Isaiah 54

Amharic Gamo (ጋሞ ማጻፋ)

← Chapter 53 Jump to: Chapter 55 →

1ጎዳይ፥ «ሃኔ ማይኔ ማጫሳዬ፥ ና ዬላ ኤሮንታሬ ዬጻ፤ ኢሊሊ ጋዳ ኡፋይሳን ዋሳ፤ ሃኔ ሚጻታ ኤሮንታሬ፥ ባ ኣዚናራ ዲዛሪ ናይታፔ ኣዚናይ ኣጊዳሪ ናይቲ ዳራና» ጌስ።

2ኔ ዱንካኔ ኤሳናሶ ኣሳ፤ ኔ ዱንካኔ ማጋላሻታካ ኣሳ ቶላ፤ ጹንፋ፤ ኔ ዎዶሮታ ኣዱሳ፤ ሽኬታካ ሚን ኤሳ።

3ኔኒ ኡሻቻ ባጋራኔ ሃዲርሳ ባጋራ ኣካና፤ ኔ ዛሬቲ ካዎቴታ ላታና፤ ሂስቲዲ ኣይኮይ ባይንዳ ኢስታ ካታማታን ኢስቲ ዳና።

4«ኣይኮይ ባ ባቦፋ፤ ኔ ዬላታካ፤ ሂርጎፋ፤ ኔ ካዉያካ፤ ኔ ዬላጋቴ ዬላ ኔኒ ዶጋና፤ ኔ ኣምኤቴ ቦሮካ ሃይሳፌ ሲንን ሃሳኣካ።

5ኔና ሜዳይሲ ኔስ ኣዚና፤ ኢዛ ሱንይካ ኡባፌ ዎልቃማ ጎዳ። ኔና ዎዚዳይ ኢስራኤሌ ጌሻ፤ ኢዚ ቢታ ኡባ ጾሳ ጌቴቴስ።

6ናቴን ኤኪዲ ካዳ ማቺ ማላ፤ ኔኒ ዎዚና ሜቂዳኔ ካቲዳ ማቺ ማላ፤ ጊዶ ኣቲን ጎዳይ ኔና ጉዬ ዛሪ ጼይጋና» ጌስ ጾሳይ።

7«ጉ ዎዴ ታኒ ኔና ኣጋዲስ፤ ጊዶ ኣቲን ጊታ ቃታን ታ ኔና ዛራ ሺሻና።

8ታ ጉ ዎዴስ ኬሃ ሃንቄቲዳ ጊሻስ፥ ታ ኣይፌሶ ኔፔ ጌንዲስ፤ ጊዶ ኣቲን ታ ሜርና ኪያቴን ኔስ ቃታና» ጌስ ኔና ዎዚዛ ጎዳይ።

9«ሃይሲ ታስ ኖሄ ዎዴ ሃ ቢታ ዛሪ ይሶንታ ማላ ታ ጫቆይሳ ሃኢካ ኔ ቦላ ዛራዳ ሃንቄቶንታ ማላኔ ሴሮንታ ማላ ታ ጫቃዲስ።

10ዙማቲ ቃጺኮ፥ ዙምቡላቲ ባ ዲዛሶፔ ኪቺኮካ፥ ኔስ ዲዛ ታ ሲቆይ ቃጼና፤ ኔናራ ታ ጫቂዳ ሳሮቴ ቃላይ ላሌቴና» ጌስ ኔና ማሪዛ ጎዳይ።

11ጎዳይ፥ «ሃኔ ኡንኤቲዳ ካታማዬ! ጎቴ ጫርኮን ሾጬቲዳሬ! ሚኔቶንታሬ! ቤኣ፥ ታኒ ኔና ቦንቼቲዳ ሹቻታን ኣሌቂሳ ኬጻና፤ ሴምፔሬ ሹች ኔስ ዮች ዬጋና።

12ታኒ ኔ ቁስቴ ዞኦ ኢንቁን፥ ኔ ፔንጌታ ጾልቂዛ ኢንቁታን፥ ኔ ዲርሳታ ቦንቼቲዳ ሹቻታን ኦና።

13ኔ ኣቱማ ናይቲ ኡባይ ጎዳፔ ታማርዳይታ ጊዳና፤ ኔ ናይታ ሳሮቴካ ዳራና።

14ኔኒ ጺሎቴን ሚና ኤቃና፤ ጌኔ ኦጌራ ኣይሶይ ኔፔ ሃካና። ኔና ባቢሲዛ ሚሺ ዴና፤ ሺሮቴ ኔፔ ሃካና፤ ኔ ማታካ ሺቄና።

15ኦኒካ ኔና ቆሂኮ፥ ሄሲ ታፔ ጊዴና፤ ኔና ቆሂዳይ ዲኮ ኔ ሲንን ኩንዳና፤

16«ቤኣ፥ ጺፋይ ታማን ቦንቃና ማላ ዎምፒና ፑኒዛይሳ፥ ኦላ ሚሽ ቆጺዛ ዎጋጬ ሜዳይ ታና። ቃሴ ባሽ ጋና ማላ ሜዳይካ ታና፤ ባሺዛይሳ ሜዳይካ ታና።

17ኔና ቆሃናስ ኦሴቲዳ ሚሺ ኦና። ኔና ሞቲዛ ኢንጻርስ ኡባ ኔ ላና፤ ሄሳ ጊሻስ ጎዳ ኣይሌታ ጺንጾይ ሃይሳ፤ ኢስቲ ታፔ ዴማና ኣንጆይ ሄሳ» ጌስ።

← Chapter 53 Jump to: Chapter 55 →