Genesis 50

Amharic Dawro DFBE (ጌሻ ማጻፋ) No Year

← Chapter 49 Jump to:

1ዮሴፎ ባረ አዉዋ አሃ ቦላ ኩንዲደ፥ ዬኬዳነ አ የሬዳ።

2ሄዋፐ ጉየ፥ ዮሴፎ ልያ ሺሽያ ባረ ኦሳንቻቱዋ ባረ አዉዋ እስራኤልያ አሃ ሳዊያ ሽቱዋ ኦኪደ መልሳና ማላ አዛዜዳ፤ ኡንቱንቱ ኦኪደ መልሴድኖ።

3ሽቱዋ ኦክያዌ ኦይታሙ ጋላሳ ኩመን ዉርሴዳ፤ አያዉ ጎፐ፥ ሄዌ ጋድያ ዎጋን ኦይታሙ ጋላሳ አኬዳ። ግብጼ አሳቱ አዉ ላፑን ታሙ ጋላሳ ዬኬድኖ።

4ዬኩዋ ጋላሳቱ አዳ ዎደ፥ ዮሴፎ ግብጼ ካትያ ጎለ አሳ፥ “ታን ህንተንቱ ስንን ናሸቴዳዋ ግዶፐ፥ ህንተንቱ ካትያዉ ሀዋዳን ያጊደ ኦድተ፤

5‘ታ አዉ ታና እት ጫቁዋ ጫቂሴዳ፤ እ ታና፥ “ታን ሀያና ሀናይ፤ ታን ታዉ ካናነ ቢታን ቦኬዳ ጎንጎሎ ዱፉዋን ታና ሞጋ” ያጌዳ። ሄዋ ድራዉ ሀእ ታን ፑደ ባደ ታ አዉዋ ሞጋና ማላ የዳርኪ! ሄዋፐ ጉየ ታን ስማና’ ያግተ” ያጌዳ።

6ካቲ፥ “እ ኔና ጫቂሴዳዋዳን ፑደ ባደ ነ አዉዋ ሞጋ” ያጌዳ።

7ዮሴፎ ባረ አዉዋ ሞጋናዉ ፑደ ቤዳ። ካትያ ኦሳንቻቱ ኡባይ፥ አ ካትያ ጎለን ደእያ ዎልቃማ አሳይ ኡባይነ ግብጼ ቢታን ደእያ ዎልቃማ አሳይ ኡባይ ዮሴፋ ካሊደ ቤድኖ።

8ቃይ ዮሴፎ ሶ አሳይ ኡባይ፥ አ እሻቱዋነ አ አዉዋ ሶ አሳይ ቤድኖ፤ ኡንቱንቱ ናናይ፥ ኡንቱንቱ ሚዛይነ ኡንቱንቱ ዶርሳ ዉዲ ጻላላይ ገሴመን አቴዳ።

9ፓራ ጋረቱካ ፓራ አሳቱካ አናና ፑደ ቤድኖ፤ አ ካሊደ ቤዳ አሳይ ሎይ ዳራ።

10ኡንቱንቱ ዮርዳኖሳ ሻፋ ማታን ደእያ አጻደ ግያ ኡዱማ ጋኪደ፥ ባረንቱ ቃላ ቁ ኦደ፥ አዉ ዝላሌድኖነ ዬኬድኖ፤ ያን ዮሴፎ ባረ አዉዋ ዬኩዋን ላፑን ጋላሳ ኡቴዳ።

11ሄ ቢታን ደእያ ካናነ አሳቱ አጻደ ግያ ኡዱማን ሄ ዬኩዋ በኤዳ ዎደ፥ “ግብጼቱ አያ ይባታ ዬኩዋ ዬክኖ!” ያጌድኖ። ሄዋ ድራዉ ዮርዳኖሳ ማታን ደእያ ሄ ሳአይ፥ አቤል-ምጽራይማ ጌተቴዳ።

12ያቆባ ናናይ ባረንቱ አዉ ኡንቱንታ አዛዜዳዋዳን ኦድኖ፤

13ኡንቱንቱ አ አሃ ካናነ ጋድያ አፊደ፥ ማምረ ማታን ደእያ ማክጴላ ግያ ጎንጎሉዋን፥ አብራሃመ ሂትያ ኤፍሮናፐ ሞጎ ሻሜዳ ጋድያን አ ሞጌድኖ።

14ዮሴፎ ባረ አዉዋ ሞጌዳዋፐ ጉየ፥ ባረ እሻቱዋናነ አ አዉዋ ሞጋናዉ አናና ቤዳ ሀራ አሳቱዋ ኡባቱዋና ግብጼ ስሜዳ።

15ኡንቱንቱ አዉ ሀይቂ ድጌዳዋ በኢደ፥ ዮሴፎ እሻቱ ባረንቱ ግዱዋን፥ “ኦን ኤሪ ዮሴፎ ኑና ባረ ኡሉዋን ሞርኮፐነ ኑን አዉ ኦዳ ኢታባ ኡባዉ ሀሉዋ ከሳና ኮዮፐ፥ ኑን ዋናኔ?” ያጌድኖ።

16ሄዋ ድራዉ ዮሴፎኮ ሀዋ ማላ ኪታ ኪቴድኖ፤ “ነ አዉ ሀይቃናፐ ካሰ፤

17‘ህንተ ዮሴፎ፥ “ኔን ነ እሻቱዋ ናጋራነ ኡንቱንቱ ኔና ናቄዳ ኢታ ናቁዋ ሀያና አቶ ያጋ” ያጌዳ ጊደ ኦድተ’ ያጌዳ። ሄዋ ድራዉ ሀእ ሀያና፥ ኑ ናጋራ፥ ነ አዉዋ ጾሳ ቆማቱዋ ናጋራ አቶ ያጋ” ያጌድኖ። ኪታይ ባረኮ ጋኬዳ ዎደ፥ ዮሴፎ ዬኬዳ።

18ሄዋፐ ጉየ አ እሻቱ ባረንቱ ሁጲያዉ አኮ ዪደ፥ አ ስንን ጉፋኒደ፥ “ኑን ነ አይለቱዋ” ያጌድኖ።

19ሽን ዮሴፎ ኡንቱንታ፥ “ያዮፕተ፤ ታና ህንተንቶ ጾሳ ጌድተየ?

20ህንተንቱ ታዉ ኢታናዉ ኦድታ፤ ሽን ሀቼዋዳን ዳሮ አሳይ ሀይቀናን አታና ማላ፥ ጾሳይ ሎኦተዉ ሀዋ ኦዳ።

21ሄዋ ድራዉ ስም ህንተንቱ ያዮፕተ፤ ታን ህንተናነ ህንተንቱ ናና ምዛና” ያጊደ፥ እ ኡንቱንታ ምንደ ሎኦ ቃላ ሃሳዬዳ።

22ዮሴፎ ባረ አዉዋ ሶ አሳ ኡባና ግብጼን ጋምኤዳ፤ እ ጼታነ ታሙ ላይ ደኤዳ፤

23ኤፍሬማ ናና፥ ሄዘን የለታ በኤዳ፤ ቃይ ምናሰ ናኣ ማኪና ናናነ እ ባረ ናና ኦዳ።

24ሄዋፐ ጉየ ዮሴፎ ባረ እሻቱዋ፥ “ታን ሀያና ሀናይ፤ ሽን ጾሳይ ህንተንታ ማዳናዉ ቱሙ ጾሞሳና፤ እ ህንተንታ ሀ ቢታፐ ከሲደ፥ አብራሃመዉ፥ ይሳቃዉነ ያቆባዉ እማና ጊደ ጫቄዳ ቢታ አፋና” ያጌዳ።

25ዮሴፎ እስራኤልያ ናና፥ “ጾሳይ ህንተንታ ማዳናዉ ቱሙ ጾሞስያ ዎደ፥ ህንተንቱ ታ መቀ ሀ ቢታፐ ፑደ አኪደ ቢተ” ያጊደ ጫቂሴዳ።

26ዮሴፎ ጼታነ ታሙ ላይ ደኢደ ሀይቄዳ፤ ኡንቱንቱ ሽቱዋን አ አሃ ኦኪደ መልሴዳዋፐ ጉየ፥ ግብጼ ቢታን ሳጽንያን የጌድኖ።

← Chapter 49 Jump to: