Isaiah 34

Amharic Gamo (ጋሞ ማጻፋ)

← Chapter 33 Jump to: Chapter 35 →

1ኢንቴኖ ካዎቴቶ ሺቂዲ ሲዪቴ! ኔኒ ዴሬዚ ኣኬካ! ቢታይኔ ቢታን ዲዛ ኡባይ፥ ኣላሜይኔ ኣላሜፔ ዪዳ ኡባይ ሲዮ!

2ጎዳይ ካዎቴ ኡባ ሃንቄቲዴስ፤ ኢዛ ሃንቆይካ ኢዛ ኦላንቻታ ኡባ ቦላና። ኢዚ ኢስታ ሙሌራ ይሳና፤ ሹካስካ ኣ ኢማና።

3ኢስታፌ ሃይቂዳይቲ ካሬ ኦሌታና፤ ኢስታ ኣሃይ ጺንቃና። ዙማቲ ሱ ጻላ ጊዳና።

4ሳሎ ጾሊንቴቲ ኡባይ ሴራና፤ ሳሎይ ጋልባ ማላ ጻጼታና፤ ጮራ ጾሊንቴቲ ኡባይ ሹሊዲ ቆቆፌቲዛ ዎይኔ ሃይ ማላኔ ሜሊዲ ሳኣን ዎዛ ባላሴ ሃይ ማላ ጊዳና።

5ታ ጊ ማሻይ ሳሎታ ጊዶን ባስ ጊዳና ጋካናስ ኡያዱስ፤ ቤኢቴ፤ ኤዶሜ ቦላ፥ ታኒ ቃንጊዳ ኣሳ ቦላ ፒርዳናስ ዎዱስ።

6ጎዳ ጊ ማሻይ ሱ ማይኣዱስ፤ ሞካ ካላዱስ፤ ዶርሳ ላቃ ሱኒኔ ዴይሻ ሱን ጎዜታዱስ፤ ርሾ ኪላሆ ሞን ጎዜታዱስ፤ ጎዳይ ቦጺራ ካታማን ያርሾ፥ ኤዶሜን ዎልቃማ ሹካ ጊግሲዳ ጊሻሳ።

7ቃሴ ኢስታራ ሜን፥ ኮርማይ ዎፋኖራ ኢሲፌ ኩንዳና፤ ቢታያ ሱን ጫጳና፤ ኢስታ ቢታይ ሞን ኣራዳና።

8ሄሲካ ጎዳይ ሃሎ ኬሲዛ ጋላሲኔ ጺዮኔ ጊሻስ ሞርኬታ ኦሊዛ ላይ ጊዳና።

9ኤዶሜ ካንቼቲ ሺዳ ጊዳና፤ ኢዚ ቢታይ ጹጌቲዛ ዲኔ ጊዳና፤ ኢዚ ቢታይ ሺዳ ማላ ኤጻና።

10ኢዞ ሚዛ ታማይ ቃማኔ ጋላስ ቶኤና፤ ጩዋይካ ሜርናስ ቱሉ ጋና፤ ዬሌታፔ ዬሌታ ጋካናስ ካይስ ጊዳና። ኦኒካ ናምኣን ሄራ ኣና።

11ጺሎይኔ ቁጻርሲ ኢዞ ላታና፤ ጉቶይኔ ቁሮይ ኢዚን ኬ ኬጻና፤ ጾሲ ኤዶሜ ቦላ ኢዞ ላላና ዎዶሮኔ ኢዞ ይሳና ቱምቤ ዬዳና።

12ኢዚ ዳናቲ ካዎ ጌቴቲ ጼይጌታናስ ዳንዳይዛ ሚሺ ዴና፤ ኢዚ ሃላቃቲ ሙሌራ ፒቴቲ ያና።

13ጊምቤቲ ዩዪዳ ካታማታ፥ ኢዚ ሚጻታ ዶዮይኔ ኦካይ ላታና፤ ዎራካናታ ኦላኔ ጉቶታ ዱሳሶ ጊዳና።

14ባዞ ዶኣቲ ጎዳሬታራ ኢሲፌ ዳና፤ ባዞ ዴይሽ ሚሳቲዛ ዳይዳንቲ ባንታ ጊዶን ጼይጌታና፤ ኦማርሳ ሜታቲ ሄን ሼምፓና፤ ባንታስ ዱሳሶ ሄን ዴማና።

15ጉቶይ ሄ ኬን ጱጱሌታ ዬጋና፤ ዛራዳካ ጱቂሳና፤ ባ ጪዬታካ ሃጳና፤ ዎሌቲ ዋን ዋን ሄን ሺቃና።

16ጎዳ ማጻፋን ጼሊቴ፤ ናባቢቴ። ሃይታፔ ኢሶይካ ፓጬና፤ ኢሶይ ኢሶይ ባስ ዋ ላጌ ዬና፤ ሃይሲ ሃ ኣዛዞዚ ኢዛ ዶናፔ ኬዚዴስ፤ ኢዛ ኣያናይ ኢስታ ኢሲ ቦላ ሺሻና።

17ኢስታ ጊሻ ጊሻ ኢስታስ ዎና፤ ኢዛ ኩሼይ ሜዛኔን ሜዛኔን ጊሻና፤ ኢዛ ሜርናስ ኢስታስ ጊዳና፤ ዬሌታፔ ዬሌታ ጋካናስ ኢስቲ ኢዚን ዴኣና።

← Chapter 33 Jump to: Chapter 35 →