Isaiah 48

Amharic Gamo (ጋሞ ማጻፋ)

← Chapter 47 Jump to: Chapter 49 →

1ጎዳይ፥ «ኢንቴኖ ኢስራኤሌ ሱንን ጼይጌቲዳ፥ ያቆቤሶ ኣሳቶ! ዩሁዳ ዛሬፔ ቤቲዳይቶ! ኢንቴኖ ጎዳ ሱንን ጫቂዛይቶ! ቱማቴኒኔ ጺሎቴን ጊዶንታ፥ ኢስራኤሌ ጾሳ ጼይጊዛይቶ! ሃይሳ ሲዪቴ።

2‹ኑኒ ጌሻ ካታማይን ዲዛይታ› ጊዲ ኢንቴርካ ኢንቴና ጼይጊዛይቶ! ኢስራኤሌ ጾሳን ኣማኔቲዛይቶ! ጎዳይ ኡባፌ ዎልቃማ ጾሳይ ጊዛይሳ ሲዪቴ።

3«ካሴ ሃኒዳ ሚሻታ ታኒ ዳሮ ዎዴፔ ሲንን ዮታ ዎዲስ፤ ታ ዶናፔ ኬዚዴስ። ኢስቲ ኤሬታና ማላካ ታኒ ኦዲስ፤ ታ ዲንጋቴ ኦን ኢስቲካ ፖሌቲዳ።

4ኔ ኣይ ማላ ሲሞንታ ኣስ ጊዲዳኮ ታ ኤራይስ፤ ኔ ሞርጌ ሻያይ ቢራታ ማላ፥ ኔ ኮንኬይ ጻርቂማላ ሚሳቴስ።

5ሄሳ ጊሻስ ሃይታ ሃ ዮኦታ ቤኒ ታ ኔስ ዮታዲስ፤ ኢስቲ ፖሌታናፔ ሲንን ታ ኔና ኤሪሳ ዎዲስ፤ ሄሲካ፥ ‹ታ ኤቃ ጾሳቲ ሃይሳ ኦዳ፤ ሚፌ ማሴቲዳ ሚስሌቲኔ ቢራታፔ ኦሴቲዳ ታ ጾሳቲ ሃይሳ ታስ ኣዛዚዳ› ጎንታ ማላሳ።

6«ሃይታ ሃ ዮኦታ ኔ ሲያዳሳ፤ ኣኔ ኡባካ ጼላ፤ ኢስቲ ሊኬ ጊዲዳይሳ ኔኒ ኔ ሁኤራ ማርካቲኪ? ሃኢፔ ዶማዳ ኦራ ሚሻታ፥ ኔፔ ጌሚዳይታኔ ኔ ኤሮንታ ዮኦታ ታ ኔስ ዮታና።

7ሄይቲ ሃኢ ሜቲዳ ኣቲን ካሴ ጊዴና፤ ኢስታ ጊሻስ ኔ ሃቺፌ ኣቲን ካሴ ሲያቤካ፤ ሄሳ ጊሻስ፥ ‹ኤ፥ ታ ኢስታ ጊሻስ ኤራይስ› ጋና ዳንዳያካ።

8ኔኒ ሲያቤካ ዎይኮ ኤራቤካ፤ ኔ ሃይ ቤኒፔካ ዶዬቲቤና። ጋሶይካ ኔኒ ካሴካ ጪሚዛዴኔ ናቴፌ ዶማዳ ኔ ማካላንቻ ጌቴቲዳይሳ ታ ኤራዲስ።

9«ታ ሱን ጊሻስ ጋዳ ታኒ ታ ሃንቆ ጋምኢሳና፤ ታ ጋላታ ጊሻስ ጋዳ ታ ኔፔ ቴቃና፤ ታ ኔና ቃንጾንታ ኣጋና ማላሳ።

10ቤኣ ቢራ ማላ ጊዶንታ ኣጊኮካ ኔና ጋጫዲስ፤ ታማ ማላ ሜቶን ፓጫዲስ፤

11ታ ጊሻስ ጋዳ፥ ታኒ ታ ጊሻስ ጋዳ ኦይስ። ታርካ ታና ዎስታ ካዉሻቴስ ኣ ኢሞ? ታ ቦንቾ ኦናስካ ኢሚኬ።

12«ኔኖ ያቆቤ፥ ታኒ ጼይጊዳ ኢስራኤሌ ታኒ ጊዛ ሲያ። ታኒ ኢዛ፤ ኮይሮይካ ታና፤ ዉርሴይካ ታና።

13ቢታስ ዮች ዬጊዳይ ታ ኩሼ፤ ሳሎታ ሚጪዳይ ታ ኡሻቻ ኩሼ። ታ ኢስታ ጼይጊዛ ዎዴ ኢስቲ ኡባይካ ኢሲ ቦላ ኤቄቴስ።

14«ኢንቴ ኡባይካ ኢሲ ቦላ ሺቂዲ ሲዪቴ፤ ኤቃ ጾሳታፔ ካሴ ሃይታንታ ዮቲዳይ ኦኔ? ጎዳስ ዶሬቲዳ ላጌይ ኢዚ ባቢሎኔ ቦላ ሃልቺዳይሳ ፖላና፤ ኢዛ ቄሴይካ ባቢሎኔታ ቦላ ጊዳና።

15ታኒ ታርካ ዮታዲስ፤ ቱሙካ ታ ጼይጋዲስ፤ ታ ኢዛ ኤሃና፤ ኢዛ ኦሶይካ ኢዛስ ፖሌታና።

16«ታኮ ሃ ሺቂዲ ሃይሳ ሲዪቴ፤ ታኒ ኮይሮፔ ዶማዳካ ጌማን ሃሳያቤኬ፤ ኢዚ ፖሌቲሺን ታ ሄን ዳይስ» ጌስ። ሃኢካ ኡባ ሃሪዛ ጎዳይኔ ኢዛ ኣያናይ ታና ኪቲዳ።

17ጎዳይ ኔና ዎዚዳ ኢስራኤሌ ጌሻይ፥ «ታኒ ጎዳ ኔ ጾሳይ፥ ኔና ጎኢዛዝ ታማርሲዛይሳ፥ ባናስ ቤሲዛ ኦጌራ ኔና ካሌዛይ ታና።

18ኔኒ ታ ኣዛዞ ሲዪዳ ጊዲዳኮ፥ ኔስ ሳሮቴ ሻፋ ማላ፥ ኔስ ጺሎቴካ ኣባ ዳምባላ ማላ ጊዳናሺን።

19ኔ ዜሬ ኣባ ሻሚንታ ማላ፥ ኔ ናይቲካ ቆዳይ ባይንዳ ጉዱላ ማላ ጊዳናሺን፤ ኢስታ ሱን ቁጬቴና፤ ታ ሲንፌ ዬቴናሺን» ጌስ።

20ባቢሎኔ ቢታፌ ኬዚቴ፤ ባቢሎኔ ኣሳፔ ባቃቲቴ! ሃይሳ ኢሊሊሳን ኤሪሲቴ፤ ኣዋጂቴ፤ ቢታ ጋጻ ጋካናስ ዮቲቴ፤ «ጎዳይ ባ ኣሽካራ ያቆቤ ዎዚዴስ» ጊቴ።

21ኢዚ ኢስታ ባዞ ቢታራ ካሌሺን ኢስቲ ሳሜቲቤቴና። ኢዚ ኢስታስ ዛላፌ ሃ ፑልቲሲዴስ፤ ኢዚ ዛላ ጳልቂዴስ፤ ሃካ ቂ ኬዚዴስ።

22«ኢታታስ ሳሮይ ባ» ጌስ ጎዳይ።

← Chapter 47 Jump to: Chapter 49 →