Isaiah 32

Amharic Gamo (ጋሞ ማጻፋ)

← Chapter 31 Jump to: Chapter 33 →

1ቤኢቴ፥ ካዎይ ጺሎቴን ካዎታና፤ ሃሪዛይቲካ ሱሬ ፒርዳን ሃራና።

2ኣሲ ሁኤን ሁኤን ጫርኮፌ ጌሚዛሶሆ፥ ጎቴፔካ ባቃቲ ኣቲዛሶሆ ጊዳና፤ ባዞ ቢታን ሃ ፑልቶ ማላ፥ ሳሜቲዳ ቢታን ዎጋ ዛላ ኩዋ ማላ ጊዳና።

3ጼሊዛ ኣሳታ ኣይፌይ ሃይሳፌ ጉዬ ቂሊምኤና፤ ሲዪዛይታ ሃይ ቤጊዲ ኤዝጋና።

4ታፒታፒዛይታ ዎዚናይ ኤራናኔ ኣኬካና፤ ዴዶቲዛይታ ኢንጻርሲካ ቢርሼታና፤ ጌሺዲካ ሃሳያና።

5ሃይሳፌ ጉዬን ኤያይ ጊታ ኣስ ጌቴቴና፤ ዎጋይ ባይንዳ ኣሲ ቦንቼቴና።

6ኤያይ ኤያቴ ሃሳዬስ፤ ኢዛ ዎዚናይ ኢታቴ ዩሺ ቆፔስ፤ ጾሳስ ያሻቴ ባይንዳ ሚሽ ኦስ፤ ጎዳ ቦላ ባላ ቃላ ሃሳዬስ፤ ጋፊዳይሳስ ካ ኢሜና፤ ሳሜቲዳይሳስ ሃ ኢሜና።

7ዎጋይ ባይንዳ ኣሳታ ሂላቴ ኢታ፤ ሜቶታንቻታ ማጋናይ ሱሬ ጊዲኮካ ሂዬሳታ ዎርዶራ ይሳናስ ኢታቴን ዩሺ ቆፔስ።

8ጊታ ኣሳስ ቆፋይካ ጊታ፤ ባ ጊታቴ ኦሶን ሚኒ ዴኤስ።

9ኢንቴኖ ኦቶሮይ ቱጪዳ ማጫሳቶ! ዴንዲቴ፤ ታ ጊዛዝ ሲዪቴ፤ ኢንቴኖ ባ ጊ ኡቲዳ ማጫ ናይቶ! ታኒ ኢንቴስ ዮቲዛይሳ ኤዝጊቴ።

10ላይይ ቡሮ ኣዳ ማላ፥ ኢንቴ ባ ጊ ኡቲዳይቲ ኮኮራና፤ ዎይኔ ቱራይ ኣይፌ ኢሜና ዱማ ዱማ ኣይፌ ኢንቴ ሺሺዛ ዎዴይ ዬና።

11ኢንቴኖ ኦቶሮይ ቱጪዳ ማጫሳቶ! ኮኮሪቴ። ኢንቴኖ ባ ጊዳ ማጫ ናይቶ! ሂርጋን ጋጂጋጂቴ። ኢንቴ ማይኢዳ ማይኦ ቃሪ ዬጊቴ፤ ኢንቴ ጼሳን ማቃ ዳንጪቴ።

12ኣራዳ ቢታ ጊሻስ ኢንቴ ቲራ ኢጪቴ፤ ኣይፊዛ ዎይኔ ሚ ጊሻስ ጬጪቴ፤

13ታ ዴራ ቢታ ጊሻስ፥ ኣጉንኔ ኪንዲቾይ ሞኪዳ ቢታ ጊሻስ፥ ሆምቦጬን ኢስታን ጉፒዛ ኬታ ኡባ ጊሻስ፥ ሆምቦጬን ኢዚን ጉፒዛ ካታማይስ ዬኪቴ።

14ሚጻቲ ካይዛና፤ ዳሮ ሺሮቲዛ ካታማያ ዲሚ ጋና፤ ሚጻቲኔ ቃቶቲ ሜርናስ ጎንጎሎ፥ ሃርዲዳቲ ጉፒዛሶሆኔ ዉዴይ ሄሜቲዛሶ ጊዳና።

15ሄሲካ ሃናናይ ኣያናይ ኑስ ቦላፌ ጉካናሼ፥ ባዞ ቢታይ ኣራዳ ጊዳናሼ፥ ኣራዳ ቢታይ ዎራ ሚሳታናሼ ጋካናሳ።

16ሄሳፌ ጉዬ ባዞ ቢታን ሱሬ ፒርዳይ ዴኣና፤ ኣራዳ ቢታንካ ጺሎቴ ዳና።

17ጺሎቴ ኣይፌይ ሳሮቴ፤ ጺሎቴ ኦሶይ ዎፓኔ ሜርናስ ኣማኔቴ ጊዳና።

18ታ ዴሬይ ሳሮይ ዲዛሶን፥ ኣማንዛሶን፥ ዎፓይ ዲዛሶን ዎፑ ጊ ዳና።

19ሻቺ ዎራ ኩራኪኮ፥ ካታማይካ ሙሌራ ኩንዲኮ፥

20ሻፋይ ዲዛሶን ዲዛሶን ካ ዜሪዛይቶ፥ ኢንቴ ቦራታኔ ሃሬታ ሂርጋይ ባይንዳ ሄሚዛይቶ፥ ኢንቴ ኣይ ማላ ኣንጄቲዳይታ ጊዳንዴቲ!

← Chapter 31 Jump to: Chapter 33 →