Genesis 14

Amharic Dawro DFBE (ጌሻ ማጻፋ) No Year

← Chapter 13 Jump to: Chapter 15 →

1ሄ ዎደ ሳናኦረ ካቲ አምራፌል፥ ኤላሳራ ካቲ አርዮክ፥ ኤላማ ካቲ ካዶርላኦመርነ ጎይማ ካቲ ትድኣል ኦይዱ፥

2ሶዶማ ካትያ ቤራኣራ፥ ጋሞራ ካትያ ብርሻራ፥ አዳማ ካትያ ሽንአባራ፥ ጻቦይማ ካትያ ሸመቤራራነ (ጾኣሮ ጌተትያ) በላአ ካትያና ኦላዉ ሳልፔድኖ።

3ሀዋንቱ እቼሹ ካተቱ ጋከቲደ እት ዎልቃ ግዲደ፥ (ማጽነ አባ ግያ) ሲድማ ዎምባን ሺቄድኖ።

4ኡንቱንቱ ካሰ ታማነ ላኡ ላይ ካዶርላኦመራዉ ሞደቴድኖ፤ ሽን ታማነ ሄዘን ላይን አዉ ማካሌድኖ።

5ታማነ ኦይደን ላይን ካዶርላኦመርነ አናና ዙፐቴዳ ካተቱ ባረንቱ ኦላንቻቱዋ አክ ቢደ፥ አስታሮት ጻርናይማን ደእያ ራፋየታ፥ ሃማን ደእያ ዙዘታነ ሻዌ-ቅርያታይማን ደእያ ኤመታ ኦሊደ ጾኔድኖ።

6ሆራ ቢታ አሳቱዋካ ሰኢራ ደርያን ኦሊደ፥ ባዙዋ ማታን ደእያ ኤልፓራና ግያ ሳኣ ጋካናዉ የደርሴድኖ።

7ሄዋፐ ጉየ ስሚደ፥ አይን-ምሽፓጻ ዬድኖ። (ሀእ ሄ ሳአይ ቃዴሳ ጌተቴ።) ኡንቱንቱ አማሌቃቱዋ ቢታ ኡባነ ቃይ ሀጻጾነ ታማራ ግያ ሳኣን ደእያ አሞረቱዋ ኦሊደ ጾኔድኖ።

8ሄዋፐ ስሚደ፥ ሶዶማ ካቲ፥ ጋሞራ ካቲ፥ አዳማ ካቲ፥ ጻቦይማ ካቲነ (ጾኣሮ ጌተትያ) በላአ ካቲ ደንዴድኖ፤ ሲድማ ዎምባን ሳልፔድኖ።

9ሀዋንቱ ኡባይ ኤላማ ካትያና፥ ጎይማ ካትያና፥ ሳናኦረ ካትያናነ ኤላሳራ ካትያና (ሀ እቼሹ ካተቱ ኦይዱ ካተቱዋና) ኦለቴድኖ።

10ሲድማ ዎምባን ሄ ዎደ፥ ሽድያዳን ኦይቂያባይ ኩሜዳ ኦላይ በሴዳ፤ ሶዶማ ካቲነ ጋሞራ ካቲ ባረንቱ ኦላንቻቱዋና ኦላፐ ባቃትሽን፥ ኡንቱንቱፐ አማሬዳዋንቱ ሄ ኦላቱዋን ኩንዴድኖ፤ ሽን አቴዳዋንቱ ደርያ ባቃቴድኖ።

11ኦይዱ ካተቱ ሶዶማነ ጋሞራ ካታማቱዋ ማጹዋ ኡባነ ኡንቱንቱ ቁማ ኡባ ቦንቂደ አኬድኖ።

12አብራሞ እሻ ናአይ ሎጸ ሶዶማን ደእያ ድራዉ፥ አካ አ ማጹዋካ አኬድኖ።

13ሄዋፐ ጉየ፥ እት ብታኒ ባቃት ዪደ እብራዊያ አብራማዉ ሀዋ ኦዴዳ። አብራመ ሄ ዎደ፥ ኤሽኮላነ አኔራ እሻ አሞርያ ማምረ ዎላ ማታን ደኤ። ኡንቱንቱ ኡባይካ ኦላ ዛራናዉ አብራመና ጫቁዋ ጫቀት ኡቴድኖ።

14አብራመ ባረ ዳቡ ኦሞደቴዳዋ ስሴዳ ዎደ፥ ኦላ ኤርያ ባረ ሶን የለቴዳ 318 አሳ ደንዳ፤ ሄ ኦይዱ ካተቱዋ ካሊደ ዳን ግያ ካታማ ጋካናዉ ቤዳ።

15ቃማን ባረ አሳ ጩጉዋን ጩጉዋን ሻክ፥ ባረ ሞርከቱዋና ኦለቲደ ኡንቱንታ ጾኔዳ። ደማስቆፐ ሁጲሳ ባጋና ደእያ ሆባ ግያ ሳኣ ጋካናዉ የደርሴዳ።

16ማጹዋ ኡባ፥ ቃይ ባረ ዳቡዋ ሎጻነ አ ማጹዋ፥ ማጫ አሳነ ሀራ አሳ ዎ አኬዳ።

17አብራመ ካዶርላኦመራነ አናና ዙፐቴዳ ካተቱዋ ጾኒደ ስሜዳዋፐ ጉየ፥ ሶዶማ ካቲ፥ (ካተቱዋ ዎምባ ግያ) ሻዌሀ ዎምባን አ ሞካናዉ ከሴዳ።

18ሄ ዎደ፥ ሳሌመ ካቲ ማልካ-ጸደቂ ኡክነ ዎይንያ ኤሳ አኪደ ዬዳ፤ እ ኡባፐ ቂያ ጾሳ ቄስያ።

19እ አብራማ ሀዋዳን ያጊደ አንጄዳ፤ “ኡባፐ ቂያ ጾሳይ፥ ሳሉዋነ ሳኣ መዳዌ አብራማ አንጆ።

20ቃይ ኡባፐ ቂያ ጾሳይ፥ ነ ሞርከቱዋ ነ ኩሽያን አ እሜዳዌ ጋላተቶ” ያጌዳ። አብራመ ኡባባፐ አስራታ ከሲደ፥ ማልካ-ጸደቃዉ እሜዳ።

21ሶዶማ ካቲ አብራማ፥ “አሳ ታዉ እማደ፥ ማጹዋ ነዉ አካ” ያጌዳ።

22ሽን አብራመ ሶዶማ ካትያ፥ “ታን መና ጎዳዉ፥ ኡባፐ ቂያ ጾሳዉ፥ ሳሉዋነ ሳኣ መዳዎ፥ ታ ኩሽያ ደንደ ጫቃድ።

23ታ አሳይ ሜዳዋፐነ ታናና ቤዳ አኔራ፥ ኤሽኮላነ ማምረ ጋክያዋፐ አትና፥ ኔን፥ ‘አብራማ ታን ዱረያድ’ ኡባካ ጌና ማላ፥ ታን ነዋፐ ሀራይ አቶ ቁንጩትያ ዎይ ጫማ ቃችያዋነ አክከ። ኡንቱንቱ ባረና ጋክያዋ አክኖ” ያጌዳ።

← Chapter 13 Jump to: Chapter 15 →