Genesis 42

Amharic Dawro DFBE (ጌሻ ማጻፋ) No Year

← Chapter 41 Jump to: Chapter 43 →

1ያቆብ ግብጼን ካይ ደእያዋ ስሴዳ ዎደ፥ ባረ አቱማ ናና፥ “ህንተንቱ እቱ እቱዋ አያዉ ጼሊቴ?

2በእተ! ግብጼን ካይ ደእያዋ ታን ስሳድ፤ ያ ዱገ ቢደ፥ ኑን ሀይቀናን ፓጻ ደአና ማላ፥ ያፐ አማሬዳዋ ኑዉ ዎምተ” ያጌዳ።

3ዮሴፎ እሻቱ ታማቱ ካ ዎማናዉ ዱገ ግብጼ ቤድኖ።

4ሽን ያቆብ ዮሴፎ እሻ ቢንያማ አ እሻቱዋና የድቤና፤ አያዉ ጎፐ፥ እ ቆሄታነንቶነ ጊደ ቆፔዳ።

5ካናነ ቢታን ዎልቃማ ኮሻይ ደእያ ድራዉ፥ ካ ዎማናዉ ዬዳዋንቱና እስራኤልያ አቱማ ናናይ ግብጼ ገሌድኖ።

6ሄ ዎደ ዮሴፎ ሄ ቢታ አይስያዋንታነ ቢታን ደእያ አሳዉ ኡባዉ ካ ዛልእያዋ፤ ሄዋ ድራዉ ዮሴፎ እሻቱ ጋኬዳ ዎደ፥ ባረንቱ ዴሙዋ ሳኣ ጋደ አዉ ጎይኔድኖ።

7ዮሴፎ ባረ እሻቱዋ በኦ ሳን ኤር አጌዳ፤ ሽን እ ኡንቱንታ ኤረናዋዳን ላመቴዳ፤ እ ኡንቱንታ፥ “ህንተንቱ ሀቃፐ ዬድቴ?” ያጊደ ኦቼዳ። ኡንቱንቱ፥ “ካ ዎማናዉ፥ ካናነ ቢታፐ ዬዶ” ያጌድኖ።

8ዮሴፎ ባረ እሻቱዋ ኤሬዳ፤ ሽን ኡንቱንቱ አ ኤርበይክኖ።

9ሄዋፐ ጉየ፥ ዮሴፎ ኡንቱንቱዋ አኩመቴዳ ባረ አኩሙዋ ሀሳዪደ ኡንቱንታ፥ “ህንተንቱ ጌድ ጼልያ አሳ፤ ህንተንቱ ኑ ቢታን ናጉ ለፕያ ባጋይ ሀቃዌንቶ በአናዉ ዬድታ” ያጌዳ።

10ኡንቱንቱ፥ “ቱይት፥ ኑ ጎዳዉ፥ ኑን ጌድ ጼልያ አሳ ግዶኮ፤ ኑን ነ ቆማቱ ካ ዎማናዉ ዬዶ።

11ኑን ኡባይካ እት አዉዋ ናና። ኑን ነ ቆማቱ አማነትያ አሳ” ያጌድኖ።

12ዮሴፎ ኡንቱንታ፥ “ቱይት፤ ህንተንቱ ኑ ቢታን ናጉ ለፕያ ባጋይ ሀቃዌንቶ በአናዉ ዬድታ” ያጌዳ።

13ሽን ኡንቱንቱ፥ “ኑን ነ ቆማቱ ታማነ ላኡ እሻቱዋነ ካናነ ቢታን ደእያ እት ብታንያ ናና። ዉርሰ ን ዱሱ ሀእ ኑ አቡና ደኤ፤ እቱ ዬዳ” ያጌድኖ።

14ዮሴፎ ኡንቱንታ፥ “ታን ህንተንቶ ኦዴዳዋዳንካ ህንተንቱ ቢታ ጌድያዋንታ።

15ቃይ ህንተንቱ ፓጨታናዌ ሀዋና፤ ቱሙዋፐ ካቲ ሀይቆ፤ ህንተንቱ ዉርሰ ቴፋ እሻይ ሀዋ ያና ዮፐ፥ ህንተንቱ ሀዋፐ ቢክታ።

16ህንተንቱ ኦድያዌ ቱማ ግድያዋ ፓጫናዉ፥ ህንተፐ እቱዋ ኪትተ፤ እ ህንተንቱ እሻ አኪደ ዮ፤ አቴዳዋንቱ ቃሾ ጎለን ጋምኢታ። ሄዋ ግዳና ዮፐ፥ ካቲ ሀይቆ፤ ህንተንቱ ቢታ ጌድያዋንታ” ያጌዳ።

17ኡንቱንታ ሄዙ ጋላሳዉ ቃሾ ጎለን የጌዳ።

18ሄዘን ጋላሳን ዮሴፎ ኡንቱንታ፥ “ታን ጾሳዉ ያይያ አሳ፤ ህንተንቱ እትባ ኦፐ፥ ፓጻ ደአና።

19ህንተንቱ ቱሙካ አማነትያ አሳ ግዶፐ፥ ህንተንቱ እሻቱዋፐ እቱ ሀዋን ቃሾ ጎለን ደኦ፤ አቴዳዋንቱ ኮሻትያ ህንተንቱ ሶ አሳዉ ካ አኪደ አፍተ፤

20ሽን ህንተንቱ ቃላ ቱማያና ማላነ ህንተንቱ ሀይቀና ማላ ህንተንቱ ህንተንቱ ዉርሰ ቴፋ እሻ ታኮ አሀና ኮሼ” ያጌዳ። ኡንቱንቱነ ሀ የዉዋ ማዬድኖ።

21ኡንቱንቱ እቱ እቱዋ፥ “ቱሙ ኑን ኑ እሻዉ ኦዳባይ ኑና ካኤ። እ ባረ ሸምፖ ሀንያባይ እጽና፥ ኑዉ ዋትዋትያ ዎደ፥ ኑን ስሲደ እጼዶ፤ ሀ ዋዪ ኑና ጋኬዳዌ ሄዋ ድራሳ” ያጌድኖ።

22ሮቤል፥ “ታን ህንተንታ፥ ‘ናኣ ቦላ ናጋራ ኦፕተ’ ጋደ ኦዳበይክታ? ሽን ህንተንቱ ስሰናን እጼድታ። ስም ሀእ፥ አ ሱይ ኑና አቼ” ያጌዳ።

23ኡንቱንቱ ግያባ ዮሴፎ ኤሬዳዋ ኡንቱንቱ አኬክበይክኖ፤ አያዉ ጎፐ፥ እ ኡንቱንቱና ዎካልያን ሃሳይያ ድራሳ።

24እ ኡንቱንቱፐ ዎራ ስሚደ ዬኬዳ፤ ሽን ቃይ ኡንቱንቱኮ ስሚደ፥ ኡንቱንቶ ጉጂደ ሃሳዬዳ። እ ስሞና ኡንቱንቱፐ ዱ አሺደ ኡንቱንቱ በእሽን ቃቼዳ።

25ዮሴፎ ባረ ቆማቱዋ፥ “ካ ኡንቱንቱ ኦጎሩዋ ኩንተ፤ ኡንቱንቱ ብራካ ዛሪደ፥ ኡንቱንቱ ኦጎሩዋን ኦጎሩዋን ዎተ፤ ቃይ ኡንቱንቱ ኦግያዉ ሽንቃ እምተ” ያጊደ አዛዜዳ።

26እ ጌዳዋዳን ኦዳዋፐ ጉየ፥ ዮሴፎ እሻቱ ካ ባረንቱ ሀረቱዋን ጫኒደ፥ ደንዲደ ቤድኖ።

27ኡንቱንቱ ቃማ አቃናዉ ስሜድኖ ኡንቱንቱፐ እቱ ባረ ሀርያዉ ካፐ የጋናዉ ባረ ኦጎሩዋ ብሊደ፥ ሄ ኦጎሩዋ ዶናን ደእያ ባረ ብራ በኤዳ።

28እ ባረ እሻቱዋ፥ “ታ ብራይ ታዉ ስሜዳ፤ ቱሙ ሀዋ በእተ! ታ ኦጎሩዋን ደኤ” ያጌዳ። ኡንቱንቱ ዎዛናይ ዳጋምና፥ ኮኮሪደ እቱ እቱዋኮ ስሚደ፥ “ጾሳይ ኑ ቦላ ኦዳባይ ሀዌ አዬ?” ያጌድኖ።

29ኡንቱንቱ ካናነ ቢታን ደእያ ባረንቱ አዉዋ ያቆባኮ ዬዳ ዎደ፥ ባረና ጋኬዳዋ ኡባ አዉ ኦዴድኖ።

30ኡንቱንቱ አዉ፥ “ሄ ቢታዉ ጎዳ ግዴዳ ብታኒ ኑና ሀንቀቴዳ። ሄዋፐ ጉየ፥ እ ኑና ሄ ቢታ ገድያዋዳን ጎዳቴዳ።

31ሽን ኑን አ፥ ‘ኑን አማነትያ አሳ፤ ቢታ ጌድያዋንታ ግዶኮ።

32ኑን ታማነ ላኡ እሻቱ እት አዉዋ ናና፤ እቱ ዬዳ፤ ዉርሰ ቴፋይ ካናነ ቢታን ሀእ ኑ አቡና ደኤ’ ያጌዶ።

33ሄ ቢታዉ ጎዳ ግዴዳ ብታኒ ኑና፥ ‘ህንተ አማነትያ አሳ ግድያዋ ታን ሀዋን ኤራና፤ ህንተንቱ እሻቱዋፐ እቱዋ ሀዋን ታ ማታን የጊደ፥ ኮሻትያ ህንተንቱ ሶ አሳዉ ካ አኪደ ቢተ።

34ህንተንቱ ቢታ ጌድያዋንታ ግደናን፥ አማነትያ አሳ ግድያዋ ታን ኤራና ማላ፥ ህንተንቱ ዉርሰ ቴፋ እሻ ታኮ አክ ዪተ። ያቶፐ ታን ሃን አቴዳ ህንተንቱ እሻ ህንተንቶ ዛራደ እማና፤ ህንተነ ሀ ቢታን ዛልኢታ’ ጌዳ” ያጌድኖ።

35ኡንቱንቱ ባረንቱ ኦጎሩዋፐ ካ ቆሊደ፥ ባረንቱ ኦጎሩዋን ኦጎሩዋን ባረንቱ ብራ ቃሹዋና ኡቴዳዋ ደሜድኖ። ኡንቱንቱነ ኡንቱንቱ አዉ ሄ ቃሹዋና ደእያ ብራ በኢደ ያዬድኖ።

36ኡንቱንቱ አዉዋ ያቆብ ኡንቱንታ፥ “ህንተንቱ ታና ታ ናናቱዋፐ መላ ከሴድታ፤ ዮሴፎ ባዋ፥ ስሞን ባዋ፤ ቃይ ህንተንቱ ቢንያማ አፋና ኮዪታ። ኡባባይ ታዉ ትራን ስት ጌዳ” ያጌዳ።

37ሄዋፐ ጉየ ሮቤል ባረ አዉዋ፥ “ታን ቢንያማ ነዉ ዛራደ አሀና ዮፐ፥ ታ አቱማ ናና ላኡዋካ ዎ፤ ታና አማነታደ አ ታ ኩሽያን ዎ፤ ቃይ ታን አ ዛራደ አሀና” ያጌዳ።

38ሽን ያቆብ ኡንቱንታ፥ “ታ ናአይ ህንተናና ያ ዱገ ቤና፤ አ እሻይ ሀይቂና፥ አቴዳዌ አ ጻላላ፤ ህንተንቱ አፍሽን፥ ኦግያን ኢታባይ አ ጋክያዋ ግዶፐ፥ ህንተንቱ ታ ፑሉን ሁጲያ ካዩዋን ዱፉዋን የጊታ” ያጌዳ።

← Chapter 41 Jump to: Chapter 43 →