Genesis 9

Amharic Dawro DFBE (ጌሻ ማጻፋ) No Year

← Chapter 8 Jump to: Chapter 10 →

1ጾሳይ ኖሀነ አ አቱማ ናና ሀዋዳን ያጊደ አንጄዳ፤ “የለትተ፤ ጮርተ፤ ሳኣ ኡባ ኩምተ።

2ሳኣ ዶአቱ ኡባይ፥ ሳሉዋ ካፋቱ ኡባይ፥ ጋድያን ዎጽ ቃጽያባ ኡባይነ አባን ደእያ ሞለቱ ኡባይ ህንተንቶ ያይኖነ ዳጋምኖ። ኡንቱንቱ ህንተንቶ አደ እመቴድኖ፤

3ታን ሞክያ ዱማ ዱማ ካቱዋ ህንተንቶ እሜዳዋዳንካ፥ ሸምፑ ደእያ ዎጽ ቃጽያ መታ ኡባይ ህንተንቶ ቁማ ግዳና።

4ሽን ሱ ግዶን ሸምፑ ደእያ ድራዉ ሱይ አ ግዱዋን ደእያ አሹዋ ሞፕተ።

5ታን ህንተንቱ ሸምፑዋና ደእያ ህንተንቱ ሱ ዶኣ ኡባፐ ቱሙ አቻና፤ ቃይ አሳ ኡባፐ፥ አ ማላ አሳ ሱ አቻና።

6ጾሳይ አሳ ባረና ማላትሲደ መዳ ድራዉ፥ አሳ ሱ ጉስያ ኦናነ ግዶፐነ፥ አ ሱይካ አሳ ኩሽያን ጉካናዋ።

7ህንተንቱ የለትተ፤ ጮርተ፤ ሳኣን ዳርተ፤ አን ጮርተ” ያጌዳ።

8ሄዋፐ ጉየ፥ ጾሳይ ኖሀነ አናና ደእያ አ አቱማ ናና፥

9“ስም ሀእ፥ ታን ታ ጫቁዋ ህንተናና፥ ህንተፐ ጉየ ህንተንቱ ዘረናነ ፓጻ ኔናና ደእያ መታ ኡባና ጫቀታይ፤ ኤ፥ ታን ታ ጫቁዋ ካፉዋና፥ መህያና፥ ሳኣ ዶኣ ኡባናነ፥ ማርካብያፐ ህንተናና ከሴዳ፥ ሸምፑዋና ደእያ መታ ኡባና ጫቃይ።

11ታን ህንተናና ታ ጫቁዋ ጫቀታይ፤ ሀዋፐ ስንን ሸምፑ ደእያባይ ኡባይ ባሻ ሃን ኡባካ ባየና፤ ሀ ሳኣ ባይዝያ ሃይ ሀዋፐ ስንን ኡባካ ደኤና” ያጌዳ።

12ቃይካ ጾሳይ፥ “ታን ታፐነ ህንተፐ፥ ህንተናና ደእያ ፓጻ መታቱዋ ኡባፐ ግዱዋን ያና የለታ ኡባና ጫቀትያ ጫቁዋ ማላታይ ሀዋ፤

13ታን ታ ዙሉዋ ሻርያን ኤሳድ፤ እ ታፐነ ሀ ሳኣፐ ግዱዋን ደእያ ጫቆ ማላ ግዳና።

14ታን ሳኣፐ ቦላን ሻርያ አሄዳ ዎደነ ሻርያን ዙሉ ቤቴዳ ዎደ፥

15ታፐነ ህንተፐ ሸምፑ ደእያ ዱማ ዱማ ቆሞ መታ ኡባፐ ግዱዋን ጫቀቴዳ ታ ጫቁዋ ሀሳያና፤ ፓጻ ደእያዋ ኡባ ይሳናዉ ሀዋፐ ስንን ኡባካ ባሻ ሃይ ዬና።

16ዙሉ ሻርያን ቤቴዳ ዎደ አዉደነ፥ ታን አ በአና፤ ታፐ ጾሳፐነ ሀ ሳኣ ቦላን ሸምፑዋና ደእያ ዱማ ዱማ ቆሞ መታ ኡባፐ ግዱዋን ጫቀቴዳ መና ጫቁዋ ታን ሀሳያና” ያጌዳ።

17ጾሳይ ኖሀ፥ “ታን ታፐነ ሀ ሳኣ ቦላን ሸምፑዋና ደእያዋ ኡባፐ ግዱዋን ጫቀቴዳ ጫቁዋ ማላይ ሀዋ” ያጌዳ።

18ማርካብያፐ ከሴዳ ኖሄ አቱማ ናናይ ሴማ፥ ካማነ ያፌታ፤ ካመ ካናነ አዉዋ።

19ሀዋንቱ ሄዙካ ኖሄ ናና፤ ሳኣን ኡባን ደእያ አሳይ ኡንቱንቱፐ የለቴዳ።

20ኖሄ ጎሻንቻ፤ እ ዎይንያ ቱራ ቶከ ዶሜዳ።

21እት ጋላስ እ ሄ ዎይንያ ኤሳ ኡሺደ ማቴዳ፤ ባረ ዱንካንያ ግዶን ካሎ ጺራ ግሴዳ።

22ካናነ አዉዋ ካመ ባረ አዉዋ ካሉዋ በኤዳ፤ ካረ ከሲደ፥ ባረ ላኡ እሻቶ ኦዴዳ።

23ሽን ሴምነ ያፌት አፍላ እቱዋ አኪደ፥ ላአቱካ ባረንቱ ሀሽያና ሀሽያና ጋ ኦይቂደ፥ ጉየጉን ሀመት ገሊደ፥ ባረንቱ አዉዋ ካሉዋ ካሜድኖ፤ ኡንቱንቱ ባረንቱ አዉዋ ካሉዋ በኤና ማላ ባረንቱ ዴሙዋ ዎራ ዛሬድኖ።

24ኖሄ ማ አና ቤጎቲደ፥ አ ናአይ ኡባፐ ቴፋይ አ ኦዳዋ ኤሬዳ።

25አ፥ “ካናነ ሸቀቴዳዋ ግዶ! እ ባረ እሻቶ ዉርሰ አይልያ ግዶ” ያጌዳ።

26ቃይካ ኖሄ፥ “መና ጎዳይ፥ ሴማ ጾሳይ ጋላተቶ! ካናነ ሴማ አይልያ ግዶ፤

27ጾሳይ ያፌታ ቢታ አሶ። ያፌታ ዛራቱ ሴማ ዛራቱዋ ግዶን ደእኖ፤ ካናነ ያፌታ አይልያ ግዶ” ያጌዳ።

28ባሻ ሃፐ ጉየ፥ ኖሄ 350 ላይ ደኤዳ።

29ኖሄ ሙለ 950 ላይ ደኢደ ሀይቄዳ።

← Chapter 8 Jump to: Chapter 10 →