Genesis 25

Amharic Dawro DFBE (ጌሻ ማጻፋ) No Year

← Chapter 24 Jump to: Chapter 26 →

1ቃይ አብራሃመ ቃጹሮ ጌተትያ ሀራ ማቻቶ አኬዳ።

2እዛ ዚምራና፥ ዮቅሻና፥ ማዳና፥ ምድያማ፥ ይሽባቃነ ሹሀ አዉ የላዱ።

3ዮቅሻን ሳባነ ዳዳና የሌዳ። ዳዳን አሾረታ፥ ለጹሸታነ ለኣማታ የሌዳ።

4ምድያማ ናናይ አፋ፥ አፋደ፥ ሀኖካ፥ አቢዳአነ ኤልዳአ። ሀዋንቱ ኡባይካ ቃጹር ናና።

5አብራሃመ ባረዋ ኡባ ይሳቃ ላትሴዳ።

6ሽን እ ብሮ ፓጻ ደኢደ፥ ባረ ሀራ ማቻቱዋፐ የሌዳ ናናቶ ባረዉ ደእያዋፐ ዎይቴዳ። ባረ ናኣ ይሳቃፐ ኡንቱንታ ሻክ፥ አዋይ ዶልያ ባጋ ቢታዉ የዴዳ።

7አብራሃመ ሙለ እት ጼታነ ላፑን ታማነ እቼሹ ላይ ደኤዳ።

8አብራሃመ ዳሮ ዎድያ ደኢደ፥ ሎኦ ጭሚደ ሀይቄዳ፤ ባረ ማይዛቱዋና ጋከቴዳ።

9አ ናናይ ይሳቅነ እስማኤል አ ማክጴላ ግያ ጎንጎሎ ዱፉዋን ሞጌድኖ፤ ሄ ጎንጎሉ ማምረ ማታን፥ ሂትያ ጾሃራ ናኣ ኤፍሮና ጋድያን ደኤ።

10ሄዌነ አብራሃመ ሂተቱዋፐ ሻሜዳ ጋድያ። አብራሃመ ባረ ማቻታ ሳራ ሞገቴዳ ሳኣን ሞገቴዳ።

11አብራሃመ ሀይቄዳዋፐ ጉየ፥ ጾሳይ አ ናኣ ይሳቃ አንጄዳ። ሄ ዎደ ይሳቅ፥ “ታና በእያ ደኡዋ ጾሳ ፑልቱዋ” ግያ ፑልቱዋ ማታን ደኤ።

12ሳር አይላታ፥ ግብጼፐ ዬዳ አጋራ፥ አብራሃመዉ የሌዳ ናኣ እስማኤላ የለታይ ሀዋፐ ካሊደ ጻፈቴዳዋ።

13እስማኤላ ናናይ ባረንቱ ሱንንነ ባረንቱ የለታ ማራን ሀዋንታ፤ ሄዋንቱነ: ናባዮታ፥ ቄዳራ፥ አድብኤላ፥ ምብሳማ፥

14ምሽማአ፥ ዱማ፥ ማሳ፥

15ሀዳዳ፥ ቴማ፥ ይጹራ፥ ናፊሻነ ቄድማ።

16እስማኤላ ናናይ ሀዋንታ፤ ኡንቱንቱ ሱንይ ኡንቱንቱ ሞንነ ደእያ ሳኣን ሀዋ። ኡንቱንቱ ባረንቱ ያራን ታማነ ላኡ ካፓቱዋ።

17እስማኤል ሙለ ጼታነ ሀታማነ ላፑን ላይ ደኢደ፥ ሀይቄዳ፤ ባረ ማይዛቱዋና ጋከቴዳ።

18እስማኤላ ዛራቱ ግብጼፐ አዋይ ዶልያ ባጋን ደእያ ሀዊላፐነ ሹራፐ ግዱዋን፥ አሶራ አፍያ ኦግያ ማታን ደኤድኖ። ኡንቱንቱ ባረንቱ እሻቱዋ ኡባና ሞርክያን ደኤድኖ።

19አብራሃማ ናኣ ይሳቃ የለታይ ሀዋፐ ካሊደ ጻፈቴዳዋ። አብራሃመ ይሳቃ የሌዳ።

20ይሳቃዉ ላይይ ኦይታሙዋ ግዴዳ ዎደ፥ ርብቆ አኬዳ፤ እዛ ማስጰጾምያን ደእያ ሶርያ ባቱኤላ ናትዉነ ሶርያ ላባና ምቻቶ።

21ይሳቅ ባረ ማቻታ ማንቶ ግዴዳ ድራዉ፥ እዝዉ መና ጎዳ ዎሴዳ፤ መና ጎዳይ አ ዎሳ ስሴዳ። ያትና አ ማቻታ ርብቃ ሻሃራዱ።

22ሽን እዝ ኡሎ ግዶን ደእያ ናናይ ማንተ ግድ ኡቲደ፥ እቱ እቱዋና ሱገቴድኖ፤ ያትና እዛ፥ “ሀዌ ታዉ አያዉ ሀኒ?” ያጋዱ። ሄዋ ድራዉ መና ጎዳ ኦቻናዉ ባዱ።

23መና ጎዳይ እዝዉ፥ “ነ ኡሉዋን ላኡ ካዉተይ ደኤ፤ ቃይ ነ ግዱዋን ደእያ ላኡ ጋደ አሳቱ እቱ እቱዋፐ ሻከታና፤ እት ጋደ አሳቱ ህንኮቱዋፐ ምናና፤ ቃይ ባይራይ ቴፋዉ አዛዘታና” ያጌዳ።

24እዛ የልያ ዎዲ ጋክና፥ እዝ ኡሉዋን ማንተ አቱማ ናናይ ደኢኖ።

25ኮይሮ የለቴዳዌ አርሳ፤ አ ቦላ ኡባ እስኪ ማዬዳ፤ ሄዋ ድራዉ ኡንቱንቱ አ ኤሳዉ ጊደ ሱንድኖ።

26ሄዋፐ ጉየ፥ አ እሻይ የለቴዳ፤ እ ባረ ኩሽያን ኤሳዉ ግንድያ ኦይቂ ኡቴዳ፤ ሄዋ ድራዉ አ ያቆባ ጊደ ሱንድኖ። ርብቃ ኡንቱንታ የሌዳ ዎደ፥ ይሳቃዉ ኡሱፑን ታሙ ላይ ግዴዳ።

27ናናይ ድጬድኖ፤ ኤሳይ ሻንካ ሂላ ኤርያ ባዙዋ አሳ ግዴዳ፤ ሽን ያቆብ ዱንካንያን ደእያ ዎፓ አሳ ግዴዳ።

28ይሳቅ ኤሳ ሲቄዳ፤ አያዉ ጎፐ፥ እ ሻንካቴዳባፐ ማናዉ ዶሴዳ፤ ሽን ርብቃ ያቆባ ሲቃዱ።

29እት ገደ ያቆብ ዎጽያ ካሽን፥ ኤሳይ ኮሻይ ዎዳዌ፥ ዎራፐ ዬዳ።

30ኤሳይ ያቆባ፥ “ታና ሀ ዞኦ ዎጽያፐ ምዛ፤ ታና ኮሻይ ዎዳ” ያጌዳ። (ሄዋ ድራዉ ቃይ አ ሱንይ ኤዶማ ጌተቴዳ)።

31ያቆብ አ፥ “ኮይሮ ታዉ ነ ባይራተ ዛልአ” ያጌዳ።

32ኤሳይ፥ “በአ! ታን ሀይቃና ሀናይ፤ ሀ ባይራተይ ታዉ አያ ጎእ ደኢ?” ያጌዳ።

33ያቆብ ዛሪደ፥ “አነ ታዉ ኮይሮ ኔን ጫቃ” ያጌዳ። እ ጫቄዳ፤ ባረ ባይራተ ያቆባዉ ዛልኤዳ።

34ያቆብ ኤሳዉ ሶሉዋነ ምስርያ ዎጽያ እሜዳ፤ እ ሜዳነ ኡሼዳ፤ ሄዋፐ ጉየ ደንዲደ ቤዳ። ኤሳይ ባረ ባይራተ ሀዋዳን ካዳ።

← Chapter 24 Jump to: Chapter 26 →