Genesis 39

Amharic Dawro DFBE (ጌሻ ማጻፋ) No Year

← Chapter 38 Jump to: Chapter 40 →

1እስማኤላ አሳቱ ዮሴፋ ግብጼ አፍ ዎድኖ። ግብጻዌ ጶጽፋር፥ ካትያ ኦሳንቻቱዋፐ እቱ፥ ናግያዋንቱ ካፑ ዮሴፎ እስማኤለቱዋፐ ሻሜዳ።

2መና ጎዳይ ዮሴፎና ደኤ፤ ሄዋ ድራዉ፥ እ ኦያዋ ኡባ አዉ እንጀዬዳ፤ ያትና ባረ ጎዳ፥ ግብጻዊያ ሶን ደኤዳ።

3መና ጎዳይ አናና ደእያዋነ መና ጎዳይ እ ኦዳዋ ኡባ አዉ ሱርስያዋ ጶጽፋር በኤዳ ዎደ፥

4ዮሴፎ አ ስንን ናሸቴዳ፤ እ አዉ ኪተቴዳ። ጶጽፋር አ ባረ ጎለ አሳ ቦላ ሱንዳ፤ ባረዉ ደእያዋ ኡባ አ ኩሽያን ዎዳ።

5ጶጽፋር ባረ ጎለን ደእያዋ ኡባ ቦላነ ባረ ማጹዋ ኡባ ቦላ ሱንዳ ዎድያፐ ዶሚደ፥ መና ጎዳይ ግብጼ ብታንያ ጎሊያ ዮሴፎ ድራዉ አንጄዳ። መና ጎዳ አንጁ ጶጽፋራ ሶንነ ጋደን ደኤዳ ኡባባ ቦላ ዎዳ።

6ሄዋ ድራዉ ባረዉ ደእያ ኡባባ ዮሴፎዉ ሼዳ፤ እ ባረ ምያ ቁማፐ አትና፥ አይነ ቆፐና። ዮሴፎ ጌሳንቻነ ማላ ሎኦ አሳ።

7አማሬዳ ዎድያፐ ጉየ፥ አ ጎዳ ማቻታ ዮሴፋ ጼላ በኣደ፥ “ሃያ፤ ታናና ግሳ” ያጋዱ።

8ሽን እ እጼዳ። ባረ ጎዳ ማቻቶ፥ “በአ፤ ታ ጎዳይ ታዉ ሼደ ባረ ሶን ደእያባዉ አያዉነ ህርገና፤ ባረዉ ደእያዋ ኡባ ታ ኩሽያን ዎዳ።

9ሀ ሶን ታፐ ግታትያዌ ኦንነ ባዋ። ኔን አ ማቻቶ ግድያ ድራዉ ነ ጻላላፐ አትና፥ ታ ጎዳይ ታዉ እምቤናባይ ባዋ። ያትና ታን ዋታደ ሀዋ ማላ ዳሮ ኢታባ ሀናደ ጾሳ ቦላ ናጋራ ኦ?” ያጌዳ።

10እዛ ሀ የዉዋ ሀቼ ሀቼ ዮሴፎዉ ኦዶፐነ፥ እ እዝና ግሰናን ዎይ እዝ ማታን ኡተናን እጼዳ።

11እት ጋላስ እ ባረ ኦሱዋ ኦናዉ ሶ ገልያ ዎደ፥ ሶ ቆማቱዋፐ ኦንነ ሶን ባዋ።

12እዛ ዮሴፎ አፍላ ኦይቃደ፥ “ታናና ግሳ” ያጋዱ። ሽን እ ባረ አፍላ እ ኩሽያን የጊደ፥ ሶፐ ካረ ዎጺደ ከሴዳ።

13ዮሴፎ ባረ አፍላ እ ኩሽያን የጊደ፥ ሶፐ ካረ ዎጽ ከሶዋ እዛ በኤዳ ዎደ፥

14ባረ ሶ ቆማቱዋ ጼሳደ ኡንቱንታ፥ “በእተ፤ ታ አስናይ አሄዳ ሀ እብራዌ ብታኒ ታና ባለ ድጊደ አሼዳ፤ እ ታናና ግሳናዉ ሀዋ ገሌዳ፤ ሽን ታን ታ ኮሻ ቂሳደ ዋሳድ።

15ታን ዋስና ስሴዳ ዎደ፥ እ ባረ አፍላ ታ ማታን የጊደ፥ ሶፐ ካረ ዎጺደ ከሴዳ” ያጋዱ።

16አ ጎዳይ ሶ ያና ጋካናዉ እዛ ዮሴፎ አፍላ ባረ ማታን ዎዱ።

17ሄዋፐ ጉየ፥ እዛ አዉ ሀዋዳን ያጋደ ኦዳዱ፤ “ሄዌ ኔን ኑዉ አሄዳ እብራዌ አይሊ ታናና ግሳናዉ ታኮ ገሌዳ፤

18ሽን ታን ታ ቃላ ቂሳደ ዋሶዌ፥ ባረ አፍላ ታ ማታን የጊደ፥ ሶፐ ካረ ዎጼዳ” ያጋዱ።

19አ ጎዳይ ባረ ማቻታ፥ “ነ አይሊ ታና ሀዋዳን ኦዳ” ያጋደ ኦዴዳ ቃላ ስሲደ፥ ሀንቁዋን ፐንቴዳ።

20ዮሴፋ አ ጎዳይ አፊደ፥ ካትያ ቃሹዋ ሳአይ ደእያ ቃሾ ጎለን የጌዳ።

21ሽን ዮሴፎ ያን ቃሾ ጎለን ደእያ ዎደ፥ መና ጎዳይ አናና ደኤ። እ አዉ ቃረቴዳ፤ ቃሾ ጎለ ካፑዋ ስንን አዉ ናሹዋ እሜዳ።

22ያትና ቃሾ ጎለ ካፑ ቃሹዋ አሳ ኡባ ዮሴፎ ኩሽያን ዎዳ፤ ሄዋን ኦሰትያዋ ኡባ ኦያዌ አ።

23ቃሾ ጎለ ካፑ ዮሴፎ ኩሽያን ደእያባዉ አያዉነ ህርገና፤ አያዉ ጎፐ፥ መና ጎዳይ አናና ደኤ፤ እ ኦያዋካ ኡባ አዉ እንጀዬዳ።

← Chapter 38 Jump to: Chapter 40 →