Isaiah 2

Amharic Gamo (ጋሞ ማጻፋ)

← Chapter 1 Jump to: Chapter 3 →

1ኣሞጼ ና ኢሳያሲ ዩሁዳ ዴሬ ጊሻሲኔ ዬሩሳላሜ ካታማ ጊሻስ ቤኢዳ ኣጁታይ ሃይሳ።

2ዎዴ ዉርሴን ጾሳ ኬ ኢዛ ቦላ ኬጼቲዳ ዙማይ ሃራ ዙማ ኡባፌ ቂ ቤታና። ዙምቡላታ ኡባፌ ቁ ቁ ጋና፤ ኡባ ካዎቴቲ ሄ ጎቻና።

3ዳሮ ኣሳይ ዪዲ፥ «ዎጋይ ጺዮኔፔ፥ ጎዳ ቃላይ ዬሩሳላሜፔ ኬዚዛ ጊሻስ ሃ ዪቴ! ጎዳ ዙማ፥ ያቆቤ ጾሳ ኬ ኣኔ ፑዴ ኬዞስ። ኢዚ ኮይዛይሳ ኑኒ ባና ማላ ኢዚ ኑና ባ ኦጌ ታማርሳና» ጋና።

4ኢዚ ካዎቴታ ጊዶን ፒርዳና፤ ዳሮ ኣሳታ ጋርሳን ዲዛ ፓላማ ኢዚ ዲጋና። ኢስቲ ባንታ ጊ ማሻ ማራሻ፥ ባንታ ቶራካ ባጫ ቆጺ ኬሳና። ዴሬይ ዴሬ ቦላ ማሻ ዴንና፤ ሄሳፌ ጉዬ ኢስቲ ኦላ ታማሬቴና።

5ኢንቴኖ ያቆቤ ዛሬቶ! ሃ ዪቴ! ኣኔ ጎዳ ፖኦን ሲሜሬቶስ።

6ጎዳዉ! ኔኒ ኔ ኣሳ ያቆቤ ዛሬታ ኣጋዳሳ። ኢስቲ ኣርሼይ ሞኪዛ ባጋራ ዲዛ ኣሳታ ማላ ቢታን ኩሚዳ፤ ፊሊስጼሜ ኣሳ ማላ ሙሬኔቴስ። ኢስቲ ኣላጋራ ኢሲፌ ዙፔቴቴስ።

7ኢስታ ቢታን ቢራይኔ ዎርቃይ ኩሚዴስ፤ ኢስታ ዱሬቴስ ዛዋይ ባዋ፤ ኢስታ ቢታን ፓራይ ኩሚዴስ፤ ኢስታ ፓራ-ጋሬታስ ዛዋይ ዴና።

8ኢስታ ቢታን ኤቃ ጾሳቲ ኩሚዳ፤ ባንታ ኩሼን ኦ ኬሲዳ ሚሻስ ጎይኔቴስ።

9ሄሳ ጊሻስ ኣሲ ኡባይ ዚቂ ጋናኔ ካዉያና። ኢስታ ቆሆ ኣቶ ጎፓ።

10ያሺሲዛ ጎዳ ሃንቆፌኔ ኢዛ ቴማፔ ኣታናስ ዛላታኮ ቢዲ ቢታ ጊዶን ቆቴቲቴ!

11ኦቶራንቻ ኣይፌይ ጉካና፤ ሞቲዛይቲ ካዉያና፤ ሄ ዎዴ ጎዳይ ጻላ ቁ ቁ ጋና።

12ኡባፌ ዎልቃማ ጎዳይ ኦቶራንቻታ፥ ሞቲዛይታኔ ጬቄቲዛይታ ካዉሻናስ ጋላስ ባሪ ዎዴስ።

13ኣዱሲኔ ቃ ጊዲዳ ሊባኖሴ ዚጋታኔ ባሳኔ ዎላታ ኡባ፥

14ጊታ ዙማታኔ ቃ ዙምቡላታ ኡባ፥

15ካታማ ናጊዛ ኣዱሳ ሚጻታኔ ካታማ ዩሾን ዲዛ ሚኖ ጊምቤታ ኡባ፥

16ታርሴሴ ማርካቤታኔ ቦንቾ ዎጎሎታ ኡባ ኢዚ ካዉሻና ዎዴይ ዴስ።

17ሞቲዛዴይ ካዉያና፤ ኦቶራንቻይ ኩንዳና፤ ሄ ጋላስ ጎዳይ ጻላ ቁ ቁ ጋና፤

18ኤቃ ጾሳቲ ኡባይ ሙሌራ ያና።

19ጎዳይ ሃይሳ ቢታ ቃናስ ዴንዲዛ ዎዴ ያሺሲዛ ጎዳ ሃንቆፌኔ ኢዛ ቴማፔ ኣታናስ ኣሳይ ቆቴታናስ ሹቻ ጋርሲኔ ኦላይ ዲዛሶ ባቃታና።

20ሄ ጋላስ ኣሳይ ጎይናናስ ሜዳ ባንታ ቢራ፥ ዎርቃ ሚስሌታ ጊሮሲኔ ካፎታስ ኦላና።

21ጎዳይ ሃ ቢታ ቃናስ ዴንዲዛ ዎዴ ኢዛ ያሺሴፌኔ ኢዛ ቴማፔ ዴንዲዳይሳን ሹቻ ጎንጎሎይኔ ዛላ ዛኣይ ዲዛሶ ባቃታና።

22ሼምፖይ ሲራ ኬዚን ኣሃ ጊዲዛ ኣሳን ኣማኔቶፍቴ፤ ኣሲ ኣይ ማዳኔ?

← Chapter 1 Jump to: Chapter 3 →