታና።

6ይሁዳይ ባረ ባይራ ናኣ ኤራዉ ትእማሮ ግያ ማቻቶ እሜዳ።

7ይሁዳ ባይራ ናአይ፥ ኤር፥ መና ጎዳ ስንን ኢታ አሳ ግድያ ድራዉ፥ መና ጎዳይ አ ዎዳ።

8ይሁዳይ ኦናና፥ “ነ እሻ ማቻትኮ ገላደ፥ እዞ አካ፤ ነ እሻዉ ናኣ የላደ አ ጼስሳ” ያጌዳ።

9ሽን ኦናን የለትያ ናናይ ባረዋንታ ግደናዋ ኤሬዳ፤ ሄዋ ድራዉ ባረ እሻ ማቻትና ግስያ ዎደ አዉደነ፥ ባረ እሻዉ ናእ የለተና ማላ፥ ባረ ዘረ ቢታን ጉሴ።

10እ ኦዳባይ መና ጎዳ ስንን ኢታባ ግዴዳ ድራዉ፥ መና ጎዳይ አካ ዎዳ።

11ሄዋፐ ጉየ፥ ይሁዳይ ባረ ናኣ ማቻቶ ትእማሮ፥ “ታ ናአይ ሼል ድጫና ጋካናዉ ነ አዉዋ ሶ ባደ፥ አምኤተን ደአሻ” ያጌዳ። ሄዋ እ አያዉ ጌደ ጎፐ፥ እካ ባረ እሻቱዋዳን ሀይቃነንቶነ ጊደ ህርጌዳ ድራሳ። ሄዋ ድራዉ ትእማራ ባደ ባረ አዉዋ ሶን ደኣዱ።

12ዳሮ ዎድያፐ ጉየ ይሁዳ ማቻታ፥ ሹአ ናታ ሀይቃዱ። ይሁዳይ ባረ ካዩዋፐ ምነቴዳ ዎደ፥ ባረ ዶርሳ እስክያ ሜድያ አሳቱዋኮ ትምና ከሴዳ፤ ቃይ አ ላገ፥ አዱላምያ ሂር አናና ቤዳ።

13አሳይ ትእማሮ፥ “በአ፤ ነ ቦሉ ይሁዳይ፥ ባረ ዶርሳቱዋ እስክያ ሜዳናዉ ትምና ከሴዳ” ያጊደ ኦዴዳ።

14እዛ ባረ አምኤተ ማዩዋ ቃራዱ፤ ባረና ባለናዉ ሻሽያ አካደ ጉሎታዱ። ትምና አፍያ ኦግያ ዶናን ደእያ ኤናይማ ካታማ ፐንግያን ኡታዱ። ሄዋ እዛ ኦዳዌ፥ ሼል ድጭ ጋክንካ እዛ አዉ ማቻቶ ግዳናዉ እመታቤናዋ ኤሬዳ ድራሳ።

15ይሁዳይ እዞ በኤዳ ዎደ፥ ሻርሙጻቶ ጊደ ቆፔዳ፤ አያዉ ጎፐ፥ እዛ ባረ ዴሙዋ ጉሎታ ኡታዱ።

16ባረ ናኣ ማቻቶ ግድያዋ ኤረናን ደኢደ፥ ኦግያ ጋጻ ኢኮ ሺቂደ እዞ፥ “ታናና ግሳርኪ!” ያጌዳ። እዛ፥ “ታን ኔናና ግሶፐ፥ ኔን ታዉ አያ እማኒ?” ያጋደ ኦቻዱ።

17እ፥ “ታን ታ ዉድያፐ እት ዴሻ ማራ ነዉ የዳና” ያጌዳ። እዛ፥ “ኔን ሄዋ ታዉ የዳና ጋካናዉ አያ ኦኒ?” ያጋዱ።

18እ፥ “አያ ኦ?” ያጌዳ። እዛ፥ “ነ ማታፋ ዎያ ምግዱዋ፥ አ አያ ሳቂያነ ነ ኩሽያን ደእያ ጋትማ ኦይ” ያጋዱ። እ ሄዋንታ እሚደ፥ እዝና ግስና፥ እዛ አዉ ሻሃራዱ።

19እዛ ሄዋፐ ደንዳደ ቤዳዋፐ ጉየ፥ ባረ ጉሎ ሻሽያ ቃራደ፥ ባረ አምኤተ ማዩዋ ማያዱ።

20ይሁዳይ ባረ ኦይዳዋ ሄ ምሽራትፐ ዛር አካናዉ ዴሻ ማራ ባረ ላግያ አዱላማ ቦላ እዝዉ ኪቴዳ፤ ሽን እ እዞ ደምቤና።

21እ ሄ ቢታ አሳ፥ “ኤናይማ ካታማን፥ ኦግያ ዶናን ኡቴዳ ሻርሙጻ ምሽራታ ሀቃኔ?” ያጊደ ኦቼዳ። አሳይ፥ “ሻርሙጻ ማጫውና ሀዋን ኡባካ ባዋ” ያጌዳ።

22እ ይሁዳኮ ስሚደ አ፥ “ታን እዞ ደማበይከ፤ ሄዋ ቦላካ ሄ ቢታ አሳይ፥ ‘ሻርሙጻ ማጫውና ሀዋን ኡባካ ባዋ’ ያጌዳ” ያጌዳ።

23ይሁዳይ፥ “ባረ ኦይቄዳዋ ባረዉ አኩ፤ ሄዌ ዮፐ፥ አሳይ ኑና ሚጫና። ስም ታን እዝዉ ዴሻ ማራ የዳድ፤ ሽን ኔን እዞ ደማበይካ” ያጌዳ።

24ሄዙ አግና ኬሻፐ ጉየ አሳይ፥ “ነ ናኣ ማቻታ ትእማራ ሻርሙጻደ ሻሃራዱ” ያጊደ ይሁዳዉ ኦዴዳ። ይሁዳይ፥ “እዞ ካረ ከሲደ ታማን ጹግተ” ያጌዳ።

25እዞ ካረ ከስያ ዎደ፥ “ታን ሻሃሬዳዌ ሀ ሚሻ ጎዳሳ፤ በአ፤ ሀ ማታፋ ዎያ ምግዱ፥ አ አያ ሳቂነ ጋትማይ ኦዌንቶ ኤራና ዳንዳዮፐ ኤራ” ያጋደ ባረ ቦሎ ኪታ ኪታዱ።

26ይሁዳይ ሄ ሚሻቱዋ ኤሪደ፥ “ታፐ እዛ ጽላ፤ አያዉ ጎፐ፥ ታን እዞ ታ ናኣ ሼላዉ እማበይከ” ያጌዳ። ሄዋፐ ጉየ፥ እ እዝና ዛር ግስቤና።

27እዛ የላና ሀንያ ዎደ፥ እዝ ኡሉዋን ማንተ አቱማ ናናይ ደኢኖ።

28እዛ የልሺን፥ ኡንቱንቱፐ እቱ ባረ ኩሽያ ከሴዳ፤ ማርስያና፥ “በእተ፤ ሀዌ ኮይሮ ከሴዳ” ጋናዉ ዞኦ ቁንጩትያ አካደ አ ኩሽያን ቃቻዱ።

29ሽን እ ባረ ኩሽያ ጉየ አኬዳ ዎደ፥ አ እሻይ ከሴዳ፤ እዛ፥ “ኔን ዋና ፖር ጋደ ከሳዲ!” ያጋዱ። ሄዋ ድራዉ፥ ፓሬሳ ጋደ አ ሱንዱ።

30ሄዋፐ ጉየ፥ አ ኩሽያን ዞኦ ቁንጩቲ ደእያ አ እሻይ ከሴዳ፤ አ ሱንይ ዛራሀ ጌተቴዳ።

← Chapter 37 Jump to: Chapter 39 →