Isaiah 65

Amharic Gamo (ጋሞ ማጻፋ)

← Chapter 64 Jump to: Chapter 66 →

1ጎዳይ፥ «ታና ዎሶንታይታስ ታ ቆንጫዲስ፤ ታና ኮዮንታይታስ ቤታዲስ። ታ ሱን ጼይጎንታ ካዎቴስ፥ ‹ዬ! ዬ!› ጋ ኮያዲስ።

2ማካላንቻ ዴሬታስ፥ ኢታ ኦጌራ ቢዛይታስ፥ ባንታ ዎዚና ኣሞ ካሊዛይታስ፥ ታ ኩሼ ጋላስ ኩሜ ሚጫዲስ።

3ኣታኪልቴሶሆን ያርሾ ያርሺዛይቲ፥ ኡርቃፌ ሜቲዳ ያርሾሶሆታ ቦላ ኤጻኔ ጩዋሲዛይቲ፥ ኡባ ዎዴ ታና ሃንቄዛ ዴሬታ።

4ዱፎ ጊዶን ኡቲዛይቲ፥ ጌማሶሆን ኣቂዛይቲ፥ ጉዱን ኣሾ ሚዛይቲ፥ ኢስቲ ባንታ ኦቶታ ቱኒዳ ኣሾ ጫምባ ኩንዛይታ።

5ኢስቲ፥ ‹ታ ጌሽ ጊዲዳ ጊሻስ ኪቻ፤ ታ ማታ ዮፓ፤ ታኮ ሺቆፓ› ጊዛይታ። ሃይሳ ማላ ዴሬይ ታ ሲን ጩዋ ማላኔ ጋላስ ኩሜ ኤጺዛ ታማ ማላ።

6«ቤኢቴ፥ ታ ሲንን ጻፌቲ ኡቲዴስ፤ ታ ጮኡ ጊኬ፤ ጊዶ ኣቲን ኢዛ ኦሶ ኦሶ ማላ ታ ኢዛስ ኢማና፤ ኢስታ ሃኖ ማላ ታ ኢስታስ ጪጋና።

7ኢንቴ ናጋራ ሃሎኔ ኢንቴ ኣዋታ ናጋራ ሃሎ ታ ኬሳና። ኢስቲ ዙማታ ቦላ ጹጌቲዛ ያርሾ ሺሺዳ ጊሻስ፥ ዙምቡላታ ቦላ ታና ጫዪዳ ጊሻስ፥ ኢስቲ ማኪዳ ሚሻን ኢስታስ ዛሪ ማኬታና፤ ኢስቲ ካሴ ኦዳ ኦሶ ኩሼ ዛሪ ኤካና» ጌስ።

8ጎዳይ፥ «ዎይኔ ዉርጮ ጊዶን ኢሊሎይ ዲዛ ማላ ኣሳይካ፥ ‹ኢዛ ጊዶን ሎኦ ሚሺ ዲዛ ጊሻስ ኢዛ ቃንጾፍቴ› ጊዛ ማላ፥ ታኒካ ታ ኣይሌታ ጊሻስ ጋዳ ሄሳ ኦና፤ ሙሌራ ታኒ ኢስታ ይሲኬ።

9ታኒ ያቆቤ ዜሬታፔኔ ዩሁዳ ዜሬፌ ታ ዙማታ ላታናይታ ታ ኤሃና፤ ዶሬቲዳ ታ ዴሬይ ኢስታ ላታና፤ ታ ኣሽካራቲካ ሄን ዳና።

10ታና ሚን ኮይዛ ታ ዴሬዛስ፥ ላሻሮኔይ ዶርሳ ዉዴይ ሄሜቲዛሶ፥ ኣኮሬ ዙሌይ ዉዴ ሜሄይ ፔኢዛሶ ጊዳና።

11ጊዶ ኣቲን ጎዳ ኣጊዳ ኢንቴስ፥ ታ ጌሻ ዙማ ዶጊዳ ኢንቴስ፥ ‹ታ ባሶ› ጌቴቲዛ ኤቃ ጾሳስ ሶሆ ጊጊሲዳ ኢንቴስ፥ ‹ጋዴ› ጌቴቲዛ ኤቃ ጾሳስ ዋላኬቲዳ ዎይኔ ኡሹ ዋንጫን ኩንዳ ኢንቴስ፥

12ታ ጼይጊን ዛሮንታ ኢጺዳ ጊሻስ፥ ታ ዮቲን ሲዮንታ ኢጺዳ ጊሻስ፥ ታ ሲንንካ ኢታ ኦዳ ጊሻስ፥ ታና ሃንቄዛ ሚሽ ኢንቴ ዶሪዳ ጊሻስ፥ ታ ኢንቴና ማሻስ ኣ ኢማና፤ ኢንቴ ኡባይካ ሹኬታናስ ቆ ኢማና» ጌስ።

13ሄሳ ጊሻስ፥ ኡባ ሃሪዛ ጎዳይ፥ «ቤኢቴ፥ ታ ኣሽካራቲ ማና፤ ኢንቴ ጊዲኮ ጋፋና፤ ታ ኣሽካራቲ ኡያና፤ ኢንቴ ጊዲኮ ሳሜታና፤ ታ ኣሽካራቲ ኡፋዬታና፤ ኢንቴ ጊዲኮ ዬላታና።

14ታ ኣሽካራቲ ዎዚናፔ ኡፋይሳን ዬጻና፤ ኢንቴ ጊዲኮ ዎዚናይ ሜቂን ኢንቴ ዋሳና፤ ኢንቴ ኣያናይ ሜቂዳ ጊሻስ ኢንቴ ዎ ዎ ጊዲ ዋሳና።

15ኢንቴ ኢንቴ ሱን ዶሬቲዳ ታ ዴሬይ ቃንጋና ማላ ኣ ኢማና፤ ኡባ ሃሪዛ ጎዳይ ኢንቴና ዎና፤ ባስ ሃጋዚዛይታስ ጊዲኮ ኢዚ ሃራ ሱን ኢማና።

16ሄሳ ጊሻስ ቢታይ ቦላ ኣንጆ ኮይዛዴይ ቱማ ጾሳ ሱንን ኣንጄታና፤ ቢታይን ጫቂዛ ኣሲ ቱማ ጾሳ ሱንን ጫቃና፤ ካሴ ኣዳ ሜቶቲ ዶጌቲዳ፤ ታ ኣይፌፔካ ጌሚዳ» ጌስ።

17ጎዳይ፥ «ሄኮ፥ ታኒ ኦራ ሳሎታኔ ኦራ ሳኣ ሜና፤ ካሴ ኣዳ ሚሻቲ ቆፌቴቴናኔ ሃሳኤቴቴና።

18ጊዶ ኣቲን ታኒ ሜዛይሳን ኡፋዬቲቴ፤ ሜርናስ ሆምቦጪቴ፤ ታኒ ዬሩሳላሜ ኡፋይሳስ፥ ኢዚ ዴራካ ሆምቦጬስ ሜና።

19ታኒ ዬሩሳላሜን ኡፋዬታና፤ ታኒ ታ ዴሬዛን ሆምቦጫና፤ ሃይሳፌ ጉዬን ዬሆይኔ ዋሶይ ሄን ሴቴቴና።

20ሃይሳፌ ጉዬን ሄን ጉ ዎዴስ ሼምፖራ ፓጻ ዳና ዪይ ዎይኮ ዎዴ ካሎንታ ጪማይ ዴና፤ ጼቱ ላይ ኩሚዳ ኣሲ ሃይቂኮ ዎዴይ ጋኮንታ ሙልቄቲ ሃይቂዳ ኣሳ ማላ ቆዴታና፤ ኣሲ ጼቱ ላይ ኩሞንታ ሃይቂኮ ቦሻን ሃይቂዳ ማላ ቆዴቴስ።

21ሄ ዎዴ ኣሳይ ኬ ኬጻና፤ ኢዛንካ ዳና፤ ዎይኔ ሚ ቶኪዲ ኢዛ ኣይፌ ማና።

22ሃይሳፌ ጉዬ ሃራ ኣሲ ኢዛን ዳና ኬ ኬጼቴና፤ ዎይኮ ሃራይ ማና ሚሺ ቶኬቴና፤ ታ ዴራ ላይ ሚ ላይ ማላ ኣዱቃና፤ ታኒ ዶሪዳይቲ ባንታ ኩሼ ኦሶን ኣዱሳ ላይ ኡፋዬታና።

23ኢስታ ዳቡራይ ሃዳ ኣቴና፤ ቃዳ ኢታ ናካ ዬሌቴና፤ ኢስቲኔ ኢስታ ዜሬ ጎዳይ ኣንጂዳ ዴሬ ጊዳና።

24ኢስቲ ቡሮ ታና ጼይጋናፔ ካሴታ ታኒ ኮያና፤ ኢስቲ ታስ ዮቲ ዉርሶንታ ታ ሲያና።

25ካና ሱይቴይኔ ዶርሳ ላቃይ ኢሲፌ ማና፤ ጋሞይ ቦራ ማላ ማታ ማና፤ ሾሺ ጉዱላ ላጫና፤ ታ ጌሻ ዙማ ቦላ ኢስቲ ቆሄቴቴና፤ ባሺካ ኢስታ ቦላ ዬና» ጌስ።

← Chapter 64 Jump to: Chapter 66 →