Isaiah 41

Amharic Gamo (ጋሞ ማጻፋ)

← Chapter 40 Jump to: Chapter 42 →

1ጎዳይ፥ «ኢንቴኖ ሃሩሮቶ፥ ጮኡ ጊቴ፤ ካዎቴቲ ባ ዎልቃ ኦራቶ፤ ሺቂዲ ሃሳዬቶ፤ ኣኔ ፒርዳ ሺሎታ ሲንን ጋይቶስ።

2ኣርሼይ ሞኪዛ ባጋፌ ኢሳ ዴንዳይ፥ ጺሎቴን ባስ ሃጋዚሳና ጼይጊዳይ ኦኔ? ኢዚ ካዎቴታ ኢዛስ ኣ ኢሜስ፤ ኢዚ ኢስታ ጊ ማሻን ቢታ ኬሲዴስ፤ ባ ዎንዳፌን ጫርኮይ ላሊዳ ሱላ ማላ ኬሲዴስ።

3ኢስታ ጎዲ ዬዲዲ ሜቶይ ባይንዳ ኣ ቢዴስ፤ ኢዛ ቶሆይ ካሴ ዬንታ ኦጌራ ሄሜቲዴስ፤

4ሃይሳ ኦዳይኔ ፖሊዳይ ዬሌታ ቤኒሶፌ ጼይጊዳይ ኦኔ? ጎዳይ ኮይሮይታራካ ዉርሴይታራካ ዲዛይ ታና» ጌስ።

5ሃሩሮቲ ቤኢዲ ያዪዳ፤ ሳኣ ጋጻቲካ ኮኮሪዳ፤ ኢሲ ቦላ ሺቂዲ ሲን ዪዳ።

6ኢሶይ ኢሳራ ማዴቴስ፤ ባ ኢሻካ፥ «ኣይኮይ ባ ሚና» ጌስ።

7ሂላንቻይ ዎርቃ ኦዛይሳ ሚንስ፤ ናሪቃን ቆጺ ሌኢሲዛዴይ ቢራታ ማርጮን ሴሪሲዛይሳ ሚንስ፤ ቢራታ ሴሪሲ ኦይሴይ፥ «ሎኦ» ጌስ፤ ኤቃ ጾሳ ሚስሌይ ኩንዶንታ ማላ ሚሲማሬን ቶርጌስ።

8ጎዳይ፥ «ጊዶ ኣቲን ኔኖ ታ ኣሽካራ ኢስራኤሌ፥ ታ ዶሪዳ ያቆቤ፥ ታ ላጌዛ ኣብራሃሜ ዜሬዞ፥

9ታኒ ኔና ቢታ ጋጻፔ ኤሂዳይሶ፥ ሳሎይ ዳንጾሶፔ ጼይጊዳይሶ፥ ‹ታ ኔና ታ ኣይሌዞ› ጊዳይሶ ታ ኔና ዶራዲስ ኣቲን ኦላጋቤኬ።

10ታኒ ኔናራ ዲዛ ጊሻስ ያዮፋ፤ ታኒ ኔ ጾሳ ጊዲዳ ጊሻስ ዳጋሞፋ። ታኒ ኔና ሚንናኔ ማዳና። ታ ጺሎቴ ኡሻቻ ኩሼን ዜምፒሳ ኦይካና።

11«ቤኣ ኔ ቦላ ሃንቄቲዳ ኡባይ ኬሂ ዬላታናኔ ካዉያና፤ ኔናራ ኤቄቲዛይቲ ቲምኢ ጊ ያና።

12ኔኒ ኔ ሞርኬታካ ኮያዳካ ዴማካ፤ ኔና ኦሊዛይቲ ፒቴቲ ያና።

13ጋሶይካ ታኒ ጎዳ ኔ ጾሳይ፥ ታ ኔና ማዳና፤ ያዮፋ ታ ኔ ኡሻቻ ኩሼዛ ኦይካና።

14ኔኖ ጉጹኔዞ ያቆቤ፥ ኔኖ ቄሪ ኢስራኤሌ፥ ‹ያዮፋ ታኒ ኔና ማዳና› ጌስ። ኔና ዎዚዛይ ኢስራኤሌ ጌሻዛ።

15ቤኣ ታኒ ኔና ኦራ፥ ቃራኔ ኣቻራ ዲዛ ካ ቡኪዛ ሎዳ ኦና፤ ኔኒ ዙማታ ጎያ ሊቂሳና፤ ዙምቡላታካ ዬ ሃፓ ኬሳና።

16ኔኒ ኢስታ ሱራጋና፤ ጫርኮይ ኢስታ ፒቲ ኤፋና፤ ጎቴይካ ኢስታ ላላና። ጊዶ ኣቲን ኔኒ ጎዳን ኡፋዬታና፤ ቃሴ ኢስራኤሌ ጌሻን ቦንቼታና።

17ሂዬሳቲኔ ሜቶታንቻቲ ሃ ኮያና፤ ጊዶ ኣቲን ኣይኮካ ዴሜቴና፤ ሃ ሳሞን ኢስታስ ፖራንዴይ ሜሊዴስ፤ ጊዶ ኣቲን ታኒ ጎዳይ ኢስታስ ዛሮ ኢማና፤ ታኒ ኢስራኤሌ ጾሳይ ኢስታ ዬጋ ኣጊኬ።

18ታኒ ቡላቲዳ ዙምቡላታ ቦላ ሻፋታ፥ ሾባታን ፑልቶታ ሳና፤ ባዞ ቢታ ኤሌ ሃ፥ ሳሜቲዳ ቢታን ሃ ፑልቶ ኬሳና።

19ባዞ ቢታን ዚጋ፥ ኦዶሮ፥ ባርሴኔቴኔ፥ ዎጋራ ሚ ሞይዛና፤ ኣይኮይ ባይንዳ ባዞን ጺዳ፥ ጉንኔ ኦን ቶካና።

20ሄሳ ጊሻስ ኣሳይ ሄሳ ቤኣናኔ ኤራና፤ ጎዳ ኩሼይ ሃይሳ ኦዳይሳ፥ ኢስራኤሌ ጌሻይ ሜዳይሳ ኢስቲ ኢሲፌ ዩሺ ቆፓናኔ ኣኬካና» ጌስ።

21ጎዳይ፥ «ኣኔ ኢንቴ ሞቶ ኤኪዲ ሃ ሺቂቴ» ጌስ። ያቆቤ ካዎይ፥ «ኣኔ ኢንቴ ሞቶ ዳፋ ሃ ኤሂቴ» ጌስ።

22ቡሮፔ ሃናናይሳ ዮታና ማላ ኢንቴ ኤቃ ጾሳታ ሃ ኤሂቴ፤ ኑ ኣኬካና ማላኔ ኢስታ ዉርሴካ ኤራና ማላ ካሴ ዮኦቲ ኣዛኮ ኑስ ዮቲቴ፤ ቡሮፔ ሃናና ሚሻታ ኤሪቴ።

23ኢንቴ ጾሳታ ጊዲዳይሳ ኑ ኤራና ማላ፥ ሲንፌ ሃናና ሚሻታ ኑስ ዮቲቴ፤ ኑኒ ዳጋማና ማላኔ ያያና ማላ፥ ሎኦ ጊዲን ዎይኮ ኢታ ሚሽ ኦቴ።

24ሄኮ ኢንቴ ኣይኮ ቆዳን ጌሎንታይታ፤ ኢንቴ ኦሶይ ሙሌካ ሃዳ፤ ኢንቴና ዶሪዳይቲ ሃራሲዛይታ።

25«ታኒ ፑዴሃ ባጋፌ ኢሳ ዴንዲስ፤ ኢዚካ ዬስ። ኣርሼይ ሞኪዛ ባጋራ ዪዛይሲ ታ ሱን ጼይጊዛይሳ፤ ማናይ ኡርቃ ዬዛ ማላ ኢዚ ካሌዛይታካ ዬስ።

26ኑኒ ኤራና ማላ ኮይሮቲ ኑስ ኣዋጂዳይ፥ ‹ኢዚ ሊኬ› ኑ ጋና ማላ ኑስ ካሴቲ ዮቲዳይ ኦኔ? ኦኒካ ዮቲቤና፤ ሲንቲዲ ዮቲዳይ ዴና፤ ኢንቴፌ ኣይ ቃላ ሲዪዳይካ ዴና።

27ኮይሮታዳ፥ ‹ሄኮ ታኒ ቤኣዲስ› ጋዳ ጺዮኔስ ኣዋጂዳይ ታና፤ ዬሩሳላሜስ ሚሺራቾ ዮቲዛዴ ኢማዲስ።

28ታኒ ጼሊዛ ዎዴ ኦኒካ ዴና፤ ኢስታ ጊዶን ዞራንቻይ ባዋ፤ ታ ኦይቺዳ ዎዴ ዛሮ ኢሚዛይካ ዴና።

29ቤኢቴ ኢስቲ ኡባይካ ሃዳ፤ ኢስታ ኦሶስካ ጎኣይ ዴና፤ ኢስታ ሚስሌቲካ ኣይኮይ ባይንዳ ጫርኮ ማላ» ጌስ።

← Chapter 40 Jump to: Chapter 42 →