Genesis 45

Amharic Dawro DFBE (ጌሻ ማጻፋ) No Year

← Chapter 44 Jump to: Chapter 46 →

1ሄ ዎደ ዮሴፎ ሄ አሳ ኡባ ስንን ገንጫና ዳንዳይቤና፤ “አሳ ኡባ ታ ስንፐ ከስተ” ያጊደ ዋሴዳ። ሄዋ ድራዉ ዮሴፎ ባረና ባረ እሻቶ ኤርሴዳ ዎደ፥ አናና ኦንነ ባዋ።

2እ ባረ ቃላ ቂሲደ፥ ግብጼቱ አ ስሳና ጋካናዉ ሎይ ዬኬዳ። ካትያ ሶ አሳይ ሄ ዎርያ ስሴዳ።

3ዮሴፎ ባረ እሻቶ፥ “ታን ዮሴፋቴ! ታ አዉ ሀኖ ጋካናዉ ፓጻ ደኢየ?” ያጊደ ኦቼዳ። ሽን አ እሻቱ ሎይ ዳጋሜዳ ድራዉ፥ አዉ ዛራና ዳንዳይበይክኖ።

4ያትና ዮሴፎ ባረ እሻቱዋ፥ “ታኮ ሃ ሺቅተ” ያጌዳ። ኡንቱንቱ አኮ ሺቄድኖ፤ እ ኡንቱንታ፥ “ታን ህንተንቱ እሻ ዮሴፋ፤ ህንተንቱ ግብጼ ቢታዉ ዛልኤዳዋ።

5ቃይ ህንተንቱ ታና ሀዎ ዛልኤዳ ድራዉ፥ ቁምኤቶፕተነ ካዮቶፕተ፤ አያዉ ጎፐ፥ ጾሳይ ታና ህንተፐ ስንዉ ኪቴዳዌ አሳ ሸምፑዋ አሻናሳ።

6ሀ ቢታ ኮሻይ ገሎደፐ ላኤን ላይ፤ ቃይ ይያ እቼሹ ላይቱዋን አሳይ ጎሸና ዎይ ጫከና።

7ሽን ታን ሳኣን ህንተንቶ ዘረ አሻና ማላነ ህንተንቱ ደኡዋ ዳርሳ አሻና ማላ፥ ጾሳይ ታና ህንተፐ ስንዉ ኪቴዳ።

8ስም ታና ሀ ሳኣ ኪቴዳዌ ጾሳ ግድያዋፐ አትና፥ ህንተንታ ግድክታ። እ ታና ግብጼ ካትያዉ አዉዋ፥ አዉ ደእያዋ ኡባዉ ጎዳነ ግብጼ ቢታ ሞድያዋ ኦዳ።

9“ሀእ ኤሌል ጉየ ታ አዉዋኮ ቢደ አ፥ ‘ነ ናአይ ዮሴፎ ሀዋዳን ያጌ፤ “ጾሳይ ታና ግብጼ ቢታ ኡባ ቦላን ጎዳ ከሴዳ፤ ኔን ታኮ ዱገ ሃያ፤ ጋምኦፓ።

10ኔን ገሴመ ቢታን ኡታሳ፤ ቃይ ኔን፥ ነ ናናይ፥ ነ ናና ናናይ፥ ነ ዶርሳ ዉዲ፥ ነ ሚዛ ዉዲነ ነዉ ደእያባይ ኡባይ ታ ማታን ደኢታ።

11ብሮ እቼሹ ኮሻ ላይቱ አቴድኖ፤ ኔና፥ ነ ሶ አሳነ ነ መህያ ኮሻይ ኦይቀና ማላ፥ ታን ኔና ምዛና” ያጌዳ’ ያግተ” ያጌዳ።

12ቃይካ ዮሴፎ ኡንቱንታ፥ “ህንተካ ታ እሻ ቢንያመካ፥ ሀ ህንተናና ሃሳይያዌ ቱሙ ታና ዮሴፋ ግድያዋ ህንተንቱ አይፍያን በኢታ።

13ታዉ ግብጼ ቢታን ደእያ ቦንቹዋ ኡባነ ህንተንቱ በኤዳዋ ኡባ ታ አዎ ኦድተ፤ ታ አዉዋነ ኤለካ ሃ ዱገ አክ ዪተ” ያጌዳ።

14ባረ እሻ ቢንያማ ቆያ ቆም ዬኬዳ፤ ቢንያመካ ባረ እሻ ቆም ዬኬዳ።

15ዮሴፎ ባረ እሻቱዋ ኡባ የሪደ፥ ኡንቱንቱ ቦላንካ ዬኬዳ። ሄዋፐ ጉየ፥ አ እሻቱ አናና ሃሳዬድኖ።

16ዮሴፎ እሻቱ ዬዳ ዎሪ ካትያ ጎለ ጋኬዳ ዎደ፥ ካቲነ አ ኦሳንቻቱ ናሸቴድኖ።

17ካቲ ዮሴፎ፥ “ኔን ነ እሻቱዋ ያትተ ጋ፤ ‘ህንተ መህያ ጫኒደ፥ ካናነ ጋድያ ስምተ፤

18ህንተንቱ አዉዋነ ህንተንቱ ሶ አሳ አኪደ፥ ጉየ ታኮ ሃ አህተ። ታን ህንተንቶ ግብጼ ቢታን ኡባ ሳኣፐ ሎእያ ሳኣ እምና፥ ህንተንቱ ሀ ቢታ ሞዋ ካሻና’ ያጋ።

19ቃይካ ኔን ነ እሻቱዋ፥ ‘ፓራ ጋርያ ህንተንቱ ናናቱዋነ ህንተንቱ ማጫ አሳቱዋ አህያዋንታ ግብጼፐ አኪደ ቢተ፤ ህንተንቱ አዉዋነ አኪደ ዪተ።

20ግብጼ ቢታን ደእያ ኡባፐ አ ሎእያዌ ህንተሳ ግድያ ድራዉ፥ ህንተንቱ ማጹዋ ቆፖፕተ’ ያጋደ ኦዳ” ያጌዳ።

21እስራኤልያ አቱማ ናናይ ጌዳዋዳን ኦድኖ። ዮሴፎ ካቲ አዛዜዳዋዳን ፓራ ጋረቱዋነ ኦግያዉ ሽንቃ ኡንቱንቶ እሜዳ።

22ኡንቱንቶ ኡባዉካ ሁጲያን ሁጲያን ኦራ ማዩዋ እሜዳ፤ ሽን ቢንያመዉ ሄዙ ጼቱ ጻጋራ ብራነ እቼሹ ኩመን ማዩዋ እሜዳ።

23እ ባረ አዎ የዴዳዌ ሀዋ፤ ግብጼን ደእያ ኡባባፐ ሎእያዋ ታሙ ሀርያን ጫኒደ፥ ቃይ ኦግያዉ ካ፥ ኡክነ ሀራ ሽንቃ ታሙ ማጫ ሀረቱዋን ጫኒደ የዴዳ።

24ዮሴፎ ባረ እሻቱዋ ሞይዜዳ። ኡንቱንቱ ቢሽን እ ኡንቱንታ፥ “ኦግያን ቢደ ዋላቀቶፕተ” ያጌዳ።

25ኡንቱንቱ ግብጼፐ ከሲደ ቤድኖ፤ ካናነ ቢታ ቢደ፥ ባረንቱ አዉዋ ያቆባኮ ጋኬድኖ።

26ኡንቱንቱ አዉ ሀዋዳን ያጊደ ኦዴድኖ፤ “ዮሴፎ ፓጻ ደኤ! እ ሄዋፐነ ግብጼ ቢታ ኡባ ሞድያዋ” ያጌድኖ፤ ያቆባ ዳጋማይ ዎዛና ባይዜዳ ድራዉ፥ ኡንቱንታ አማንቤና።

27ሽን ኡንቱንቱ ዮሴፎ ባረንቶ ኦዴዳዋ ኡባ አዉ ኦድናነ አ አክ አሀና ማላ ዮሴፎ ኪቴዳ ፓራ ጋረቱዋ እ በእና፥ ኡንቱንቱ አዉዋ ያቆባ ሸምፑ ስሜዳ።

28እስራኤሊ፥ “ሄዌ ታዉ ግዴ፤ ታ ናኣ ዮሴፎ ሀኖ ጋካናዉ ፓጻ ደኤ! ታን ሀይቃናፐ ካሰ ባደ፥ አ በአና” ያጌዳ።

← Chapter 44 Jump to: Chapter 46 →