Isaiah 28

Amharic Gamo (ጋሞ ማጻፋ)

← Chapter 27 Jump to: Chapter 29 →

1ኤፍሬሜን ዲዛ ማቲዛይታስ፥ ኦቶሬቴስ፥ ካላቻ ጊዲዳሪስ፥ ጪሊላ ሾባ ሁኤን ኪፒ ጋ ኡቲዳ፥ ኢዛስ ቦንቾ ሴሎ ጊዲዳ ሹላ ጪሻይስ፥ ዎይኔ ኡሻይ ኢስታ ዜሬስ ኦቶሬቴስ ጊዲዳ ካታማይስ ኣዬ ኣና!

2ቤኢቴ፥ ጎዳስ ዎልቃማኔ ሚኖ ጊዲዳ ኢሶይ ዴስ፤ ሄሲካ ሻቻ ኡሾ ማላ፥ ይሲዛ ጎቴ ጫርኮ ማላ፥ ዎልቃማ ዳምባላ ማላኔ ዎልቃማ ኢራ ማላ ዎልቃን ኢዚ ኢዞ ዱጌ ቢታን ዬጋና።

3ማቲዛ ኤፍሬሜ ኣሳታ ኦቶሮ ካላቻይ ቶሆን ዬታና።

4ጪሊላ ሾባ ሁኤን ኪፒ ጋ ኡቲዳ ኢዛስ ቦንቾ ሴሎ ጊዲዳ ሹላ ጪሻያ፥ ካ ሺሾፔ ሲንን ጋኪን ኣሲ ቤኢዳ ማላ ጹጲ ኤኪዲ ሄራካ ሚቲዛ ባላሴ ማላ ጊዳና።

5ሄ ጋላስ ኡባፌ ዎልቃማ ጎዳይ ባ ኣሳፔ ጫሻ ኣቲዳይታስ ቦንቾ ካላቻኔ ፑላ ኣኪሊሌ ጊዳና።

6ኢዚ ፒርዲዛይታስ ሱሬ ፒርዳ ፒርዲዛ ኣያና ኦላ ካታማ ፔንጌፌ ዛሪዛይታስ ዎልቃ ጊዳና።

7ሃይቲ ዎይኔ ኡሹ ኡዪዲ ዪጮቴቴስ፤ ማሲዛ ኡሻን ጋንዲጋሬቴስ። ቄሴቲኔ ናቤቲ ማሲዛ ኡሻን ጋንዲጋርዳ፤ ዎይኔ ኡሻ ጋሶን ዮኦይ ኢስታፌ ባሌቲዴስ፤ ማሲዛ ኡሻን ጋንዲጋርዳ፤ ኣጁታ ሊኬራ ቤኤቴና፤ ፒርዳ ፒርዲሼ ጴቴቴስ።

8ኢስታ ማዳ ኡባይ ጮሽ ጻላ፤ ጮሻን ሞሬቶንታሶይ ዴና።

9ኢስቲ፥ «ኢዚ ኦና ታማርሲዜ? ኪታካ ኦስ ቆንጪሲዜ? ማ ኣጊዳ ናይታሴዬ ን ዱሶ ናይታሴ?

10ኣዛዞ ቦላ ኣዛዞ፥ ኣዛዞ ቦላ ኣዛዞ ዎጋ ቦላ ዎጋ፥ ዎጋ ቦላ ዎጋ፥ ሃንካ ጉራ፥ ሄንካ ጉራ ኦስ» ጋና።

11ሂስቲኮ ሲንፌ ጾሳይ ኣላጋታ ቃላኒኔ ኢማታ ዶናን ሃ ኣሳስ ሃሳያና።

12ኢዚ ኢስታስ፥ «ሃና ሼምፖሶ፤ ዳቡርዳይ ሼምፖ፤ ሃና ሼምፖሶ» ጊዳይ ኦናሴ? ኢስቲ ጊዲኮ ሲያና ኮዪቤቴና።

13ሄሳ ጊሻስ ጎዳ ቃላይ ኢስቲ ቢዲ ጉዬ ኩንዳና ማላ፥ ማዱንጻና ማላኔ ዎጺማዴን ኦይኬታና ማላ፥ ዲኤታና ማላ ኣዛዞ ቦላ ኣዛዞ፥ ኣዛዞ ቦላ ኣዛዞ፥ ዎጋ ቦላ ዎጋ፥ ዎጋ ቦላ ዎጋ ጊዲዲ፥ ሃን ጉራ፥ ሄን ጉራ ሃናና።

14ሄሳ ጊሻስ ኢንቴኖ ዬሩሳላሜን ዲዛ ኣሳ ሃሪዛ ቂልጪዛይቶ! ጎዳ ቃላ ሲዪቴ።

15ኢንቴ፥ «ኑኒ ሃይቆራ ጫቄቲዶስ፤ ዱፎራካ ሲጌቲዶስ፤ ዎርዶ ኑስ ዜምፖሶኔ ቆቴቲዛሶ ኦዶስ፤ ዎልቃማ ቦሻይ ፒቲ ኤኪ ቢሼ ኑና ቦቻናስ ዳንዳዬና» ጊ ኦቶሬቲዴታ።

16ሄሳ ጊሻስ ኡባ ሃሪዛ ጎዳይ፥ «ቤኢቴ! ታኒ ጺዮኔን ፓጬቲዳ ሹች፥ ዮቻ ሹች፥ ሚኖ ዮቻስ ጊዲዛ ቦንቼቲዳ ጉላ ሹች ዎና፤ ኢዛን ኣማኒዛይ ዬላቴና።

17ታኒ ሱሬ ፒርዳ ዋ ዎዶሮ፥ ጺሎቴካ ቱምቤ ማላ ኦና፤ ኢንቴ ዎርዶ ዜምፖሶ ኦዳይሳ ሻቻ ኢራይ ሜጫና፤ ኢንቴ ቆቴቲ ኣቲዛሶዛካ ሃ ሚታና» ጌስ።

18ኢንቴ ሃይቆራ ጫቄቲዳ ጫቆይ ኣታና፤ ኢንቴ ዱፎራ ሲጌቲዳ ሲጋይ ላሌታና፤ ዎልቃማ ቦሻይ ፒቲ ኤኪ ቢሼ ኢንቴናካ ፒቲ ኤኪ ባና።

19ኢዚ ዪዳ ዎዴ ዎዴ ኢንቴና ኤኪ ባና፤ ማላዶ ማላዶ፥ ቃማኔ ጋላስ ኢንቴና ፒቲ ኤፋና፤ ሃ ቃላ ኢንቴ ኣኬኪዛ ጊዲኮ ሺሮ ቦላ ሺሮ ኤሃና።

20ቶሆ ጮጎቲ ኢቾንታ ማላ ሂጻይ ቃን፤ ጋ ማይኣናስ ኣፋላይካ ጉ።

21ጎዳይ ፓራጺሜ ዙማን ኦዳ ማላ፥ ባ ኦሶ፥ ባ ኢማ ኦሶ፥ ሄሲካ ባ ኦራ ኦሶ ኦናስ ዴንዳና። ቃሴ ጌባኦኔ ዙሌን ኦዳ ማላካ ኦና።

22ጎዳይ፥ ኡባፌ ዎልቃማ ጎዳይ ኢዚ ቦሻ ቢታ ኡባ ቦላ ኤሃናስ ኣዋጂዳይሳ ታኒ ሲዪዳ ጊሻስ ሃኢ ኢንቴ ቂልጪዛይሳ ኣጊቴ፤ ኣካይ ጊኮ ኢንቴ ቦላ ቃሾይ ሚናና።

23ኤዝጊዲ ታ ዮቲዛይሳ ሲዪቴ፤ ኣኬኪዲ ታ ቃላ ሲዪቴ።

24ጎሻንቻይ ካ ዜራናስ ኡባ ዎዴ ሄ ሶሆ ጎዪሼ ዴኢዜ? ቃሴ ኢዚ ሄምኤ ሊቂሲሼኔ ኡባቶ ፒጺሼ ዴኢዜ?

25ጎሻ ሊቂሲዲ ኣሱታኔ ኣኑጋ ዜሬኔ? ጊስቴዛ ኢዛስ ጊጊዳሶሆን፥ ባንጋ ኢዛስ ጊጊዳሶሆን ኣርዳ ኢዛስ ጊጊዳሶሆን ዜሬኔ?

26ኢዛ ጾሳይ ኢዛ ታማርሴስ፤ ሱሬ ኦጌካ ኢዛ ቤሴስ።

27ኣሱታይ ሎዳን ቡኬቴና፤ ኣኑጋይ ፓራ-ጋሬን ቡኬቴና፤ ኣሱታይ ጉፌን፥ ኣኑጋይ ቄሪ ሎዳን ቡኬቴስ።

28ሶሎ ኡካናስ ካ ጋጬቴስ፤ ሄሳ ጊሻስ ኢሲ ኣሲ ሜርናስ ካ ቡኬና፤ ካ ቡኪዛ ፓራ-ጋሬታ ኢዛ ቦላራ ላጊኮካ ካ ጋጬቴና።

29ሃይሲ ኡባይ ባ ዞሬን ማላሊሲዛዝ፥ ባ ኣ ኤራቴን ማላሊሲዛዝ ጊዲዳ ኡባፌ ዎልቃማ ጎዳፔ ሃኔስ።

← Chapter 27 Jump to: Chapter 29 →