Isaiah 42

Amharic Gamo (ጋሞ ማጻፋ)

← Chapter 41 Jump to: Chapter 43 →

1ጎዳይ፥ «ታኒ ካ ኦይኪዳ ታ ኣሽካራይ፥ ታ ኢዛን ኡፋዬቲዛ ሙሩታይ ሃይሳ፤ ታኒ ታ ኣያና ኢዛ ቦላ ዎዲስ፤ ኢዚ ካዎቴታስ ሱሬ ፒርዳ ኤሃና።

2ዋሴና፤ ባ ቃላ ቂሴና፤ ባ ጬንጉርሳካ ኦጌ ቦላ ኬሂ ሲሴና።

3ዲንጬቲዳ ማቃ ኢዚ ሜንና፤ ጩዋቲዛ ሙቃዳ ኢዚ ቶይሴና፤ ኣማኔቴን ኢዚ ሱሬ ፒርዳ ኤሃና።

4ኢዚ ቢታ ቦላ ሱሬ ፒርዳ ኤሃና ጋካናስ ዳቡሬና፤ ሂዶታካ ቃንጼና፤ ሃሩሮቲ ኢዛ ዎጋን ኣማኔታና» ጌስ።

5ሳሎታ ሜዳይ፥ ኢስታ ሚጪዳይካ፥ ሳኣኔ ኢዚን ዲዛ ኡባ ጊግሲዳይ፥ ባ ዴሬስ ፔኖ ኢዚን ዴኢዛ ኣሳታስ ሼምፖ ኢሚዛ ጎዳ ጾሳይ፥

6«ታኒ ጎዳይ ኔና ጺሎቴን ጼይጋዲስ፤ ታ ኔ ኩሼ ኦይካና፤ ታ ኔና ናጋና። ታኒ ኔና ካዎቴስ ጫቆ ቃላ፥ ኣይዛቤታስካ ፖኦ ሂስታና

7ኔ ቆቄታ ኣይፌ ዶይኣና፤ ዲኤቲዳይታ ቃሾ ኬፌ ቢርሻና፤ ማን ኡቲዳይታካ ካርቻሌፌ ኬሳና።

8«ታኒ ጎዳ፤ ሃይሲ ታ ሱን፤ ታ ቦንቾ ሃራስ ኣ ኢሚኬ፤ ታ ጋላታካ ኤቃ ጾሳታስ ሼኬ።

9ቤኢቴ ቤኒ ዮኦቲ ፖሌቲዳ፤ ሃኢ ታኒ ኦራ ሚሽ ኣዋጃይስ፤ ኢዚ ሞካናፔ ሲን ታ ኢንቴስ ዮታይስ» ጌስ።

10ኢንቴኖ ዱጌ ኣባን ዎዛይቶ፥ ሄን ዲዛ ኡባቶ! ኢንቴኖ ሃሩሮቶ! ሄንካ ዲዛ ኡባቶ! ጎዳሲ ኦራ ማዛሙሬ ዬጺቴ፤ ቢታ ጋጻፔ ዶሚዲ ኢዛስ ጋላታ ማዛሙሬ ሺሺቴ።

11ባዞይኔ ካታማቲ ባንታ ጬንጉርሳ ቁ ሂስቴቶ፤ ቄዳሬይ ዴኢዛ ጉታይ ኡፋዬቶ፤ ሴላ ዴሬ ኣሳቲ ኡፋይሳን ዬጼቶ፤ ዙማ ጼራንካ ኢሊሌቶ።

12ኢስቲ ቦንቾ ጎዳስ ኢሜቶ፤ ኢዛ ጋላታይካ ሃሩሮታን ኣዋጄቶ።

13ጎዳይ ኦላ ቃራ ማላ ኬዛና፤ ኦላንቻ ማላ ሆኤቲ ዴንዳና። ጬቄቴ ጋይሮ ሲሳና፤ ባ ሞርኬታካ ኦሊ ጾናና።

14ጎዳይ፥ «ታኒ ኣዱሳ ዎዴሶፌ ጮኡ ጋዲስ፤ ሲርጲ ጋዲስ፤ ታና ቁምኣ ኦይካዲስ፤ ሃኢ ጊዲኮ ሚጻ ኦይኬቲዳ ማጫሳ ማላ ዋሳይስ፤ ሼኖታይሲኔ ባናካይስ።

15ታኒ ዙማታኔ ዙምቡላታ ዎዲሳና፤ ዶዛታ ኡባ ሜሊሳና። ሻፋታ ሃሩሮ ቢታ ኬሳና፤ ኤሌ ሃታካ ሚጪንቻና።

16ታኒ ቆቄታ ኢስቲ ኤሮንታ ኦጌ ካሌና፤ ኢስቲ ሜዜቶንታ ኦጌራካ ታ ኢስታ ኤፋና፤ ማዛ ታ ኢስታ ሲንን ፖኢሳና፤ ኩንዱኩርጮ ሶሆታ ታ ጊጊሳና፤ ሃይታንታ ኡባ ታ ኦንታ ኣጊኬ።

17ኤቃ ጾሳታን ኣማኔቲዛይቲ ጊዲኮ ሚስሌታካ፥ ‹ኢንቴ ኑ ጾሳታ› ጊዛይቲ ጉዬ ሲማና፤ ኢስቲ ሙሌራ ካዉያና» ጌስ።

18ጎዳይ፥ «ኢንቴኖ ቱሌቶ ሲዪቴ! ኢንቴኖ ቆቄቶ ቤኢቴኔ ጼሊቴ!

19ታ ኣሽካረራ ታኒ ኪቲዳዴፌ ኣቲን ሃራ ቱሌይ ኦኔ? ታስ ኣማኔቲዳዴ ማላ ቆቄይ፥ ጎዳ ኣሽካራ ማላ ቆቄይ ኦኔ?

20ዳሮ ሚሽ ቤኢዴታ ሺን ኣኬኪቤኬታ፤ ኢንቴ ሃይይ ዶያ ዴስ ሺን ሲዬኬታ» ጌስ።

21ጎዳይ ባ ጺሎቴ ጊሻስ ጊዲ፥ ባ ዎጋ ጊታኔ ቦንቾ ኬሲዳ ጊሻስ ኡፋዬቲዴስ።

22ሃ ዴሬይ ቦጌቲዳኔ ቦንቄቲዳ፥ ኦላ ጊዶን ዎዳ፥ ዎይኔ ኬይ ኢዛ ቦላ ጎርዴቲዳ ዴሬ፤ ኢስቲ ቦጌቲዳ፤ ኢስታ ኣሺዛዴይ ዴና፤ ኢስቲ ዲኤቲዳ፤ «ኢስታ ዛሪቴ» ጊዛይካ ባዋ።

23ኢንቴ ጊዶፌ ሃይሳ ሲዪዛይ፥ ሲንፌ ያና ዎዴስ ኣኬኪ ሲዪዛይ ኦኔ?

24ያቆቤይ ቦጌታና ማላ፥ ኢስራኤሌይ ዲኤታና ማላ ኦዳይ ኦኔ? ናጋራ ኦዲ ኑ ቆሂዳ ጎዳ ጊዴኔ? ኢስቲ ኢዛ ኦጌ ካላናሲኔ ኢዛ ዎጋስ ኣዛዜታና ኮዮንታ ኣጊዳ ጊሻሳ።

25ሄሳ ጊሻስ ኤጺዛ ባ ሃንቆዛ፥ ኢታ ኦላ ኢስታ ቦላ ዬዲዴስ፤ ታማ ላጮን ኢስታ ጊዶዴስ፤ ኢስቲ ጊዲኮ ሄሳ ኣኬኪቤቴና፤ ኢስታ ጹጊዴስ ሺን ኢስቲ ዎዚናን ዎቤቴና።

← Chapter 41 Jump to: Chapter 43 →